防水激戰Sony Z1 Compact vs AU LG L22

我達人G最鍾意夏天，除咗可以玩水上活動外，仲有大把Bikini睇，諗起就開心！去得沙灘，拎起手機Snapshot是常識吧！最近不同廠商為了迎接夏日，均不約而同推出防水手機，一部是行貨Sony Z1 Compact，一部則是水貨AU LG L22，規格、功能各具賣點，但價錢卻差成倍，究竟邊部適合？一於等達人進行連串測試，再話過你知！

Sony Z1 Compact $4,298（a）

搭載了名廠G Lens，另有LED作補光之用。

AU LG L22 $2,680（b）

備有1,320萬像素鏡頭及補光燈，配套不俗。

Z1 Compact機身完全密封，入水深度亦較對手強。

LG L22屏幕遇水後，反應變得遲緩，表現較令人失望。

試播AKB 48的短片，LG L22（下）視野、亮度均較佳，至於Z1 Compact（上）則有少許偏黃，色溫處理亦不及對手。

Z1 Compact支援虛擬實景拍攝，可把水世界帶到室內，透心涼！

LG L22支援追蹤拍攝，就算物件移動也能追蹤放大。

第1回合：遇水鬥流暢：Sony Win！

Z1 Compact符合IP55/58標準，可入水1.5米30分鐘，而LG L22則符合IPX5/IPX7標準，只能入水1米，講深度似乎唔及對手。遇水後反應亦各有不同，扮倒瀉水落屏幕，Z1 Compact縱有水珠，但依舊可流暢捽芒，同時所有插口都有防水蓋保護，所以水滴入唔到機內。相反，LG L22遇水後屏幕即刻變鈍，撥頁也見遲滯，而由於底蓋與機身並非完全密封，所以內部容易有水氣，建議每次掂水後抹乾為妙。順帶一提，兩部機完全入水後，受水壓影響，屏幕會完全失靈，惟它們都可透過實體按鍵影相，浮潛影相都得！

第2回合：屏幕鬥睇片：AU Win！

防水手機除咗可沙灘影靚女，仲可以畀阿媽在廚房邊煮餸邊煲劇，所以屏幕質素都係考慮因素。Z1 Compact屏幕只有4.3吋、720p級數，無論尺寸、細緻度都不及5.2吋1,080p的LG L22。實際睇片又如何呢？Z1 Compact用的是IPS面板，本身質素已經唔差，不過對手用的是升級版AH-IPS屏幕，畫面不但細緻實淨，仲勝在亮度更高、色溫亦佳，無論戶外戶內都睇得清楚。

第3回合：鏡頭鬥好玩：Draw！

兩部機鏡頭像素都達千萬，透過細小屏幕睇相，講真分別不大，不如比吓各自有咩「分唇」仲有意義。Z1 Compact支援AR虛擬效果、Timeshift Burst 61張連拍、Info-eye資訊搜尋等功能，並提供素描、魚眼、漫畫、萬花筒等濾鏡，Snapshot變化十足！呢方面LG L22亦唔弱，在HDR、人面優化及超廣角拍攝以外，還提供旗艦機才有的雙鏡頭攝錄，可前後同時錄影之餘，仲可邊跟蹤邊放大物件，水底影魚仔就至適合！

達人G結論：視使用環境而定

雖然兩部手機都以防水為賣點，但詳細比較後，會發覺兩者目標顧客完全不同。Z1 Compact賣輕巧兼防水能力強，並同時提供手機繩掛孔，就算衝浪都可帶埋去，擺明為好動人士而設。另一邊廂，AU LG L22明顯大部得多，遇水後表現亦較差，個人覺得佢定位似生活防水多些，但佢勝在屏幕夠大夠靚。一言以蔽之，帶去玩的話一定揀Z1 Compact；若喺室內用，例如畀老媽子煲劇的話，AU LG L22則係必然之選！