K-pop組合 認真 搞怪
當下大家可能仲會將「豁，豁出去」作為茶餘飯後的笑料，但這股MK-Pop風，不論組合的造型、歌藝優劣與否，都非常成功引起「全城關注」。至於在泡菜國，歌精舞勁的K-pop組合多如繁星，單靠靚仔靚女正正經經都幾難突圍，所以偶爾見有男團女團特別搞吓主題造型搶收視。今期就來拆解搞怪韓團，縱使夠晒千奇百怪，但勝在製作認真，點都贏我哋本土成條街！
美人魚造型加上保鮮紙包裝，製作絕對認真。（互聯網圖片）
美女吞拿魚壽司，人人爭住食！（互聯網圖片）
檸檬茶放上頭，仲唔搶鏡成功？（互聯網圖片）
舊年聖誕節唔扮聖誕老人，走去扮聖誕樹。（互聯網圖片）
Crayon Pop早前以頭盔Look在眾多女團中彈出。（互聯網圖片）
金雞獨立的舞步未知能否掀起繼《Bar Bar Bar》後的熱潮呢?（互聯網圖片）
SHINee的《Everybody》造型，軍事味道型格非常。（互聯網圖片）
Nine Muses的制服Look個個不同，帶點美國50年代的復古味道。（互聯網圖片）
全軍上陣的少時扮成空姐，清一色穿上制服，確實有幾分相似。（互聯網圖片）
男團VIXX的吸血鬼造型，Full make up加黑色指甲油，營造出鬼魅的氛圍，霎下眼仲以為係天堂鳥添！（互聯網圖片）
PSY以SM Feel的造型作現場表演（右圖），三個字：重口味。（互聯網圖片）
Orange Caramel 抵死刺身
韓國女團Sell 長腿是常識吧，尤以美腿見稱的韓團After School，但成員Raina、Nana和Lizzy另組的子團體Orange Caramel，就打正旗號行搞怪路線，2010年出道至今，就憑着要多怪有多怪的造型在日韓爆紅。最近新歌《Catallena》MV中更扮埋急凍食品，化身美人魚海鮮，服飾更仿照三文魚和熟蝦，就連打歌服都貫徹食物風格，壽司、Pizza統統着上身。當然，亦有較正常造型，全身波點配喇叭褲，在壽司板上大跳大唱，單是製作已經贏得眾人目光，唔賣長腿一樣Sure Win。
Crayon Pop 頭盔變頭巾
頭盔變成時尚單品，真係多得女團Crayon Pop，這班妹妹仔彈彈下紅到來香港開個唱，短裙內襯運動長褲，雖然有點騎呢，但毋須露肉都成功殺出重圍。今次Comeback就放下頭盔，換上一身白衣加紅色三角頭巾，為配合新歌《Uh-ee》的鬥雞舞，單腳跳的舞步叫人哭笑不得，要在芸芸韓團中贏取收視，賣「可愛」一樣掂。
制服主題 男女皆玩
玩到咁盡，並非適合每個團體，所以不少韓團就以主題為新歌包裝，有留意的話，最常見是軍服，「制服誘惑」不分男女團都非常Work，好似SHINee、Girl's Day、Brown Eyes Girl 都不約而同用過軍事元素，像軍帽、雙排鈕扣、金色繡線、徽章等。
另外，同樣大獲韓團歡迎的就是空姐Look，少女時代就曾經以此作唱片封面，穿上統一制服；另一隊全Model成員的Nine Muses也拍攝過類似造型的硬照，制服誘惑果然長做長有。
另類重口味
K-pop當然也有重口味之選，像男團VIXX就玩過吸血鬼造型，個個戴上黃色Color Con，又要化紅個嘴，加上黑指甲都咪話唔嚇人；而出名愛搞怪的PSY就曾經在《Gentlemen》一曲的宣傳海報扮跳天鵝湖，騎呢程度爆燈！
