潮味藍芽喇叭對撼Beats Pill×Alexander Wang vs Jarre AeroTwist

近排手痕想搵部藍芽喇叭，但腦場貨色好多都唔靚仔，連試聽嘅意欲都冇！好在達人G早排喺時裝店見到隻好有貴氣嘅黑撞金藥丸形藍芽喇叭仔，佢正是Beats同Alexander Wang聯乘嘅Pill喇叭，仲跟埋魔鬼魚壓紋皮殼添！跟住聽講又有隻冬甩形的藍芽喇叭新到貨，佢係之前出過骷髏喇叭嘅Jarre出品，型號叫做AeroTwist，唔止可扮冬甩，仲可以左右扭玩變形！咁到底係「藥丸」正定係「冬甩」勁呢？

Beats Pill × Alexander Wang $2,600（a）

Jarre AeroTwist $2,990（b）

機頂印上Beats跟Alexander Wang兩個品牌名字。

隨機有個黑色魔鬼魚壓紋硬殼，比原版貴幾百蚊自有原因。

AeroTwist可塑性夠高，唔嫌重的話可將喇叭掛在手挽袋之上。

Jason Mraz《The Freedom Song》

Lady Gaga《Applause》

Beats Pill的單元擺位集中，中高音表現都幾清。

AeroTwist同樣設有四單元，但受機身設計限制，音色較散。

如果有閒錢的話，買多個Beats Pill嘅Character機套氹吓自己開心都得。

在原本冬甩形以外，AeroTwist仲可以將喇叭扭成不同形狀作擺設。

Beats Pill提供Line IN/OUT及NFC連接能力，當開機及連接時更會有聲音提示。

AeroTwist同樣提供Line IN/OUT端子，但只有閃燈提示操作狀態。

第1回合：鬥音色：重人聲vs低音強：Beats Pill：Win！

藍芽喇叭最緊要當然係聲效表現；兩款喇叭都內置四單元，差別不大；不過機身設計不盡相同，音效表現遂大有分別。Beats Pill單元設計集中，中高音表現都幾清，試聽Acoustic為主嘅Jason Mraz歌曲，音色夠清脆，可惜低音弱，播Pop歌就比較輸蝕。至於AeroTwist單元擺位分散，發音方向會較散，但係喇叭底部設有管道發放低音，如果將喇叭平放在平面上，撞擊出的低音都幾強，播放Lady Gaga《Applause》效果唔錯，而且可將喇叭四個單元扭向相反方向擺放，聲音覆蓋面都幾廣闊。

第2回合：鬥好玩度：任扭任擺vs多配件：AeroTwist：Win！

Beats Pill×Alexander Wang藍芽喇叭本身已跟上一個貴氣十足的魔鬼魚壓紋殼，拎出街都好有型。Beats之前為Beats Pill出咗套三色選擇嘅Character保護套，擺喺睡房或者Office都幾過癮，不過要賣成$450。AeroTwist就唔使另外加錢都可以畀你任扭任玩，最多扭出270度，當做家居擺設亦得，要日日轉新Look都無問題，貪得意仲可將AeroTwist掛在肩袋上，玩法千變萬化，唔聽嘅時候都睇得吓！

第3回合：鬥接駁操控：發音提示vs閃燈提示：Beats Pill：Win！

兩部喇叭接駁都唔難，接駁端子都幾相似，只要開着智能手機上的藍芽功能，幾秒就可以同喇叭配對。另外兩部喇叭都有NFC功能，只要用支援NFC的手機一拍喇叭機身就可以順利接駁，一啲都唔難用。不過比較唔同係Beats Pill在開機或藍芽連駁成功時，都會發出「嗶嗶聲」提示，但音量較大，好遠都聽得到我駁緊藍芽喇叭；同時「b」字Logo旁邊亦會着燈顯示操作狀態。相反AeroTwist就無聲，只用唔同顏色閃燈顯示操作狀態。