至Chok特工HT 1/6雷電
Action Figure向來陽剛味極重，係男生專屬嘅玩具，不過世事無絕對，事關一向順應民意嘅Hot Toys，原來唔聲唔聲攞咗《Metal Gear Rising：Revengeance》嘅Figure版權，將美型主角雷電化成1/6 Figure，唔只有Smokey Eyes靚樣必殺港女，裝甲仲係人手逐件塗裝，金屬感爆燈，只要閣下鍾意打機，尤其是《Metal Gear》系列，無分男女仲唔中招？
零售價：$1,880
預訂價：$1,830
推出日期：今年第四季至明年第一季
圖片所示仍屬試辦原型，與最後完成品或有若干分別。
裝甲逐件上色，在不同燈光角度下，色澤亦會隨之變化。
作為未來忍者，背脊又點少得招牌武器武士刀？
全身有30個關節，配合分件處理嘅黑色裝甲，靈活度高，擺大動作甫士都冇問題。
頭雕完全將CG人設實體化，眼神、皮膚都似到足，恍如真人一樣，並有齊眼罩、Bar Code及螺絲等細節。
隨盒另有面罩Look組件，形象更加未來化。
雷電係全能型殺手，擅用各種武器，今次嘅HT Version就有齊長刀、短刀及突擊步槍。
非會員訂購時肯畀多$100或以上行善嘅話，亦可獲贈原屬會員專利嘅HF Murasama刀連刀套。
人氣電玩《Metal Gear Solid》推出Figure並非新鮮事，「PlayArts改」及「海洋堂」等日廠都經常出，至於香港勢力HT就主攻1/6 Action Figure，去年日本HT JP曾經舉行網上調查，喺冇篩選、一人一票真普選之下，雷電以Top 1大熱姿態勝出；事隔一年，HT終於履行承諾，繼蛇叔Naked Snake及The Boss之後，第三款《Metal Gear》1/6 Figure就輪到雷電了。
美中不足右眼冇Lighting
喺遊戲世界內，雷電以純CG出現，一頭金髮加靚樣當然殺女無數，但話明係遊戲人物，都冇真人面相參考，化為頭雕實物嘅難度，肯定比HT出開嘅電影Figure為高，為此HT搵嚟擅雕男性角色嘅Kojun出山，再由首席塗裝師JC. Hong負責皮膚部分。就試辦所見，五官、輪廓都頗有Game中嘅人設神髓，皮膚紋理亦相當細膩，若果唔係畀過於日系動畫風嘅髮型出賣，仲以為係根據真人面相輪廓製成，美中不足係右眼唔識發光，未能徹底跟足Game中嘅人設特色。另一方面，雷電係一位人工智能忍者，所以右眼塗有黑色眼影，左眼就戴咗眼罩，額頭又有Bar Code及螺絲，帥氣中亦流露出殺氣騰騰。
$100追加Parts做善事
素體方面，若果之前玩過日系Medicom推出嘅同款作品，應該會被其低可動嘅包膠Body嚇親，有見及此，HT製作團隊花咗唔少時間提升靈活性，最後決定喺人偶內放入素體骨架，再將複雜嘅黑色生化裝甲逐件分拆裝嵌，又搵嚟韓國塗裝師Yoong Young Lee為裝甲逐件塗上金屬顏色，喺美觀及可動性取得完美平衡，功架盡現。配件方面相當豐富，有齊面甲、胸甲、四對手掌、高周波刀（HF Blade）、高熱小刀（Heat Blade）及一把步槍，而Secret Base會員或Toy Hunters VIP預訂，仲可獲贈HF Murasama（村正）刀連刀套，就算閣下唔係會員，預訂時只要捐出$100或以上畀奧比斯，都可擁有呢Set Bonus Parts，呢條紅衫魚，抵畀啦！
愈慘愈上位
雷電本名「Jack」，細細個就喺戰場上成長，由於殺人如麻，被敵方稱為「開膛手傑克」或「白色惡魔」，後來畀「愛國者」捉去訓練，並於《MGS 2》中首度登場。初期雷電唔算受歡迎，甚至被譏為「票房毒藥」，不過自從喺《MG》系列第四集改走悲劇英雄路線後，人氣隨即谷底反彈，甚至取代蛇叔，喺外傳作品《MGR：Revengeance》擔正做男主角，代價係失去咗左手及左眼，兼被改造成生化機械人。鑑於雷電每次受虐後，人氣都有所提高，好多Game迷都笑稱他「沒有明天」，並期待日後以更「悲壯」嘅姿態出現，都幾幸災樂禍喎！
查詢：3722 3988（Secret Base）
