2014巴西世界盃好快就殺到埋身，距離香港時間6月13日凌晨揭幕戰剛好尚有兩個月時間，唔知大家Ready好未？官方認可世界盃足球遊戲《2014 FIFA World Cup Brazil》兩日後就會推出，動作系統大致上都係跟番《FIFA 14》，但當然會有全盤世界盃元素，例如可以帶領任何一支國家隊由外圍賽打起，進軍決賽周，抵讚係今集遊戲音樂及畫面用色都充滿森巴嘉年華氣氛，真係隔住個芒都Feel得到！

「巴神」今屆世界盃到底會踢成點呢？

今集加入泰山壓頂從後壓人爭頂新動作。

巴西隊可唔可以喺主場捧盃？

舉行決賽的里約熱內盧馬拉簡拿球場恍如現場。

原本筆者都心儀德國隊，不過被燈神Lulu力撐之後，心頭真係涼咗一大截。

今次遊戲都設有各種挑戰賽，而練習場設計都係一貫巴西風格。

整個介面都用上巴西的黃綠色設計，配上輕快音樂，非常有嘉年華Feel！

早十日推出的試玩版中，巴西同日本隊都已經穿上今屆新波衫上陣。

今集只推出PS3同Xbox 360版本。

泰山壓頂爭頂高波

相距《FIFA 14》推出時間只不過半年，世界盃版《2014 FIFA World Cup Brazil》都好難或者無太大必要重新建立遊戲的物理系統，不過EA Sports一樣都有進行局部微調，其一是「Over-the-Back Headers」，身後的球員可以加少少超技術，壓低前方球員爭頂波；其二是改進了12碼系統，球員會圍在大禁區外等待12碼被撲出後的補射機會，而且龍門更可以做出「騷擾動作」，如在白界線上左右移動令主射球員分心。另外在球員操控上，今集都引進「Response Dribbling」同「Pinpoint Passing」令盤球同傳送時更真實，做到更高難度同精準的動作。遊戲當然唔少得會用上今屆世界盃指定足球adidas brazuca，機迷都要適應一吓呢個新波的物理表現。

真實世界盃球場有齊

遊戲其中最強賣點是夠真實，由比賽用足球、波Boot、球衣、球員資料同球場，都與現實接軌，話晒都係攞齊License開發。《2014 FIFA World Cup Brazil》收錄203支真實國家隊、7,469名球員、12個真實舉行世界盃比賽的巴西球場，可能仲靚過唔知趕工趕成點的真實球場。而且遊戲內球員所穿着的球衣都已是最新世界盃款式，不過如果唔啱心水的話，轉番着舊款波衫都得。今集另一個有趣地方係當一方入波後，會即時Pan到世界各地睇吓收睇大型電視直播的球迷佢哋點樣慶祝同有乜反應，遊戲會收錄15個唔同地點，好似倫敦特拉法拉廣場同莫斯科聖巴索大教堂等！

為現實球賽平反

想爭奪世界盃？遊戲入面收錄多個世界盃模式，自己一個人玩當然得，連線同其他人打都得。「Road to FIFA World Cup」模式係由外圍賽打起，最多支援32個玩家控制唔同球隊在單機上進軍世界盃。至於「Road to Rio de Janeiro」連線模式就更加有趣，將12個舉行比賽的地點分成唔同等級，要跳到下一區作賽就要在該地區聯賽出線，打得好就「升班」，打得差就要降班，目標就係要入到里約熱內盧的馬拉簡拿球場爭世界盃，玩法跟《FIFA》的聯賽模式相似。另外常在歐國盃版及世界盃版出現的「Captain your Country」玩法同最基本的32強戰「2014 FIFA World Cup」仍然保留。另外，如想在世界盃舉行期間為當日比賽平反的話，就一定要玩「Story of Finals」，每場真實比賽完場後一個鐘，遊戲就會上載該場比賽的多項挑戰任務，玩家可以自己一手一腳推翻賽果，不過今屆比賽全部都喺半夜舉行，因住玩到忘形無精神返工！

INFO

類型：運動

開發：EA Sports

平台：Xbox 360、PS3

推出日期：4月15日

售價：$449

查詢：2359 7998