在剛過去嘅周末，來自世界各地14支坦克大軍齊集波蘭首都華沙，一連三日打咗過百場坦克大戰！不過戰場並非城市街道，而係商場入面嘅大型戲院。總決賽當日，觀眾一早就逼爆會場，等睇烏克蘭軍大戰俄羅斯軍！查實今次大戰係推出《World of Tanks》坦克遊戲的Wargaming.net首次舉辦的「Wargaming.net League」世界大賽，賽事總獎金高達30萬美元，冠軍隊更可獨取逾十萬美元的獎金同獎品，打機原來也有出頭天！

總決賽第一局，藍方Na Vi以不失一架坦克下全滅敵方。

最後一局「Sand River」地圖上，Na Vi快速搶佔制高點，最後能擊敗對手。

Na Vi團隊終奪得總冠軍，全場觀眾起立歡呼。

逼不入戲院現場睇比賽，都可在戲院大堂大電視睇直播。

戲院內還搭起直播評述台，由專業主持評述比賽，製作非常認真。

總決賽戲碼強勁，場內一早爆棚。

冠軍隊Na Vi不諱言總決賽反勝帶點幸運成分，但他們臨比賽前的兩星期，每天都練上七至十小時，足證成功非僥倖。

榮膺今屆MVP的菲律賓PVP Super Friends隊長Batman（右）造型突出，賽後不少觀眾都爭住同佢合照。

香港代表隊U Are Dead：（上排由左至右）AK、LegacyJanna、Onionhead、AnGeLxBeaTs，（下由左至右）minichun、副隊長SoldierWu、隊長GodCowOne。

香港U Are Dead（右）以2比0擊敗中國職業隊（左）。

CEO Vitor表示今屆世界大賽由構思、籌備到實行只有半年時間，盼可吸收今屆經驗。

歐洲及北美電競總監Mo表示今年會投放更多資源在eSports範疇之上。

參觀完畢後，博物館職員還加插一場小型坦克巡遊壓軸表演。

能夠親身爬入坦克駕駛艙，認真有今生無來世。

《World of Tanks》製作認真，開發商會不斷推出更新檔，務求精益求精。

雲集高手中的高手

要贏得《World of Tanks》世界冠軍名銜堪稱難過登天，皆因獲得「Wargaming.net League」世界大賽參賽資格的，都係高手中之高手。《World of Tanks》在全球總共設有六個伺服器（歐洲、獨聯體、北美、中國、韓國、東南亞），每個伺服器排名第一可直入是次世界大賽季後賽，而每個伺服器的第二名團隊加上兩支外卡團隊（主辦國波蘭Lemming Train跟德國Team WUSA）就要先分兩組爭奪季後賽資格。比賽以7vs7方式作賽，要在每局限時十分鐘內全滅敵軍先能取得一分，打和則各得一分，唔同階段有唔同取勝所需分數，有兩分、三分以至王者之戰的四分；就算輸掉一場比賽，都可以跌落負方作賽，但對番勝方團隊時，一開始就會先落後一分。

華沙全民參與eSports

大賽由「主場」波蘭團隊Lemming Train對烏克蘭團隊Synergy揭起戰幔，結果波蘭隊以2比1獲勝。《World of Tanks》遊戲是由白俄羅斯公司開發，點解會在波蘭舉行首屆eSports大賽？Wargaming.net CEO表示，舉辦世界大賽要考慮好幾個因素，第一是網絡連線速度及穩定性，第二是主辦國簽證困難與否，第三是當地市民參與eSports的投入程度。唔講唔知，原來華沙係世界上市民參與電競運動比率最高的城市，因此華沙一直都係Top 3之列！而且華沙非常尊重創意工業，連副市長都係《World of Tanks》Fans，為是次世界大賽大開綠燈，難怪只得半年時間籌備都能夠搞得有聲有色，甚至乎畀賽會Logo於晚上投影在城市地標文化科學宮外牆之上，全個城市都睇得到！

香港隊打敗中國職業隊

香港創意工業搞成點，大家有目共睹，但講到打機就卧虎藏龍！香港團隊U Are Dead都能夠殺入華沙成為最後14強，在資格賽上擊敗中國職業電競隊Energy Pacemaker，取得一勝二負，可惜無緣進身八強。經過一場又一場坦克大戰，最後躋身決賽兩支團隊是以全勝姿態入決賽的俄羅斯Virtus.Pro跟烏克蘭Na'Vi，不過其實這兩支職業電競隊都各有俄羅斯同烏克蘭成員，並無大家在近期政治新聞上睇到嘅對立面。比賽冠軍獎金有六萬美元、亞軍有四萬美元，為名為利，兩隊都非常認真，單在賽前隊長要從七幅地圖中剔除其中一幅，就花上三、四分鐘，諗過度過先做決定。

烏軍反勝場內氣氛高漲

由於俄羅斯團隊Virtus.Pro曾在季後賽擊敗過Na'Vi，因此在王者之戰上，未開賽就取得1比0嘅甜頭。在第一場「Mines」地圖大戰中，烏克蘭隊在不失一架坦克的情況下全滅俄隊七架坦克，將比分扳成1比1。到第二場「ENSK」地圖對戰中，雙方打法相當保守，而十分鐘時限後段雙方都完全停駛，最後和局收場各得一分。到第三場「Prokhorovka」及第四場「Himmelsdorf」，紅方的俄羅斯都佔盡優勢，只是由於發動攻勢時間太遲未能全滅對手而和局，其中一場最後更用上四架坦克圍剿烏克蘭隊最後一架坦克，可惜失敗，如果早15秒發動攻勢應會是俄隊取得總冠軍。總分4比4下要進行附加賽，結果烏克蘭Na'Vi在「Sand River」地圖上一開始採取主動搶佔制高點，在時限剩低約兩分鐘時帶點幸運成分下反勝俄羅斯隊奪冠。今屆比賽較預期熱鬧得多，唔少華沙市民一早到賽事舉行地點Multikino Zlote Tarasy戲院外排隊等入場睇比賽；王者之戰更多人要坐戲院樓梯級觀戰，開戰前更玩埋人浪，估唔到電競比賽的氣氛都拍得住世界盃！

專訪港隊「U Are Dead」業餘出戰

能夠躋身最後14強，香港隊U Are Dead與其他團隊最不同是制服上並無任何贊助商標。隊長神牛（GodCowOne）覺得他們跟職業隊在資源上無得比：「每個成員平時都要返工、返學，莫講話要齊人練習難，就算比賽時要集齊人都好難。隊員會因工作或個人等等問題退隊，令團隊成員流失率高，要重新再夾檔頗費時間。」練習時間少，人數又唔穩定，因此佢哋會比較多練習二打二或三打三小規模戰鬥，不像其他職業隊經常打「Form」，戰術變化較為靈活，大會都將他們的「Creativity」分數打到爆燈。U Are Dead在分組賽先負俄羅斯隊，後勝中國隊，然後不敵韓國隊出局，他們覺得實戰不時要換位及受器材所限影響發揮，如果運氣好的話，應有機會打入八強。副隊長神兵話以佢廿零歲仲讀緊書，但靠打機可殺入世界大賽決賽，都算心滿意足了！

CEO訪談為eSports投放千萬美元

比賽大會預留了時間給傳媒訪問Wargaming.net的CEO Victor Kislyi跟歐洲及北美電競總監Mohamed "Mo" Fadl，當被問到點解要在無收益的情況下大搞《World of Tanks》比賽，Victor表示一個遊戲要得廣泛認同及歡迎才能夠成為eSports項目，佢哋希望能夠回饋忠心玩家，仲諗緊可唔可以夾埋其他遊戲公司再發大嚟搞。Mo則話過去一年間有四萬支eSports團隊參與《World of Tanks》比賽，總選手數目超過20萬人，今年更會在eSports項目投放1,000萬美元，比去年多25%。去年年底在歐美推出的《World of Warplanes》會否成為下一個eSports項目？Victor謂言之尚早，始終玩家對空戰三維空間較難適應，要等到亞洲推出兼取得成功後先會再諗。

場外花絮：唔玩電腦親身上坦克

大會今次邀請了全球幾十位傳媒採訪是次比賽，除了安排簡短的華沙City Tour外，最特別是安排傳媒到華沙軍事科技博物館（Museum of Military Technology）親身接觸坦克。由爬上坦克甲板，鑽進車廂為坦克炮上彈，以及同坦克安裝鋼纜等等，擒高擒低，體力勞動，其實都幾辛苦，都係坐喺電腦前打《World of Tanks》簡單好多！

《World of Tanks》俄國首發 製作認真

《World of Tanks》係史上第一款亦係唯一一款以團隊合作為主的大型多人連線坦克戰爭遊戲，由白俄羅斯公司Wargaming.net開發，2010年底在俄羅斯率先推出，遊戲內收錄美國、德國、蘇聯、法國、英國、中國及日本總數超過300台坦克及裝甲車，坦克設計細節都跟足史實，軍事迷跟軍事遊戲迷識得玩都一定玩佢。

網址：http://worldoftanks.asia/