同是天涯玩具迷，除非有古天樂咁強嘅吸金能力，否則普羅大眾如你我他，今時今日買玩具，銀包真係好傷，好似以前嘅SHF拉打，$200樓下有找，依家$300樓上已經濕濕碎，仲有「入場費」成千銀起錶嘅1/6 Action Figure，以及形形色色變相加價嘅特別版模型……要用有限嘅財力追求最大嘅樂趣，入貨前真係要諗清諗楚。不過今期就有一件「有買貴、冇買錯」嘅極品上架，再慳家嘅玩具迷都會唔買唔安樂，佢就係「SR超合金」嘅始源勇者王Genesic GaoGaiGar！

Hell and Heaven Vita
SR超合金始源勇者王Genesic GaoGaiGar
建議零售價：$1,029（初版送「早期購入特典」）

Broken Magnum

Bolting Driver

Will Knife

Protect Shield

獅子嘅鬃毛組件可以上下移位，加埋膊頭能夠大幅度移前，肩甲仲可以向上揭起，從多方面增加雙臂向前活動嘅空間，令Hell and Heaven Vita呢招可以擺得更自然、更有型。

左、右膝頭分別裝咗專用嘅Straight Drill及Spiral Drill，兩者亦可以一併換上圓錐鑽頭。

「怒髮」用透明橙組件表達，夠神似，Ball Joint連接亦有唔錯嘅可動性。

Bolting Driver嘅頂部，由左至右可以換上用嚟分解敵機內部嘅Genesic Bolt、扭曲空間嘅Protect Bolt，以及引爆用嘅Broken Bolt。

Gadget Feather可以大幅度拉長，而且內有連動結構，翼上嘅紅色紋理亦都刻畫清晰。

小腿內外兩側都有延伸結構，藉此抵銷爪子接地性差嘅影響。

SR超合金我王戰牙GaoFighGar
建議零售價：¥8,100
推出日期：七月

粉絲期待已久嘅超合金魂GaoGaiGar，有望於今年內成事，不過官方只係發表咗設計草圖，仲未有實物睇住，確實嘅推出日期及售價都未定。

雖然《勇者王》動畫系列已經完結咗10年有多，不過充滿霸氣嘅橫練造型，今日睇番依然型到痹，尤其是終極機體Genesic GaoGaiGar，喺呢10幾年嚟又有邊部科幻作品可以匹敵？最新推出嘅SR超合金版本，傳神程度更加係所有Genesic GaoGaiGar商品中最高嘅！即使SR超合金被視為「超合金魂」嘅袖珍版本，不過高約160mm嘅SR Genesic GaoGaiGar依然做到四肢健碩，兼且將動畫中嘅複雜線條逐一還原出嚟，最精警當然係貌似頭髮嘅Energy Acumenter，由三枚「透明橙」嘅組件構成，以Ball Joint連接喺頸後，可以扭成唔同角度之餘，又唔會阻到頭部活動，令玩家可以擺出心水嘅怒髮衝冠扯火Look。

小腿有Gimmick　唔使離地

SR Genesic GaoGaiGar唔只有型，好玩指數仲達到超高水平，原因有二，其一是主體有出色嘅可動性，手肘及膝頭都用咗隱藏式雙關節、上身咁Bulky依然可以大幅度拗腰，就連Gadget Feather雙翼展開時都有連動結構，加埋長尾巴嘅每一節都可以扭動，以超合金嚟講，絕對算得上身手靈活。除此之外，2011年SR推出GaoGaiGar時，為咗令雙臂可大幅度向前拍埋，心口嘅獅子鬃毛需要換件就位；SR Genesic GaoGaiGar唔再取巧，鬃毛組件變成可以上下移位，藉此為雙臂騰出活動空間，加上肩膊關節能夠大幅度前移，只要換上專用拳頭，就可形神俱似地擺出必殺技—Hell and Heaven Vita嘅招牌甫士，充滿力量感。

至於下半身嘅結構同樣有心思，事關Genesic GaoGaiGar嘅腳掌係由三隻利爪組成，雖然每隻爪都有可動關節，但係接地性始終唔及平滑嘅腳掌形狀，設計團隊於是喺小腿嘅內外側追加延伸功能，例如想擺典型嘅A字腳甫士，正常狀態下小腿外側嘅爪子會離地，呢個時候只要將小腿外側拉長，就可令三隻爪都掂到地、企得穩，夠細心未？

良心製作　Parts齊全

SR系列雖然好玩，不過一直被批評「掠水」，事關武器組件往往會另外出Boxset賺多筆，SR Genesic GaoGaiGar超好玩嘅第二個主因，就係Parts超多，唔似以前嘅SR咁孤寒。例如Broken Magnum、Protect Shield、Bolting Driver及Will Knife等主要招式嘅組件都全部有齊，至於Hell and Heaven Vita嘅專用拳頭亦都跟埋，而且初版仲有「早期購入特典」，內有黃色嘅左前臂及粉紅色嘅右前臂，用嚟模仿使出Hell and Heaven Vita之前嘅發動形態。除咗呢啲大路嘢，就連左、右膝頭嘅Drill鑽頭，以及Bolting Driver嘅頂部都可以換件，開盒之前筆者仲估Bandai會收埋嚟日後出Boxset，好彩係杞人憂天。雖然喺OVA《勇者王GaoGaiGar》嘅最後、亦係最強一招—超巨型黃金錘未有包括在內，不過呢件Parts嘅高度高過Genesic GaoGaiGar十幾倍，你有錢買，Bandai都未必夠膽出，故此應該有嘅Parts，都幾乎喺今次嘅SR版本內有晒，即使日圓價高達¥9,500，計落都物有所值，你估港鐵咩，頻頻出事仲好意思加價，睇嚟食水深嘅Bandai都未會食到盡。

勇者後繼有人

就連最強機體Genesic GaoGaiGar都出埋，Bandai嘅勇者王系列是否代表告一段落，粉絲銀包可以止血？咁諗法，實在太天真了，喺SR Genesic GaoGaiGar推出嘅同時，Bandai宣布將會喺今年七月加推介乎於GaoGaiGar與Genesic GaoGaiGar之間嘅「我王戰牙」GaoFighGar。咁都未算，SR貴盡都係千零蚊有交易，早於年初Bandai仲話有機會幫GaoGaiGar升呢，進軍超合金魂系列，唔只大部咗，仲有埋變形、合體設計，順利嘅話會喺今年內推出，保守估計，屆時定價好難低過HK$2,000大關，勇者王粉絲好儲定錢進貢了。

查詢：2433 1828（瑞華行）