夏跑一身爽adidas Climachill
三月尾，失驚無神黑雨兼落雹，激過六月飛霜，是否天怒人怨使然？咁就見仁見智，我最擔心嘅係唔通夏天提早殺到？夏天練跑好易中暑，停一停好啲喎，好有道理啫！adidas唔通係未卜先知嘅生神仙，一早知我嘅懶蟲癮發作，遲唔遲、早唔早，就喺今期推出標榜涼浸浸嘅Climachill跑裝，加埋「咸哥」碧咸大人做生招牌，等你仲有藉口夏天偷懶唔跑步？
用咸哥做生招牌，加埋個清爽涼快Look，唔係唔Follow呀？
Climachill男裝短袖上衣 $339
右肩嘅三間商標用咗反光物料製成，切合夜跑需要。
頸背嘅內裡位置貼咗好多由3D鋁質降溫粒子製成嘅圓點，發揮即時降溫作用。
Climachill男裝背心$299
Climachill女裝短袖上衣$339
Climachill女裝背心$339
Climachill男裝短褲$359
早前adidas舉辦咗Climachill本地發布會，由長跑氣袋紀嘉文（左一）、公民鋼門謝德謙（左三）、南華三分王劉子健（右二），加埋女Model齊齊Show畀你睇Climachill有幾Colorful。
Climachill所用嘅紗線混入咗SubZero物料，再度提升降溫能力。
Climachill Ride（男裝） $899
就連鞋墊都開晒窿，令汗氣更易經鞋底嘅氣孔排出，透氣設計夠晒徹底。
中底用咗adiPRENE+，係品牌慣用嘅招牌性緩震物料。
劉子健（南華籃球隊小前鋒）
謝德謙（公民足球隊龍門）
3D粒子 觸體降溫
夏天偷懶，無非係怕熱所至，就算揀清晨或者晚間練跑，溫度都有番咁上下，筆者自問無六件腹肌Show off，唔敢自暴其短赤膊去跑，唔通又要焗到全身又熱又濕？adidas新推出嘅Climachill跑衣就成為降溫好幫手，最大特色係頸背嘅內裡，即係最易出汗、積熱嘅位置加咗好多粒銀色圓點，係由3D鋁質降溫粒子製成，與皮膚接觸時，即刻發揮降溫作用，情況就好似用手觸碰金屬表面，當堂涼咗一截，但係着耐咗，降溫功能會唔會唔Work？筆者「人肉測試」試着過一個下晝，由始至終都Keep到涼意。除此之外，整件Climachill都用透氣衣料製成，紗線內仲混入含有鈦金屬嘅SubZero物料，將蒸發與傳導嘅原理合而為一，降溫之餘，兼具傳統跑衣嘅排汗、散熱功能，咸哥亦對Climachill有此意見︰「我曾經喺英格蘭北部嘅寒冷天氣，以及美國嘅酷熱環境下比賽，氣候對運動員嘅表現係有好大影響，Climachill所用嘅技術就可以幫我哋集中精神，喺嚴酷嘅環境下都發揮得淋漓盡致。」
CC Ride開晒窿 全方位透氣
除咗上身，adidas都照顧到雙腳嘅降溫需要，所以同步出埋Climachill跑鞋系列，就以率先主打嘅CC Ride為例，整個鞋面，由頭到尾都用透氣網層製成，尤其是最易出汗嘅腳趾位置，氣孔面積亦都相應加大，就連鞋底都開埋窿，發揮全方位嘅排汗、散熱功能，涼咗之餘，又唔會再焗到成腳汗，跑起上嚟都舒服啲。而且CC Ride亦兼顧到跑鞋應有嘅緩震及靈活功能，adiPRENE+中震吸震與回震兼備，加上造型好似同廠Crazyquick籃球鞋，用咗分割式設計，配合柔軟嘅鞋面物料，活動起嚟零舍自然流暢。Well，成個系列專門同高溫作對，再無藉口夏日炎炎正好眠囉！
用家有Say
劉子健（南華籃球隊小前鋒）：「雖然平時練波、比賽都係喺室內，不過我都會跑步、踩單車，呢啲時候Climachill嘅降溫功能就好有用，我仲想呢個降溫設計延伸至籃球波衫，以及Techfit貼身衣之上，比賽、練波都可以Keep住涼。」
謝德謙（公民足球隊龍門）︰「我係一個好怕熱嘅人，所以Climachill系列由衫到鞋都好啱用，我依家着住佢，都Feel到背脊位有少少涼浸浸，尤其是我好鍾意戶外活動，經常會跑步、行山，如果服飾太焗身嘅話會覺得好辛苦。」
查詢：2730 0157（尖沙咀漢口道adidas旗艦店）、2115 9930（尖沙咀海運中心GigaSports）、2789 8198（旺角豉油街adidas Megastore）
