想一睹柬埔寨吳哥窟呢個千年歷史古蹟，依家用地圖就得！講緊的正是Google街景服務，Google早前同柬埔寨旅遊部等團體合作，為吳哥窟及100間古廟拍攝街景相片，以後用手機就隨時可以睇到吳哥窟，外觀及內部都一覽無遺。而Google仲喺吳哥窟實地搞活動，展出示今次拍攝吳哥窟街景嘅器材，當中最注目就一定係大家好少見嘅Google Trekker街景背囊。

Trekker似足一個巨型行山背囊，重18kg，都唔嘢小。

工作人員可用Android手機監察Trekker電量及定位等狀況。

Trekker背後底部的方形金屬箱內藏硬碟及電池，電池可用6至8小時。

球狀組件備有15個鏡頭，四方八面都影到。

要影到吳哥窟內部相片，工作人員就要走入古廟穿梭往來。

今次拍攝吳哥窟都有用到Google Car，主力負責外圍部分，車頂一樣備有球狀鏡頭組件。

街景服務拍攝細緻，牆上浮雕及建築結構巨細無遺。

用電腦及手機都可以隨時用到吳哥窟街景服務，效果好正！

現場有得試孭Google Trekker，人一世物一世，梗係要試！

Cultural Institute嘅Art Project藝術品用Gigapixel拍攝，放大唔朦之餘，仲細緻到可以睇到筆觸紋理。

World Wonders Project裏畀你睇晒古蹟資料及由古到今嘅景貌變化。

可將喜歡嘅藝術作品結集成「使用者藝廊」，並可跟其他用家分享。

高科技背囊

大城市要拍攝街景，用Google Car（街景車）已搞得掂，有啲地方就要用三輪車或手推車，不過吳哥窟唔可以揸車入去，廟內仲有大量崎嶇石級，於是街景服務拍攝工具Google Trekker就大派用場。簡單來講，Trekker係高科技背囊，高120cm，頂部嘅球體就係鏡頭組件，可以從不同角度拍攝之餘，相片質素高達7,500萬像素之餘，並會合併成360度全景相。鏡頭要用電線連接底部嘅金屬箱，內藏硬碟、電池、GPS定位等裝置。

2.5秒拍攝一次

器材多多，預咗Trekker唔會輕，有成18kg咁重，加上重心高，背上後走動好易失平衡。好在Trekker操作唔算複雜，工作人員只要慢慢行，鏡頭每2.5秒就會拍攝一次；不過大熱天時孭住，仲要行石級，都消耗相當體力！睇番資料，原來Trekker由 2012年推出至今，已經影過唔少世界著名景點，好似美國大峽谷、日本富士山、印度泰姬陵等等，而今次吳哥窟係屬大型遺迹數碼化項目，總共拍攝咗100座古廟，合共超過九萬張360度全景影像。睇吳哥窟街景相，確實有驚喜，皆因連牆上浮雕、一磚一瓦都睇得清楚，令人有親歷其境感覺，喜愛吳哥窟嘅朋友必定要睇睇。

Cultural Institute識古蹟

去得吳哥窟，當然要認識其背後歷史同文化，呢方面Google都幫到手。今次吳哥窟街景拍攝延伸到Google Cultural Institute此一平台。其實Cultural Institute係虛擬網上博物館，入面主要分為Art Project（藝術計劃）及World Wonders Project （世界奇觀）兩部分，前者收錄世界各地博物館及藝術家作品，再用GigaPixel技術將其數碼化，大家可以喺Browser隨意放大及縮細欣賞名作；而後者就係收錄著名景點，就以吳哥窟為例，頁面會有齊景點簡介及街景之餘，仲結集過百張不同拍攝者於不同時期所拍攝的吳哥窟相片，最久遠一張可追溯到1949年，等大家可以追古溯今。另外，用家仲可以將Cultural Institute內鍾意嘅相片儲存並製成「使用者藝廊」，方便重溫之餘，亦可分享畀其他人睇，夠晒互動。