KitKat板王激鬥Samsung NotePro 12.2 vs Sony Z2 Tablet

「貪新忘舊」向來是人類的劣根性，我達人G更係當中表表者，舊產品一Out即棄，寧願花多些錢都要追新鮮Gadgets，否則點對得住「達人」呢個威名！最近Android 4.4（開發代號KitKat）平板正式推出，達人G終於又多個藉口換機，然而當前有兩部新機選擇，一是Samsung NotePro 12.2，另一部則是Sony Z2 Tablet，究竟邊部入得過？看過以下測試可能有所啟示！

Samsung Galaxy NotePro 12.2 $7,898（a）

800萬像素鏡頭及補光燈，配套中上。

Sony Xperia Z2 Tablet $4,990（b）

僅厚6.4mm，比兩毫子仲要薄很多！

Z2 Tablet的10.1吋屏幕大細適中，鍵盤闊度亦適合雙手打字之用。

雖然NotePro 12.2支S Pen有助畫圖記事，可惜凌空操作頗考手力。

Z2 Tablet處理動作場面不見殘影，可惜亮度及對比度稍嫌不足。

Samsung NotePro 12.2支援Multi-Windows，即使畫面縮細了也依然清楚。

Smart AR可結合虛擬公仔及實景，效果爆趣，細路必Like！

《SketchBook for Galaxy》提供大量繪圖工具，需要畫圖就啱使。

第1回合：戶外操作輕巧取勝：Z2 Tablet Win！

今時今日好多人會拎平板出街工作，預載軟件方面，兩機不相伯仲，Z2 Tablet預載《OfficeSuite Pro 7》，NotePro 12.2內置《Hancom Office》，基本上都能應付文書處理需要。不過若比較手感，NotePro 12.2的753g機身就未免過於累贅，虛擬鍵盤亦太闊，單手用S Pen畫圖寫字的時候，較容易令手部疲勞。相對起來，Z2 Tablet厚度只有6.4mm，比出名輕巧嘅iPad Air仲要薄1.1mm，加上10.1吋屏幕打字剛剛好，似乎較適合外出使用呢！

第2回合：煲劇睇片投入為先：NotePro 12.2 Win！

達人G近排好少開電視，皆因煲劇睇戲用平板就得！今次呢兩部機屏幕解像度雖然有差異，但事實上都超越了全高清質素，講真細緻度一樣咁高，肉眼好難分辨。差別只在於Z2 Tablet在Live Colour LED技術幫助下，顏色偏向自然，反之NotePro 12.2就較鮮艷奪目，各有所長！惟考慮睇戲始終追求投入感，所以大多兩吋嘅NotePro 12.2明顯佔優，近睇直頭大銀幕咁震撼；而最重要係佢可以開齊四個Windows，煲戲之餘上埋網，至啱多心鬼！

第3回合：特異功能鬥影鬥畫 Draw！

兩機均內置了2.3GHz四核心處理器及3GB RAM，《AnTuTu》跑分NotePro 12.2有35,181分，只少勝Z2 Tablet二千多分，證明同樣快速，純鬥性能意義不大。機Gor重視嘅反而係特別「分唇」，Z2 Tablet影相佔優，既可玩背景散焦，又有Smart AR功能，把暴龍公仔同實景結合，效果過癮！而NotePro 12.2則有《SketchBook for Galaxy》專業繪圖程式，其筆頭、顏色、深淺都有得調校，達人G就畀過插畫師朋友試，佢話鉛筆仿真度極高，用來素描都得喎！

達人G結論：看用途做決定

雖然兩部平板都以「四核KitKat」為賣點，但詳細比較後，會發覺兩者目標顧客完全不同，揀邊部純粹依用途決定。Z2 Tablet賣的是輕巧及影相功能，加上符合IP55/IP58防水標準，擺明為「蒲」而設！ NotePro 12.1體積較大，又比對方貴差不多三千元，整體略為扣分，然而考慮到其出色的視覺效果，又附有功能多變的S Pen，可謂同時兼顧到煲劇、畫圖及工作需要。據知官方更有專用Mouse、Keyboard提供，在家使用甚至可取代Notebook，慳番一筆！