前後鏡最合拍Canon PowerShot N100

有無試過一大班人聚會，又搵唔到其他人幫手影相，最終張大合照往往會少咗個人？無辦法，總要有人負責揸機！Canon全新推出的PowerShot N100就仿如左右手，佢大玩前後鏡頭，影到對方同時又影埋自己，而且此玩法仲可以攝錄數秒鐘的短片，甚至可以將短片輯錄成故事，玩落夠盞鬼。

用上90度反芒設計，有助低角度拍攝，尤其是影活潑好動的小朋友。

售價待定

屏幕上方配有後置鏡頭，具有25mm廣角焦段，夠Wide可以影埋自己。

內置大熱的Wi-Fi功能，而且擁有NFC功能，用手機輕觸即可配對。

前置鏡頭是一支F1.8大光圈的五倍變焦鏡頭，加上24mm廣角端，足夠日常生活之用。

N100主要提供自動、畫中畫雙重拍攝及混合自動拍攝三種模式（圈示）。

按一下後置鏡頭旁邊的故事模式按鍵，即可依照影像的事件、拍攝日期、人物等，自動串連影像為一段短片。

故事模式所製作的短片，甚至可以加入色彩效果增添趣味。

試相
利用前後鏡頭所拍攝的畫面非常有趣，兩個模特兒可以齊齊入鏡，最意想不到係後置鏡頭的畫質不俗，低光環境下拍攝毫不粗糙。

前後雙鏡頭設計

N100機身前後各有鏡頭，前置鏡頭是一支F1.8大光圈的五倍變焦鏡頭，並擁有24mm超廣角視野，而後置鏡頭則是一支25mm定焦鏡頭，概念跟時下的手機有幾分相似。拍攝時大家在屏幕上可以睇到主畫面，同時會以畫中畫形式提供一格位置畀拍攝者上鏡，而呢個格仔不單可以調校大細，而且可以切換到四角的其中一個位置，避免構圖時遮擋主體，靈活又多變，所以幫人影相時記得自己都要擺定甫士。

故事模式輯錄短片

主打玩味的N100不如專業機有齊多種曝光模式，僅分為自動、畫中畫雙重拍攝及混合自動拍攝三種，假如拍攝者怕醜唔想上鏡，可以使用自動模式作一般拍攝；而且畫中畫雙重拍攝就係上文提及的前後鏡頭同時拍攝；而最好玩係混合自動拍攝模式，前後鏡頭分別記錄按下快門前四秒及後兩秒的720p短片，幫大家拍低影相時最自然最真摯的表情。另外，屏幕上方有個書本圖案的按鍵，佢就係全新加入的故事模式，用家可根據事件、拍攝日期、人物等條件，自動篩選影像並串連為一段短片，毋須繁複的步驟，最適合家長為小朋友製作成長片段，又或者自行製作旅遊特輯。

90度反芒取景多角度

此機的對象主要是家庭和旅遊人士，它採用3吋92萬像素解控屏幕，而且能夠90度向上翻，可多角度取景，同時方便家長以低角度拍攝小朋友，設計頗有心思。作為一部生活拍攝的便攜機，當然內置了Wi-Fi及NFC功能，只要用手機跟N100一「嘟」即可快速配對，透過《Canon CameraWindow》App即可遙距拍攝及傳送影像，方便Share生活照到社交網站，之不過用App遙控拍攝就用唔到後置鏡頭，僅能夠作一般拍攝使用。