要數現時adidas Running最厲害嘅緩震技術,當然非Boost莫屬,吸震、回彈、輕巧、耐用……幾乎包攬晒所有跑鞋中底嘅技術特點,唔怪之得多位世界級嘅長跑好手,包括Dennis Kimetto、Haile Gebrselassie及Lusapho April,就連我哋香港嘅紀嘉文,都係Boost系列嘅用家。話咁快,Boost系列已經面世一年有多,係時候搞搞新意思,之前就有比賽鞋款adizero adios Boost換新色,依家輪到練習用嘅Energy Boost 2,驟眼睇,以為只係轉轉顏色了事,不過筆者以驗屍官嘅方式審視過後,發覺其實有唔少細位升咗呢喎!

adidas Energy Boost 2

Energy Boost 2 $1,199/對

除咗橙色,Energy Boost 2仲有藍色選擇,而且有齊男(右)、女(左)裝,留意兩者嘅三間條紋顏色有別,咪搞錯。

小改動逐樣數
Boost 2
鞋帶窿附近嘅物料厚度有所增加,提升耐用性,亦可稍稍加強對中足嘅支撐效果。

Powerband紋理有所不同,不過實試過後,其實貼腳效果與上一代冇乜大分別,似乎裝飾作用多於一切。

鞋舌上嘅墊位明顯厚咗,腳背唔再覺得有嘢壓住,舒服晒!

Boost

Torsion System有所延長,將前、後掌更緊密連結起嚟,藉此降低「拗柴」機會。

主要嘅觸地位置都用咗adiwear橡膠物料加固,提升抓地力與耐用性。

中底用咗全掌式Boost物料,由腳趾到腳踭都感受到緩震與回彈兼備嘅奇妙效果。

Revenge Mesh $899(女裝)

Revenge Mesh $899(男裝)

Primeknit 2.0 $1,699/對

小改動 舒服晒

adizero adios Boost以提升用家速度為大前提,Energy Boost嘅設計就傾向均衡發展,舒適性及穩定性都同樣重視,首先Energy Boost 2嘅Torsion System比上一代就有所延長,藉此再度減少足踝扭傷嘅機會。除此之外,鞋身兩側三間商標位置,上一代已經設計成「外甲」咁款,喺薄身、柔軟嘅Techfit鞋面外,左、右鎖緊中足區域;Energy Boost 2沿用呢個好設計之餘,鞋帶窿附近嘅物料仲稍稍加厚,增加耐用性。筆者最鍾意嘅改動,係鞋舌嘅墊位明顯厚咗,因為Energy Boost或Energy Boost 2,鞋面都係偏薄,索緊鞋帶之後,鞋舌位置畀鞋帶壓住,就會對腳背構成一定壓力;不過Energy Boost 2就以「加Pad」呢招解決問題,着得舒服咗,自然冇咁易疲累。

吸震強 回彈快

至於中底嘅Boost設計,大致沿用上一代嘅規格,即係全掌式擺位之餘,亦係整個Boost系列之中最厚身嘅,緩震能力亦係最高。筆者好多同事第一眼見到Boost中底,都有所誤解︰「發泡膠都可以做波鞋?」咪玩啦,雖然賣相相似,但其實係截然不同嘅兩種物料,Boost係adidas與全球頂尖嘅化工企業BASF,用咗好長時間先至共同研發成功嘅粒狀固體物料TPU,當佢膨脹後會轉化為多個細小嘅能量膠囊,既可吸收觸地時嘅壓力,發揮緩震作用,更難得係提步離地時,就會將壓力轉化為能量釋放出嚟,做到傳統緩震物料欠缺嘅回彈效果,從而提升加速反應,以及減少能量消耗,以後大家見到Boost系列產品,咪好似筆者嘅部分同事咁大鄉里喇!

入門之選Revenge Mesh

大可視為Boost分支嘅入門版,價錢較為親民,前、後掌嘅重點位置都用咗Boost,不過藏於EVA中底之內,並非Energy Boost或adizero adios Boost咁樣用咗全掌式外露設計。鞋身設計就傾向傳統嘅跑鞋布局,構造複雜咗啲,不過透氣效果依然出色。

Primeknit 2.0內斂變色

去年年尾推出嘅Primeknit 2.0,有黃、白、藍、綠、紅及粉紅六種顏色選擇,若然你嫌太過鮮艷,唔襯閣下嘅風格的話,今期就新增灰色及黑色兩款,再冇投訴啦!功能設計方面,最大特色當然係透過電腦編織技術製成嘅一幅過織物鞋面,無縫之餘又超輕,挺身程度仲比第一代高,踭位嘅保護能力尤為明顯。至於中底前、後掌分別選用adiPRENE+及adiPRENE,共同發揮緩震作用,兩者之間就以Torsion System連結,加上外底嘅前掌區加咗比賽鞋常見嘅石墨膠粒,達到輕量化及高抓地力並重嘅雙重效果。

查詢:2789 8198(旺角豉油街adida Megastore)、2730 0157(尖沙咀漢口道adidas旗艦店)