LG L Series III入門KitKat雙星

以前買Android入門手機，作業系統通常都慢半拍，等升級更遙遙無期！今次LG夠晒誠意，啱啱新返嘅L Series III系列L70、L90 Dual兩部入門新作已內置最新的Android 4.4 KitKat作業系統，唔少旗艦機恨都恨唔到！最正係KitKat佔用系統資源較少，就算機能弱些少都照樣超爽快；加上仲有IPS靚芒、800萬像素鏡頭等實用規格，好抵玩！

L90 Dual機背殼加入凹凸細紋，唔跣手，不過都幾易藏污。

L90 Dual用上金屬窄邊框，設計大路又襟睇。 $1,998

電池容量達2,540mAh，亦可拆殼換電。

雙卡採用傳統大SIM，可惜要拆電先換到卡，嫌略不便。

Knock Code將屏幕虛擬劃分為四格，只要敲番預設嘅次數及位置就可為手機解鎖。

「LG Backup」可以一次過將個人資料、Apps、媒體內容等備份，換機、洗機就唔使為備份而煩惱。

支援「訪客模式」，用家可自訂專屬頁面，只開放指定Apps，畀小朋友玩最好不過。

支援QSlide飄浮視窗，可同時開啟兩個程式，亦可調校視窗大細及透明度。

LG幫成個系列推出Quick Window保護套，可於套上的窗口位睇來電、音樂等資訊。各$348

L70設計與L90 Dual相似，不過就用上較細嘅4.5吋屏幕。 $1,498

靚絕IPS芒

此一新系列早前已於MWC 2014登場，而今次到港就只有L90 Dual同L70，L40就暫時未有。外觀上，兩機都用上大路直板圓角設計，屏幕兩側邊框窄，配合滿布凹凸細紋的機背，手感都算唔錯。L90 Dual及L70最大分別就在於前者備有4.7吋屏幕，而後者則係4.5吋屏幕；值得一讚是兩芒同樣採用IPS素材，色水鮮艷之餘，可視角、對比度都相當高，比起一般入門機高質，顯示效果超班。

爽行Android 4.4

Android發布Android 4.4作業系統時，話明要大幅減少所佔用嘅系統資源，令入門機都一樣運作得順暢。今次L90 Dual、L70可以話係示範作，睇規格，兩機分別採用入門級Snapdragon 400四核心及Snapdragon 200雙核心 1.2GHz處理器，亦只得1GB RAM，不過實際運作時，換頁、開Apps反應都勁快，完全冇延緩或者Lag機；再檢視「工作管理員」，發現於一般情況下都保持到近450MB可用RAM，系統冇咁「大食」，操作自然流暢啲。

照玩敲芒

呢兩部新機改用自家介面，所以Android 4.4新版本嘅狀態欄、撥號介面都搵唔到。咪以為咁就冇新功能，原來LG特意將近期大熱嘅敲芒功能移植咗過嚟，包括Knock On功能，用家只要於屏幕連敲兩下就可以開啟或者關閉屏幕；仲有新引入嘅Knock Code，用家敲出預設的敲芒次數及位置就可以為屏幕解鎖，十分實用！順帶一提，L90到港版本備有雙卡雙待功能，雖然只支援單通，SIM A通話時SIM B接唔到電話，不過兩個卡槽都兼容3G網絡，上網更加靈活。要讚係機面右下方有雙卡按鍵，一按就可更換主卡，長按約兩秒就會進入「雙智能卡」進行雙卡設定，相當方便。