一掃全景所拍攝的全景相,嚴格來說唔可以稱為全景,影得個天又影唔到個地,始終唔夠全面。想玩真正的全景相,就要靠Ricoh全新推出的Theta全方位相機,佢能夠影到360°球形全景相,上下左右前後景物都覆蓋得到,而且絕無死角,一大班人合照包無甩漏,影完仲可以碌住嚟睇相,兼能夠上載到社交網站,齊齊碌齊齊睇。

$4,590

若然大家想掛在頸上隨時拍攝,可買相機帶扣環座和頸帶等配件。(推出日期及售價待定)

《Ricoh Theta》手機App備有遙控拍攝功能,而且iOS版更可以調校曝光補償,設定畫面的光暗。

透過App瀏覽相片可以縮小為一個球形,又或放大畫面仔細觀看,甚至能夠旋轉畫面盡覽每一個角落。

上載到社交網站的相片,只要Click入去就會連上Ricoh Theta專屬網站,一樣可以任碌任睇球形全景相。

機身的設計簡約,旁邊備有開關和Wi-Fi鍵,當Wi-Fi連接後會由紅燈轉為藍燈。

Theta的機身前後各有一支180°魚眼鏡頭,兩者的影像會合併成為360°的球形全景相片。

底部設有micro USB叉電,還有腳架孔以供安裝上腳架拍攝。

厚度尚算纖薄,大約跟一毫子硬幣相若,只是鏡頭部分略為增加厚度。

球形全景App 《Photosynth》

前後180°雙鏡頭

雖然Theta的直身外觀有別於一般相機的外形設計,但卻不折不扣係部相機,仲有兩支鏡頭咁多,分別在機身前後各配置一支180°魚眼鏡頭,只要按一下快門,相機就會自動將前後兩個影像合成,加埋就剛剛好影到360°球形全景相片,能夠拍攝四周環境的景物,幾乎毫無死角,最重要是影像的接合位相當完美,啱晒一大班人自拍或者拍攝廣闊的環境。再者,Theta支援ISO 100至 1,600的自動感光度,以及1/7.5s至1/8000s的快門速度,無論早上夜晚抑或室內外都能夠盡情拍攝到球形全景相。

95g輕身重量

外形簡約的Theta機身上只有三粒按鍵,包括快門、開關和Wi-Fi掣,而底部就有micro USB供叉電,以及腳架孔以便安裝腳架。此外,相機提供4GB內存,並不設記憶槽,但已能夠拍攝大約1,200張相片,無論去旅行、婚禮、開Party都大派用場。最重要是Theta機身輕巧便攜,淨重只有95g,就算女仔單手拍攝都唔成問題,廠方仲特別推出五種顏色的相機帶扣環座及頸帶,方便掛頸之餘亦可為機身添色彩,不過相機帶扣環座和頸帶都要另外購買。

專用App好玩好用

Theta本身內置Wi-Fi功能,透過手機App《Ricoh Theta》能夠當遙控拍攝,而iOS版本仲可以調校曝光補償,想光啲又或者暗啲皆由你話事;而Android版本可透過GPS記錄拍攝地點。利用App影完張相立即有得睇,最過癮係張相能夠畀大家縮放,兼上下左右旋轉任你碌,畀你睇清楚360°四周環境。咁好玩一定要同朋友分享,所以App能夠把影像Share到Facebook、Twitter等社交網站,當你班朋友Click張相,就會自動跳到專屬網站,等佢哋唔使裝App都可以碌住睇相。

球形全景App 《Photosynth》

想玩球形全景其實仲有其他選擇,大家可以下載手機App《Photosynth》,一樣玩到球形全景,其原理是將四周環境拍攝多張相片疊加合成,之不過拍攝步驟相當花時間,而且環境光差有變化,合成出來的相片會有瑕疵,但勝在免費下載,不妨一試。

費用:全免

支援系統:iOS

查詢:2926 2300