APPS
《Hurry Bird》
靠篤芒令雀仔飛起，仲要避過重重障礙，難度絕對唔低。
一撞柱就會Game Over，想攞高分，最緊要掌握到篤芒節奏。
《LINE Rangers》
每個角色嘅攻擊特性都唔同，好似圖中嘅熊大擅長近攻，不過血量就相對比較低。
玩家可以自組團隊出戰，最多有五個角色。
《Animoto Video Maker》
揀完特效之後仲可以預覽作品，跟手就直接Share去Facebook。
內置多達50種影片特效，仲有埋背景音樂，又識同相片做Pan鏡效果，製作認真。
《MyScript Calculator》
複雜算式都計得掂，而且辨認筆迹夠準、運算又快。
唔只一般計算，就連簡單嘅方程式都應付得到。
《Top Gear：Race The Stig》
玩法簡單，上下左右Drag就可以避過障礙物，最重要係攞比賽途中出現嘅Coins。
有Coins就可以將部車升級，變做戰機加速都仲得，夠誇張！
《Football Touch Story》
2D畫面起晒格，不過勝在節奏快，頗有趣味。
玩家可以自己組隊，整唔整得齊成隊明星隊，就睇你功力了。
《Hurry Bird》青出於藍
玩過《Flappy Birds》嘅朋友，冇乜邊個唔上癮，可惜此App早前無端端下架，搞到好多人想玩都冇得玩。其實坊間都有唔少玩法類似嘅Apps，好似新上架嘅《Hurry Bird》，照舊靠篤芒令雀仔向上飛，從而避過障礙物，玩法簡單得嚟亦好易上癮，而且比起《Flappy Birds》嘅8-Bit低清畫面，此遊戲無論係介面、場景以至雀仔嘅設計都精緻得多。
下載費用：$8（iOS）、免費（Android）
平台：iOS 4.3、Android 2.2
《LINE Rangers》熊大玩塔防
《LINE》入面嘅角色好似熊大、饅頭人、詹姆士個個都超級Kawaii，有冇諗過佢哋會化身成為勇士呢？《LINE Rangers》係一個塔防遊戲，除咗攻擊敵方陣營，仲要好好守住自己嘅堡壘，最過癮係角色嘅攻擊招數勁得意，好似熊大會拎住魚網、饅頭人就用飛腿等，玩家仲可以透過戰鬥攞到其他角色，以及金幣等道具，又能夠靠合成將角色升級，以及召喚其他LINE嘅朋友「幫拖」，玩法超多元化。
下載費用：免費
平台：iOS 5.0、Android 2.3
《Animoto Video Maker》特效短片
每次旅行完，都會影落一大批短片同相片，想將佢哋剪輯得整齊有序，留個美好回憶的話，就一定要試下《Animoto Video Maker》。用家可以將總共12段短片或相片組合起嚟，而且程式已經內置多達50種影片特效及背景音樂畀你揀，簡單幾十秒就可以剪輯成功，效果夠Moody之外，仲可以直接上載到Facebook同朋友分享。
下載費用：免費
平台：iOS 7.0、Android 2.2
《MyScript Calculator》手寫計數
遇到複雜嘅數學算式，有時計數機都未必幫到手，好彩有《MyScript Calculator》幫你解困，佢用法超簡單，只需將數式寫上畫面，電腦就會自動辨認手寫筆迹兼計埋答案畀你睇，而且唔只一般嘅加減乘除，就連cos、sin、tan、acos、asin、atan、ln、log等算式都搞得掂，不單係筆者呢啲「數學白癡」嘅好幫手，仲係學生哥做功課嘅啞老師。
下載費用：免費
平台：iOS 7.0、Android
《Top Gear：Race The Stig》怪車任揸
《Top Gear》係BBC電視台嘅王牌汽車節目，最近仲踩入去遊戲界！呢款新Game有別於一般賽車遊戲，玩家除咗要同神秘車手Stig鬥快外，亦要喺比賽盡力攞Coins，皆因Coins可以幫部車升級之餘，仲可以換車，至於車款並唔係高性能名車，而係主持人喺節目入面揸過嘅怪車，超特別！
下載費用：免費
平台：iOS 6.0、Android 2.3
《Football Touch Story》搞鬼球賽
足球Game不外乎鬥畫面及鬥逼真，不過玩法亦都愈趨複雜；唔想咁費神，只係想簡簡單單消磨時間的話，不妨試吓《Football Touch Story》。坦白講，8-Bit、2D嘅低清畫面係有啲Out，不過勝在操控超簡單，只需控制左右，篤吓隊員就傳到波，一Drag就係射波，最正係比賽五打五，限時三分鐘，冇犯規、出界、越位，節奏超快，啱晒搭車玩。雖然介面簡單，不過都可以買人組隊，仲有伊巴謙莫域、列貝利等球星畀你用，都幾襟玩。
下載費用：免費
平台：iOS 4.3、Android 2.2
