主角性格唔算突出、敵人又冇睇頭、劇情鋪排亦沉悶，平成年代嘅《高達新世紀Gundam X》，收視自然慘淡，播到39集就被腰斬，唯一仲保持到水準嘅，就係主角機Gundam X嘅機械設定依然有型有款，仲有靠月光出招嘅Satellite Cannon，幾強嘅敵人都被一炮KO，屈機之餘都咪話冇新意。可惜受劇集人氣低所累，1/100嘅Gundam X模型，除咗N咁多年前嘅HG版本後，一直都冇影，終於等到今年先至喺MG系列回歸，全新設計唔在講，仲可以輕鬆扭出炮管，重現Satellite Cannon嘅發射甫士，超Easy！

MG 1/100 GX-9900 Gundam X
建議零售價：¥3,800

孭住咁大組Satellite Cannon，背脊負重之大可想而知，猶幸模型嘅重心分布都算唔錯，唔用地台都依然企得穩。

Shoulder Vulcan可以轉上膊頭，變成發射狀態，又唔會阻住高達頭上嘅V形天線。

膊頭、小腿、腰甲，以及圖中嘅前臂都換上透明紫組件，令整體造型更有未來氣息。

除咗吸收月光嚟補充能源外，喺Hovering Mode加速航行形態之下，能量儲存板亦可打開。

Shield Buster Rifle有兩種形態，可槍可盾，攻守合一。

炮身尾部可以變成大型Beam Sword，劍刃部分就用螢光綠組件表達。

Gundam X Divider係Gundam X嘅強化版本，主體保持原狀，不過武器有別，廠方會唔會喺Premium Bandai網站推出相關嘅限定版本呢？

透明件加強Cyber Feel

講高度，Gundam X介乎UC年代與實施小型化計劃之後嘅Gundam F91之間，根據大河原邦男嘅當年設計，只係話肩甲、前臂、小腿及腰間部分裝甲用咗深紫色，HG版本亦都以此為據開模，今次升格為MG，當然唔可以倒模了事，以上位置統統改用透明紫色組件，加埋胸口中央嘅能量接收部分用咗透明綠，成部機體當堂Cyber晒！至於組裝過程相當簡單，以白色為主嘅組件，採用前後夾件設計，水口瑕疵已經被收埋到八九成，素組玩家毋須再做後期執漏工夫，已經整得靚靚仔仔。

超有型閃令令聚光板

當年仲有追呢齣動畫嘅死忠派粉絲，相信每集都只係等Satellite Cannon呢一招，MG版本就唯美重現呢一幕。背包以L形方式收起成支Satellite Cannon，出招時只需將炮管由背包拉到膊頭位，再打開四塊能量聚光板，最後拉出埋炮管前端及把手就大功告成；聚光板以銀色反光卡紙套上蜂巢透明蓋組成，喺強光下折射出彩虹色，再度加強Gundam X嘅科幻效果，而且炮管尾部可以拔出劍柄，將Gundam X由炮擊戰切換成格鬥戰模樣，不過要小心轉出炮身嘅榫位比較單薄，有網友仲留言因為用錯力而整斷咗，各位仲未開工嘅模型同好，切記小心翼翼為上。至於槍盾合一嘅Shield Buster Rifle亦都好玩，將槍身兩側向上揭起，繼而縮短槍管，就可變成盾牌形態。

查詢：2433 1828（瑞華行）