正所謂「一膽二力三功夫」，做人又好、踢波都好，個人技術固然重要，不過鬥心就更為關鍵，C朗拿度可以話係最佳人辦，唔只好波、靚仔，而且每次落場都拚命三郎上身，踢皇馬順風順水時如是，就算轉到國家隊賽事，論牌面葡萄牙點都唔算奪冠大熱，不過C朗依然場場爆Seed，熱血程度唔到你唔服，連帶令葡萄牙喺香港都積落唔少人氣、大把粉絲。至於全新嘅葡萄牙主場球衣已經上架，今次Nike又有乜嘢新招，幫呢隊有C朗在陣嘅星級黑馬打造新形象？

唔使審，身穿7號球衣嘅C朗當然係成隊葡萄牙嘅靈魂人物，喺2006及2010嘅世界盃都有份入選上陣，分別攞到殿軍及進身16強，今屆又會否行得更遠呢？

葡萄牙主場球衣 $539（球迷版）

今年係葡萄牙足總成立100周年，隊徽特別加上1914及2014嘅紀念字樣。

領位內裡嘅三角旗，象徵意義與國旗不相伯仲，旗幟大央係代表葡國航海成就嘅渾天儀。

袖口內層用上綠色設計，球迷大可反摺出嚟，特立獨行一番。

AJ 5LAB3 $1,699 （本月29日開售）

AJ 3最馳名嘅象皮紋及外露式Air，變成Crossover版本都依然跟足。

鞋尾嘅Jumpman Logo連Air字樣改用凸印表達，加強外形上嘅未來氣息。

新版本以「LAB」為名，鞋舌背後壓印嘅專屬字樣，似足化學元素嘅名稱排列。

除咗反光鞋面，連外底都換埋透明底，成對鞋都充滿Cyber Feel。

C朗嘅球風以快見稱，而葡萄牙嘅戰術亦以快速突擊為主，本月初大勝喀麥隆五比一嘅友誼賽，就係最新鮮、最有力嘅示範。喺呢場波首度披上嘅新主場球衣，沿用棗紅色為主、綠色為輔嘅傳統設計，不過衫身加咗好多橫間，顏色深淺有別，而且橫間隔距不一，設計成漸變模樣，令新波衫外觀多添一份速度感。

百周年賀禮

另一方面，原來今年係葡萄牙足總成立100周年，新球衣自然加入相應嘅慶祝細節，例如心口嘅隊徽底部兩邊，分別加上「1914」與「2014」字樣，大有繼往開來、承先啟後嘅意味；仲有領位內裡印咗一面紅、綠雙色嘅三角旗，旗幟中央有一個渾天儀圖案。歷史上，葡萄牙一度係航海大國，而渾天儀正係航海必備工具，喺呢面象徵意義有如國旗嘅三角旗內，加入代表國家成就嘅渾天儀，似在激勵國家隊成員要全力以赴，為國再寫光輝歷史，正如C朗本人對新球衣嘅評價︰「設計細節處處體現咗對葡萄牙文化歷史嘅尊敬……每當我着起國家隊波衫，自豪感油然而生。」祝願「葡萄牙號」喺C朗船長嘅帶領下，喺今屆世界盃乘風起航，駛向勝利。

查詢：2388 3348（旺角花園街Nike Football）

反光王AJ 5LAB3

象皮紋與反光鞋舌，都係Air Jordan深入民心嘅特有筆觸，兩者分別首次應用於AJ 3及AJ 5身上，早前Jordan Brand就將兩者Crossover，喺AJ 5嘅鞋面畫滿AJ 3嘅象皮紋變成AJ 3LAB5，結果全城熱搶；最近Jordan Brand逆向變招，以AJ 3為本體，加入AJ 5嘅反光元素，不過並非鞋舌反光了事，而係由頭到尾整個鞋面都塗上反光物料，食正今期大熱嘅Reflective潮流，咁招搖，搶鏡指數一定高過AJ 3LAB5！雖然暫時仲未知銷售單位會如何開售，不過睇怕數量唔會多得去邊，況且AJ 3LAB5嘅瘋搶程度已經有辦你睇，鞋迷要密切留意Jordan Brand Hong Kong嘅facebook專頁了。

查詢：2528 0391（灣仔莊士敦道Jordan Brand Store）