每年2月左右於西班牙舉行嘅Mobile World Congress可以話係手機界大事，大廠都會趁機展出新產品。今年都唔例外，LG、Sony、Samsung等廠商都齊齊推出大作，硬件強之餘，仲有唔少Gimmick新功能，賣點十足。而部分新機仲話咁快已經嚟到香港，今期就等小記率先幫大家網羅一眾機王，想換機嘅朋友一定要睇實喇！

LG G Pro 2

新增Mini View，喺屏幕底嘅虛擬功能鍵向左或向右一掃，成個畫面就會縮小到3.4吋至4.7吋，單手操作就更容易。

電池容量達3,200mAh，而且唔似得港版G2玩一體成型，G Pro 2採用可換電設計，高用量嘅用家必Like！

「Magic Focus」可以先影相、後揀對焦，選擇由微距至無限遠等五個焦點，玩味十足。

Knock Code喺唔着芒待機嘅時候都用得到，可以直接解鎖兼開機，比平時先着芒、後解鎖慳一個步驟。

Sony Xperia Z2
屏幕同樣採用TRILUMINOS Display for Mobile技術及X­Reality for Mobile影像處理器，不過就新增Live Colour LED技術，令到顯示色彩更豐富。

AR效果連拍片都用到，整套《侏羅紀公園》都得！

嫌內置咪收音唔夠好，仲可以另購外置式立體聲收音咪STM10，外形夠專業之餘，仲令收音更集中，錄音質素大幅提升。（售價待定）

機身採用Omni Balance設計，機身上下左右都玩平衡，手感一流。

講配件就唔少得呢款SmartBand智能手帶，內置感應器，再配合程式《Lifelog》，可以記錄用家步行、跑步、睡眠的活動數據，亦有提示來電及訊息等功能。最正就係可以另配錶帶，當Accessory都唔失禮。（售價待定）

Samsung GALAXY S5
機身設計驚喜一般，不過手感都算唔錯。

鏡頭提升至1,600萬像素，而且支援全球最快0.3秒自動對焦。

今次同新機一齊推出嘅仲有Gear Fit智能手錶，採用1.84吋的曲面Super AMOLED屏幕，支援防水功能同埋心率感應器，拎去做運動就啱晒。

改用了全新介面，Icon全部變做平面化設計。

《S Health 3.0》會記錄低健康、運動等數據，關注健康嘅朋友必用。

指紋識別器位於屏幕底及Home鍵之間，首次認證需要掃描8次，不過指紋辨識都幾準確。

香港資訊科技商會榮譽會長Francis

All New HTC One

Nokia X系列

Choice A：LG G Pro 2旗艦大芒

LG上年靠G2成功翻身，唔少用家都大讚好用；今年新機王就由G Pro 2接棒！此機其實2月尾已經喺南韓開賣，而行貨據講今個禮拜尾都會正式在本地賣街，絕對可以搶飲頭啖湯！論外形，G Pro其實驚喜不大，皆因外形幾乎倒模G2，不過勝在用上3.3mm超窄邊框，令到新機雖然屏幕有5.9吋大，但機身唔算好闊，單手手持都唔會太辛苦。而機背當然繼續有招牌Rear Key背鍵，照舊可以控制開關、音量，今勻同G Flex一樣喺開關鍵加入LED燈，收到通知訊息就會着燈，用後鏡頭自拍亦會轉換燈號顏色提你有冇對焦成功，夠晒實用。

敲芒解鎖

而今次新機嘅最大賣點就係全新嘅Knock Code功能，查實係將敲芒動作變為解鎖方式，屏幕會虛擬劃分為四格，只要用家敲番預先設定嘅位置及順序就解到鎖，最少敲2次、最多敲8次，用法創新。咪以為敲芒解鎖好兒戲，據廠商表示，Kncok Code密碼可以有成86,367個組合，隨時仲安全過用密碼！而硬件就同其他旗艦機睇齊，搭載Qualcomm Snapdragon 800四核心處理器以及3GB RAM，不過內存就由韓版嘅32GB縮減至16GB，好在可以外加最大64GB記憶卡，容量夠晒用啦！而其1,300萬像素鏡頭都唔嘢小，既支援OIS光學防手震以及4K短片拍攝，更加入名為「Magic Focus」功能，大家可以先影相、後揀對焦，想點玩景深都冇問題，過癮！值得一提，韓版其實有黑、白、灰三種配色，而港版暫時就將灰色改為較新鮮嘅酒紅色，實物唔算太花俏，男女都啱用。

SPEC

制式：GSM、WCDMA、LTE

處理器：2.3GHz四核心

記憶體：3GB RAM、16GB內存、支援64GB microSD卡

屏幕：5.9吋（1,920 × 1,080解像度）

鏡頭：1,300萬像素（後置）

對外連接：藍芽4.0、microUSB、WiFi、NFC

電池容量：3,200mAh

作業系統：Android 4.4

體積：157.9 × 81.9 × 8.3mm

重量：172g

售價：$5,698

查詢：3543 7777

Choice B：Sony Xperia Z2日系強攝

原本預計3月賣街，不過據講因為貨期問題而要稍稍延期至4月，講緊嘅就係Xperia Z2。一如唔少日系手機，Xperia Z2繼續主力賣靚樣及強攝。機身繼承廠商最鍾意嘅Omni Balance平衡設計，機面、機背都同樣用上強化玻璃，配合機側圓角金屬開關鍵、實體快門鍵以及黑、白、紫三種配色，睇落似足舊作Xperia Z1。查實新機嘅全高清屏幕由上代5吋增至5.2吋，但機身除咗長咗少少之外，厚度、闊度、重量都成功「收身」，比上代輕巧得多。最重要係全高清屏幕加入咗新技術Live Colour LED，令屏幕可視角更高、對比更鮮明之外，仲識得顯示人面膚色嘅時候保持原色而唔會過紅，顯示效果有明顯進步。

玩味拍片

而攝影功能可以話係新機嘅強項，因為新機的鏡頭採用1/2.3吋、2,000萬像素Exmor RS for Mobile感光元件，配合「進階智合拍模式」，Snapshots都可以有超高質素。

拍片方面，Xperia Z2則可以拍攝出解像度達到3,840 × 2,160、每秒30格的高質素4K影片，試拍後發現比起一般1080p影片，色彩更豐富，層次亦分明得多，就算掟上4K電視上重播都夠撐。玩高質之餘，鬥玩味都唔輸蝕，皆因將原屬影相嘅「AR效果」移植到拍片，拍片亦可以結合恐龍、童話、蜘蛛俠等虛擬卡通場景，得意到暈；另外仲有「Timeshift影片」，可以將120fps的影片局部片段玩超慢動作，影動態畫面又多樣Gimmick玩！規格方面，Xperia Z2搭載最新嘅Qualcomm Snapdragon 801四核心處理器，RAM亦增至3GB，操作、播高清片都好流暢。不得不提是，新機依然支援IP55/IP58防水標準，喺1.5米水深都可以正常使用30分鐘，倒瀉水都不怕弄壞機！

SPEC

制式︰GSM、WCDMA、LTE

處理器︰2.3GHz四核心

記憶體︰3GB RAM、16GB內存、支援64GB microSD卡

屏幕︰5.2吋（1,920 × 1,080解像度）

鏡頭︰2,070萬像素

其他︰藍芽4.0、microUSB、Wi­Fi、NFC、IP55/IP58防水防塵

電池容量︰3,200mAh

作業系統︰Android 4.4

體積︰146.8 × 73.3 × 8.2mm

重量︰158g

推出日期及售價待定

查詢：8203 8863

Choice C：Samsung GALAXY S5首見防水

香港向來有不少Samsung手機嘅粉絲，如果你都係其中一員嘅話，咁就一定要留意4月全球開售嘅GALAXY S5。睇新機嘅正面確實未見特別，照舊玩直身圓角設計，全高清Super AMOLED屏幕就輕輕加大到5.1吋；而特別在於機背，加入類似波點嘅細紋，摸上手仲有啲似皮革；新機仲有多種特別配色，包括炭黑、閃亮白、電子藍和今期至流行嘅銅金色。值得留意係GALAXY S5仲支援IP67防水認證，同經常玩防水嘅日系手機睇齊。

貼心新功能

而新機今次主打嘅仲有超人性化嘅功能，首先係於屏幕底及Home鍵之間位置加入指紋識別器，可以一掃解鎖之外，仲可以將私密相片、影片放入「Private Mode」，需要指紋先可以將相關檔案「解封」；而且亦可以應用於喺網上購物時作付款認證之用，保安度即時大大提升。另外機背鏡頭下就加入咗心率感應器，配合《S Health 3.0》程式，就可以隨時監測用家心跳等身體狀況，功能超貼心！規格上，新機就將會用上Snapdragon 801處理器，時脈仲高達2.5GHz，配合2GB RAM 記憶體，操作自然流暢。唯一美中不足是電池容量僅得2,800mAh，未必夠用一日；不過廠商又加入一個名為「Ultra Power Saving Mode」，手機會即時將介面轉為黑白，據講10%電都撐到一日，又幾實用喎！

SPEC

制式︰GSM、WCDMA、LTE

處理器︰2.5GHz四核心

記憶體︰2GB RAM、16/32GB內存、支援microSD卡

屏幕︰5.1吋（1,920 × 1,080解像度）

鏡頭︰1,600萬像素

對外連接︰藍芽4.0、microUSB、Wi-Fi、NFC

電池容量︰2,800mAh

作業系統︰Android 4.4

體積︰142 × 72.5 × 8.1mm

重量︰145g

推出日期及售價待定

查詢：3698 4698

達人點睇

香港資訊科技商會榮譽會長Francis：「實用周邊功能最重要！其實依家Smartphone 嘅Spec已經去到鬥無可鬥嘅階段，硬件即使再有提升，使用體驗、感覺其實分別都不會太大。所以買機反而會着重實用嘅Side Feature，就以GALAXY S5為例，我就最Buy指紋辨識器同埋『Ultra Power Saving Mode』，前者令解鎖時唔使來去，一掃就搞掂；後者就令電池續航力大幅提升，肯定方便到用家！」

其他焦點新機

以上幾部新機唔啱口味的話，其實都仲有唔少期待大作即將推出，即睇！

All New HTC One 特色雙鏡

HTC本月25日就會喺紐約發布新機，不過新機未推出之前，網上就已經有勁多似層層嘅消息。據講新機將會Snapdragon 801 2.3GHz四核心處理器、5吋全高清屏幕，而且內置32GB記憶體之餘，仲可以外加microSD卡擴充容量。最大特點是機背將設有Ultra Pixel雙鏡頭及雙色溫閃燈，相信可以令低光拍攝嘅相片質素提升，令人期待。

Nokia X系列 變種Android

手機老大哥Nokia都有新作，雖然不屬旗艦之列，不過最大驚喜就係新系列竟然採用Android作業系統。新系列分別是XL、X+及X，其中XL屏幕最大，達5吋。可惜Nokia將介面改為類近Windows Phone 嘅格仔款式，而且仲冇晒大家用開嘅Google Services，用家未必慣。值得一讚就係機價超平， XL預計只售109歐元（約HK$1,160），而且支援雙卡功能，明顯主打入門市場；加上有Nokia呢個大名，相信仍有唔少粉絲撐場啦！