人係矛盾嘅動物，當大家都覺得Super Hero電影嘅頻密程度已經去到疲勞轟炸階段時，偏偏又會愈鬧愈想睇，尤其是睇過《Captain America︰The First Avenger》及《The Avengers》嘅朋友，唔通你會Skip咗四月三日上畫嘅《Captain America︰The Winter Soldier》（簡稱《CA2》）咩？藉Super Hero電影熱潮而上晒位嘅Hot Toys，之前已經出過四款Captain America，今次《CA2》當然都唔可以畀佢停，啱啱就發表咗第五款嘅Golden Age Version，官網仲Highlight係「Exclusive Version」，收訂期只係去到本周日，誓要令CA粉絲欲罷不能。

圖中所見仍屬試辦原型，與最後完成品或有若干分別。

戰鬥服唔只喺用料及製作上有明顯改進，而且喺細節上加埋舊化塗裝，令整體外觀更有臨場效果。

頭雕方面由韓國高手So Young Lee及Young Kyum Kim操刀，塗裝交由HT嘅製作總監JC. Hong負責，就官圖所見，表情入型入格。

整套戰鬥服都係重新製作，肩膊及腰位有精細嘅凹凸紋理外，心口嘅五角星仲髹咗金屬色。

圓盾造型依舊，不過用料由膠件變成合金，加埋電鍍塗裝，金屬感之強冠絕以往咁多款作品。

戰鬥服痛改前非

心水清嘅超級粉絲，相信已經喺Trailer見到《CA2》嘅Captain America有兩款戰鬥造型，其中一款係全藍色戰衣，傾向現代化嘅新設計；另一款就玩復古風，與第一集嘅制服有七、八成相似。先嚟少少劇透，原來Captain America與The Winter Soldier喺《CA2》大戰嗰一場，就係着住由第一集二戰造型改造而成嘅Golden Age戰鬥服，HT嘅Golden Age Version就以此作為參考藍本。似還似，不過以HT嘅作風，當然唔會改少少就算，今次嘅頭雕、素體，以至戰鬥服都係由零開始重新製作，當中以戰鬥服最考工夫，吸收咗第一集衫身臃腫，而且影響到素體可動性嘅問題，今次除咗用料及剪裁上都有大改進，做到修腰效果外，仲喺活動位置上改用韌性特別高嘅PU合成皮料，令關節擺動唔再被衣料扯住。除此之外，HT表示膊頭及腰間嘅幼細間紋係以機械壓製而成，花咗好多心機先做到厚薄一致、間距平均，玩家記緊要落足眼力了。

合金盾開發成功

至於配件方面，Golden Age Version實在唔多，專用地台固然係指定動作，其他就有九款造型手掌，以及唯一嘅武器大圓盾。就官圖所見，大圓盾嘅賣相同以往作品似乎冇大分別，不過絕非舊物循環再用，實情係首次嘅合金版本，HT解畫說︰「早喺第一集時，我哋已經想做合金盾，眼利嘅粉絲睇戲時應該會留意到，圓盾表面並非完全平滑，而係有好多微細嘅圓形紋理，可惜當時我哋仲未有能力用合金做出呢種效果，所以只好喺膠件表面加強電鍍塗裝效果，模擬金屬質感。今趟我哋終於解決到合金製作嘅問題，所以Golden Age Version改用合金盾，至於電鍍塗裝依然做到足，藉此做出比以前更加強嘅金屬質感。」不過咁做會唔會令圓盾重量大增，令Figure變成「不舉」？HT就派定心丸，表示用料雖然有變，不過厚度有嚴格限制，唔會令重量有太大增幅，而且正如上文所提，由於衣料嘅拉扯度強咗，可以承受到更大嘅活動幅度外，最重要係新素體嘅關節受力程度都有所改善，令玩家可以放心擺到各種招牌式嘅舉盾甫士。講到咁仔細，相信可以掃除大家入貨前嘅所有疑慮啦！

預售方法

收訂日期：即日至本月23日

派貨日期：今年第二至第三季

銷售對象：只限Secret Base會員或Toy Hunters VIP

售價：$1,280

地點：旺角彌敦道信和中心20樓Secret Base

營業時間：1:00pm-9:00pm

facebook專頁：www.facebook.com/hottoyssecretbase

查詢：3722 3988