慳家要及時Mazda5

環保車新條例下個月實施，唔少依家仲有環保稅務優惠嘅車款，都趁改例前加強宣傳攻勢，萬事得（Mazda）的新版Mazda5 SKYACTIV-G 2.0 Deluxe就是一分子，佢嘅2.0L SKYACTIV直四引擎用咗i-stop引擎怠速自動熄火裝置，壓縮比高達12.0:1，平均耗油量可低至15.7km/L，油費計落$1.1/km左右，車價連油費，雙重慳家。

簡簡單單就可放平中、後排座椅，變成大片置物平台。

獨有嘅Karakuri 6+1座椅設計，中排可作多段調校。

2.0L引擎受惠於SKYACTIV環保技術，平均秏油量僅15.7km/L。

新增LED日間行車燈，配合利落嘅頭燈罩造型，有型有款。

遙控雙電趟門加埋低地台，出入車廂分外Easy。

座椅布局靈活多變

Deluxe屬於同系嘅頂級版本，用咗新款LED日間行車燈、17"合金輪圈、電動天窗，以及遙控雙電趟門等高規格設備，據知稍後代理仲會將皮革座椅都列入標準清單之內，咁就分外有睇頭啦！至於Mazda5一向標榜嘅Karakuri 6+1座椅布局，令乘客可按實際需要，獨立或者一併收起中、後兩排座椅，靈活改變載客與置物比例，而且中排座椅又有多種變化，只要幾個簡單步驟，就可以變成獨立座椅或者大梳化，後者就可實現全車七座位布局，而且有151ps馬力支持，滿載之下依然有心有力，上斜冇投訴。