《龍珠》、《Hunter》、《幽遊白書》，大家細路仔時成日煲；《暗殺教室》、《偽戀》、《惡魔奶爸》，家陣大家又有冇追？查實佢哋統統都喺日本集英社《周刊少年Jump》連載。呢本孕育唔少大熱漫畫嘅周刊，今年創刊45周年，為隆重其事，NB Games專登炮製一款動作遊戲《J-Stars Victory Vs》，將歷年32套作品，總共52位角色展開2 vs 2夢幻對決，想用黑子施展籃球「誘導術」擾敵，再搵唐利高發動「釘拳」都得！仲諗？快啲買嚟玩啦！

幽助指尖發射「靈丸」，能夠隨儲氣強弱而決定招式大小。

小岡用念力將力量聚於拳頭，用猜猜拳擊走敵人。

小雲聯同小吉先放電麻痹對手，再用蠻力擊潰敵人。

當玩家陣營的「V Burst計量表」顏色一面倒時，角色便會進入「Victory Burst」狀態。

部分角色具備儲氣技巧，能夠發動變身，例如《龍珠》嘅孫悟空。

召喚《To Love》嘅拉拉為玩家打氣，就會短時間內為角色補血。

騎單車嘅兩勘津吉同揸綿羊仔嘅銀時有特別劇情，為玩家大放笑彈。

「J冒險模式」將會在架空舞台「Jump World」展開跨作品故事交流，更會為劇情重新配音。

玩家可駕駛「Memorial Jump號」到廣闊的世界冒險，收集角色及獲得道具。

遊戲有線上模式，玩家們可以開Room比試身手。

遊戲「初回特典」會贈送《J-Stars Victory歷史書》，內裏詳盡收錄各漫畫角色設定，珍貴非常。

《J-Stars Victory Vs》PS3版 ¥7,980

《J-Stars Victory Vs》PS Vita版¥6,980

2 vs 2隊際混戰

遊戲要玩家選出二人戰鬥單位加一位只限作技能輔助嘅角色組成小隊出戰，角色除咗有自己嘅體力及發動絕招用嘅精力之外，畫面上方仲有代表雙方戰力嘅「勝利計量表」，玩家只要被擊倒三次便算輸，情況類似《Gundam Vs Gundam》系列計戰力打法。角色可透過戰鬥中累積精力「Stamina」去施展必殺技，亦可以跟隊友發動「Cross Break」合體技，必要時仲可以召喚輔助角色，利用特殊攻擊去擾亂對手技能。此外，戰鬥時亦有一條代表雙方陣營氣勢嘅「V Burst計量表」，當其中一方戰況一面倒時，角色就會進入「Victory Burst」狀態，出招威力更強，殲滅對手更Easy。

經典角色共冶一爐

遊戲收錄嘅漫畫角色之經典程度都可謂數一數二；要數大熱選角，除《龍珠》悟空、《One Piece》路飛、《狐忍》鳴門、《漂靈》一護等動作漫畫人氣主角外，80年代《北斗之拳》拳四郎、《魁！男塾》劍桃太郎等亦會粉墨登場，就連搞笑角色《IQ博士》嘅小雲都要參一腳，力大無窮嘅佢用便便棒篤人不特止，仲會搵埋小吉放電麻痹對手，再掰大口放炮，破壞力驚人！至於部分戀愛及運動漫畫則以輔助召喚角色登場，如《影子籃球員》黑子以「誘導術」擾敵、《校園一姐黑神》球磨川利用巨型螺絲插對手，強行破解對方嘅變身狀態。

特定組合跨界戰鬥

特定組合嘅跨界戰鬥亦係遊戲一大戲碼，例如同是來自日本維新時代的《浪客劍心》緋村劍心與《銀魂》坂田銀時兩大劍豪死鬥；甚至是《家庭教師Reborn》澤田綱吉夥拍BB利邦，迎戰《惡魔爸B》不良學生男鹿跟魔王BB等，粉絲肯定期待！加上遊戲預備了「J冒險模式」，畀玩家乘坐「Memorial Jump號」到訪夢幻舞台「Jump World」參與「J戰鬥祭典」，從「躍動」、「希望」、「探求」、「追迹」四個篇章任擇其一開展劇情，體驗不同漫畫嘅互動故事，完成任務後更能收集角色及獲得道具獎勵，玩法豐富。

INFO

類型：動作

平台：PS3、PS Vita

發行：NAMCO BANDAI Games

人數：1至2人

推出日期：3月19日

售價：PS3版 ¥7,980、PS Vita版 ¥6,980

查詢：2782 0978