遙控直升機大家就玩得多，但有冇諗過唔使用遙控器，隨心就可以控制呢？美國Puzzlebox最近就推出咗架Orbit直升機，最特別係用腦電波耳機控制，識得將腦電波活動轉化成訊號，從而令佢升起，Gimmick度爆燈！
$2,680
中空圓形加上幾條弧形支架，似個波多過似直升機；佢設有雙螺旋槳，冇風的話都飛得幾穩定。
直升機及紅外線接收器都要插專用USB線先叉到電，略嫌不便。
底部係摩打及充電池，電力可玩到約15分鐘。
送一套後備螺旋槳，撞爛都可以自己換。
點玩逐格睇
Step 1 腦電波耳機前額感應器有金屬片，一定要掂住皮膚，唔好畀頭髮遮住。
Step 2 耳夾一定要夾實耳珠，不過夾得耐都有啲唔舒服。
Step 3 將接收器插落手機3.5mm插頭就得，用之前記住將Volume校到最大。
Step 4 模特兒Miki話佢做簡單心算就已經可以令Orbit起飛。
呢架Orbit機身僅重43g，喺戶外玩，有風就好易失控，建議室內玩好啲。要控制Orbit，首先要戴上腦電波耳機，將感應器金屬片掂住額頭，再將耳夾夾實耳珠；之後就將耳機同Android或者iOS裝置透過藍芽配對，再將紅外線接收器插落手機3.5mm插頭，跟手下載埋《Oribit》程式，咁樣就可以開始玩喇！
放鬆、集中方能起飛
Orbit隻耳機會量度玩家腦電波活動，之後就會轉化成訊號透過手機傳送到Orbit；而控制Orbit就需要靠「Meditation」（放空）或「Attention」（集中）兩項讀數，當讀數達到一定程度，Orbit就會自動起機。說起來有點抽象？廠方有貼士畀大家，如要令「Meditation」讀數上升，只要閉上眼深呼吸、讓心情保持平靜就得；要令「Attention」讀數上升，玩家可以集中望住一點，或做複雜心算，又或者心中翻譯文字，切忌行來行去以及講嘢分散注意力。不過，廠方話唔同人諗唔同嘢會有唔同效果。小記頭幾次試玩都唔識控制，試多幾次就開始搵到Orbit個啟動模式，唔係想像中咁難。惟要留意，Orbit可以自動向任何方向飛，亦飛得又高又遠，可惜用家唔能夠操控佢向左定向右飛。
查詢：3102 2783或3148 9455
Vincent
