那些年，當波Boot仲係黑白色才是王道嘅年代，adidas嘅Copa Mundial堪稱係王中之王，舒適性與貼腳程度之高，以「無敵是最寂寞」嚟形容都絕不為過，難怪無論係80年代嘅碧根鮑華、柏天尼、薛高，以至之後嘅施丹、卡卡，甚至改着Predator之前嘅碧咸，都揀咗呢款鞋王拍檔上陣，至於德國製作、袋鼠皮鞋面，加埋鞋頭嘅縫線以及可摺式鞋舌，以上種種Copa Mundial嘅設計特色，亦早已成為波Boot界嘅不滅Icon。

adidas Samba Copa Mundial $1,999/對

顏色大變革，不過細節位統統有規有矩冇走樣，例如壓印咗品牌字樣嘅白色鞋領、防止鞋頭走樣嘅縫線、鞋側三間標誌嘅鋸齒邊，仲有可摺式鞋舌，正正係呢啲Old School位令Copa Mundial能夠深入民心。

白色鞋底襯黑色圓釘，30幾年始終如一，夠晒代表性。

於1979年面世嘅Copa Mundial，喺將近35年嘅生產史裏面，亦一直堅持原味製作，尤其是「Made in Germany」呢個金漆招牌，足以令鞋迷對佢睇高幾線，唔怪之得累積銷量已經超越一千萬對。

手工無可匹敵

或者你會嫌佢個Look唔夠In，又唔似依家嘅波Boot咁輕，不過講舒服、貼腳、耐用、保護性，尤其是手工，又有幾多後浪可以挑戰到佢？而且adidas嘅創辦人Adolf Dassler都有份參與設計，淨係計歷史意義已經冇得輸，難怪有同事甚至話︰「識踢波、識揀Boot嘅，一定要有Copa Mundial，唔着都要買番對嚟儲！」老老實實，其實adidas繼續原味製作，Copa Mundial都依然會熱賣落去，不過今年有巴西世界盃，而三間牌又決定以洋溢熱情、活力嘅Samba精神，作為今年足球部門嘅設計理念，故此決定反傳統、玩大佢，炮製出五彩繽紛嘅Samba Copa Mundial。

五色版本可一不可再

Samba Copa Mundial係整個Copa Mundial族譜之中，首次唔用黑白雙色嘅版本，備有粉紅、淺紫、淺藍、鮮橙及青色五款選擇，Sharp到爆，呢五種顏色，正正嚟自同屬Samba世代嘅Predator、11pro、f50 adizero及nitrocharge。鞋面顏色大革新，不過鞋底沿用象牙白，而鞋釘亦係傳統嘅黑色圓釘款式，加埋上文提過Copa Mundial幾十年嚟始終如一嘅標誌性設計，令Samba Copa Mundial成功做到經典與創新共冶一爐，加上只為2014巴西世界盃而設，請容筆者長氣但衷心講多次︰「唔着都要買番對嚟儲！」

查詢

2789 8198（旺角豉油街adidas Megastore）

2424 2122（尖沙咀彌敦道i-Square Futbol Trend）