《inFAMOUS Second Son》超能力善惡之戰

有超能力版《GTA》之稱的《inFAMOUS》系列推出新一集《inFAMOUS Second Son》，今次遊戲是PS4獨佔推出，畫面表現出色；原主角Cole在上集結局中自我犧牲拯救世界，今集換來樂意使用超能力的Delsin擔正；新主角能使出攻擊力強的「Smoke Power」跟移動速度極快的「Neon Power」，但始終遊戲系列的精髓仍然無變，就係「善惡選擇」，玩家想做好人定壞人呢？

當Delsin大哥挾持Fetch時，想正義地「救贖」Fetch又得，要邪惡地「腐化」亦得。

瞄準敵人時，腳部藍光意指「正義部位」，至於頭部就有紅光，想做壞人就Head Shot啦！

當用上Neon Power時，主角可化身一道紫光高速奔走。

Delsin從女角Fetch身上學得超能力。

打爆汽車有機會得到超能力補充劑，按手掣上的Touch Pad即可補充。

唔一定要用超能力遠攻，走到敵人身邊按正方形掣即可使出「光劍」攻擊。

Delsin好樂意使用超能力抵抗DUP的壓迫。

遊戲以西雅圖實景設計，地標Space Needle電視塔亦會在遊戲內出現。

《inFAMOUS Second Son》典藏版會送冷帽、徽章及臂章等。 $508

《inFAMOUS Second Son》

做壞人打得Free

開發小組話上集《inFAMOUS 2》中差唔多有八成玩家都係做「正義」好人，但玩時掣肘比較大，射每槍都要步步為營，最好係只命中敵人腳部降服佢，以避免殺人如麻。不過在戰場上都好難槍槍都瞄準打腳，如果要玩得更Free，都係做壞人啦！今集故事係描述第二集故事七年後的世界，民間組成以維穩為幌子的超能力者隔離機構「聯合保安部（DUP）」，專門捉拿擁有超能力的人物；帶點反叛及奉行自由主義的新主角Delsin就起來抵抗DUP，並會動用所學得的超能力來搞對抗。

兩大超能力用得爽快

早兩集《inFAMOUS》主角Cole迫於無奈先至使出自己的超能力，今集新主角Delsin就完全唔同，從具有超能力女角Fetch身上取得超能力後，就好樂意同肆無忌憚地使用各式超能力進行任務，風格明顯同前作不同。Delsin會擁有兩種超能力，分別係以啡色顯示的「Smoke Power」；以及用紫色顯示的「Neon Power」，前者擁有較強的戰鬥力，不過行動力較弱，如要衝上高樓屋頂要先搵到大樓的煙囱位置先得；相反「Neon Power」就可高速橫衝直撞，90度角爬牆衝上屋頂話都無咁易。不過無論使用哪種超能力都好，都要靠隨機打爆汽車或其他物件，以取得超能力藥劑補充先得，只要靠DualShock 4掣上的Touch Pad就可取得超能力及轉換超能力。

西雅圖實景極像真

《inFAMOUS Second Son》今集唔再玩虛構城市，成個遊戲版圖都係跟足西雅圖嚟製作，著名景點如Seattle Space Needle電視塔都有收錄。在PS4機能加持下，無論係人物描繪到城市實景都做得好仔細，如Delsin的大頭Close-up鏡頭真係見到皮膚細紋同鬚根，城市霓虹招牌跟地面反光位都做到真嘅一樣，而Delsin極高速移動時，用粒子效果營造的煙氣燃燒場面都表現出一級水準。

話晒這隻遊戲係PS4大作，SCEH就為佢推出典藏版跟PS4同捆版，現時成功預訂任何一個版本，都有機會免費得到紀念Tee，機迷識做啦！