東京直擊：試玩日系王牌Xperia Z2影相巴閉

以往日本手機出名影相靚，不過近年好多廠商都急起直追，鏡頭像素、相片質素都直逼日系機。作為日系機大佬嘅Sony早前就喺西班牙舉行嘅MWC手機展上推出新作Xperia Z2還擊；新機採用2,070萬像素鏡頭，仲支援4K影片，拍攝規格前所未有咁勁！Sony日前邀請一眾港、台傳媒去日本試玩Xperia Z2，一試就發現不單影相夠清晰，最爆係4K影片細緻兼層次分明，直情媲美相機；再加上有大量AR虛擬卡通、TimeShift慢動作等特別拍攝效果可玩，總算為日系機爭番口氣。

今次試玩會於Sony品川總部舉行，呢度平時守衞森嚴，一般情況唔入得。

Xperia Z2機面設計與Xperia Z1類同，用上強化玻璃，美觀簡約。雖然換上Android 4.4系統，不過主介面與其他Sony手機相若，舊用家不難適應。

試相
內置食物模式，拍攝食物比一般模式更加鮮艷，睇落都新鮮啲。

以微距拍攝，花瓣紋理清晰可見，解像度極高。

夜攝唔易手震，而且雜訊都不太嚴重。

Xperia Z2機身厚度和闊度都比Xperia Z1少，重量亦都輕啲。

機面頂和底部都有喇叭，音效比上代單喇叭好得多。

SIM卡槽及microUSB插頭位於機身左側，並設有防水保護蓋。

Xperia Z2（右）機身比Xperia Z1（左）長，不過就較窄身，邊框都幼啲。

備有黑、白、紫三色，小記就最鍾意紫色，特別得嚟又唔會姣，男士都用得。

加入「簡易首頁」，將介面變成大格仔圖示，媽咪級用家都好易上手。

內置「進階智合拍模式」、「4K影片」等多個拍攝模式，功能超齊。

「Timeshift影片」可以將影片部分片段玩慢動作，用120fps玩超慢動作，效果一流。

「AR效果」之前只可於拍攝相片上使用，現在連影片都用到，仲有埋相關聲效。

同場加映
Sony同場展出其他新產品以及Xperia Z2專用配件，即睇！
SmartBand係智能手帶，佢內置感應器，配合手機程式《Lifelog》，可以記錄用家活動如步行、跑步、睡眠的數據；另外仲可以提示來電及訊息。

STM10外置式立體聲收音咪外型仿照同廠Action Cam HDR-MV1，只要插入Z2機頂的3.5mm插頭即可使用，錄音質素大幅提升。

新一代Xperia Z2 Tablet備有10吋屏幕，最正係比上代更輕、更薄，方便攜帶。

總部藏品
除了試玩新產品之外，小記亦去埋同樣位於東京品川嘅Sony歷史資料館，內有勁多當年嶄新科技產品，大開眼界。
呢部係1979年面世，第一部立體聲Cassette帶播放器，名字就係大家耳熟能詳嘅「Walkman」。

Sony於1965年推出第一部彩色電視機，當年售價高達¥198,000。

1994年推出的PlayStation 1000，風靡唔少遊戲機迷。

1992年出品的MD Walkman MZ-1，曾幾何時係不少人眼中之潮物。

此乃1945年電飯煲試作產品，用木桶製作，好過癮。

Xperia Z2機身繼承系列招牌Omni Balance平衡設計，另外機面、機背都採用強化玻璃，機側同樣備有圓角金屬開關鍵及實體快門鍵，甚至連黑、白、紫三大配色都有齊，驟眼睇的確同上代Xperia Z1有九成似。咁究竟有乜唔同？原來變化盡在細節中，屏幕由上代5吋增大至5.2吋，令機身稍稍加長之外，厚度、闊度以至重量都比上代細咗同輕咗；何解？Sony特別將機身金屬框由上代三層設計改為一體式，從而成功「偷位」，令機身更Slim，手感更自然；而且廠商仲話機身密封位由以往四個變兩個，防水、防塵效果都強啲。

原色靚芒

而Z2 5.2吋屏幕亦非加大咁簡單，佢有1,080p解像度、TRILUMINOS Display for Mobile技術、X-Reality for mobile影像處理器，同上代一樣，另外加入咗新技術Live Colour LED，據講可以令屏幕可視角更高之外，重點就係顯示倍覺鮮明。現場睇相，發現一般風景相片顏色鮮艷，睇人像相時對比度又唔怕太高而令膚色變得過紅，保持番原色，效果的確唔錯；原來系統會自動將紅、綠、藍盡量呈現，不過就唔會將「Human Skin Color」推高，維持相片自然感覺。

鏡頭厲害

講到招牌功能，不得不提就係拍攝一環。同Z1一樣，Z2鏡頭採用G Lens鏡片，加上1/2.3吋、2,070萬像素Exmor RS for mobile感光元件，鏡頭規格已經拋離其他對手一大截，對焦夠爽，成像、色水亦不俗。最值得一讚係「進階智合拍模式」，以往系統周不時揀錯拍攝模式，令相片成像一般；而Xperia Z2除識得自動揀啱拍攝模式外，ISO、快門等選項選擇亦較以往準確，方便大家隨手Snap，唔使慢慢揀功能。

超清4K片

影相咁靚，拍片當然都唔會差。Z2新增4K影片拍攝，可以拍攝出解像度達3,840×2,160、每秒30格的高質素影片。試拍時發現拍攝流暢兼毫不Lag機，特別在層次同埋顏色比一般1,080p影片分明得多，用4K電視重溫就最為明顯，當然用番Z2睇都一樣靚啦！如果嫌內置收音咪效果唔夠好，就可以買埋外置式立體聲收音咪STM10，佢外形超Pro，只要插入機頂的3.5mm插頭就用得，左右兩邊收音、消噪效能都大幅提升，錄音質素好得多。值得一提的是，由於4K影片解像度太高，拍十幾秒File已經成100MB，記住帶備microSD卡擴充容量。

搞鬼拍攝

呢部Xperia Z2仲有唔少得意拍攝功能，例如「背景散焦」，系統會自動辨別及鎖定主體，拍攝完就可以即時滑動右邊條Bar改變散景程度，效果都幾自然；「AR效果」就係由影相功能移植過嚟，拍片時可結合虛擬卡通場景，好似恐龍、童話、蜘蛛俠等，再加埋相關聲效，配合起來都好搞鬼。而小記最鍾意就係「Timeshift影片」，佢可以拍攝出120fps影片，之後再將局部片段玩超慢動作，最啱用來影動態畫面，十足電影《Matrix》咁！硬件方面，Xperia Z2搭載Qualcomm Snapdragon 801四核心處理器，效能與Xperia Z1相若，不過就由2GB增至3GB RAM，配合Android 4.4作業系統，用落都好流暢；不得不讚係電池都加碼至3,200mAh，加上Stamina省電模式，電量襟用得多。