各位70後、80後,試試回想細路仔年代,砌模型可說係每個男生嘅必玩玩意,為咗鼓勵「模型改造」呢種文化,當時催生咗一齣關於亂砌模型對決漫畫《模型狂四郎》,啟發大家嘅改裝意欲;估唔到差唔多30年後,Bandai炮製咗一套理念極近嘅《Gundam Build Fighters》動畫,仲走出《Gundam Age》嘅低收視陰影,大收旺場。劇中主角伊織誠以突擊高達作藍本,加裝Build Booster而製成「Build Strike Gundam Full Package」,挑戰模型對戰大賽,身為主角機,Bandai點會唔出模型吸金?繼早前1/144嘅HG版本後,更大型、更精細嘅1/100 MG亦都上架。

MG Build Strike Gundam Full Package 建議零售價:¥4,200

Build Strike Gundam嘅外觀跟Strike Gundam極之相似,只係肩甲及頭部造型有明顯出入。

機首底部追加咗起落架,令Build Booster可以直接放喺平地上。

Build Booster可以獨立拆出,變成支援戰機幫手。

喬巴姆盾牌內側可以懸掛Beam Rifle及強化Beam Rifle。

安裝了Build Booster後,主體重心需要稍為前傾先至企到,即係話玩家最好準備MG專用嘅另購底座。

腰側裝甲有旋轉懸掛裝置,用嚟放激光劍,前臂裝甲就與Strike Gundam有所不同,以便安裝喬巴姆盾牌。

Build Booster提供多種結合榫位,方便大家Mix & Match改造出自家版本。

劇中嘅後繼機Star Build Strike Gundam,其背包及專用組件會以補充模件方式另行推出Boxset,售價¥2,800。

大型Beam Cannon備有兩組連接關節,拉出紅色把手,就可移至腰間擺出發射姿勢。

以Beam Gun為基本武裝,槍管設有伸縮功能,既可加件變成Beam Rifle,還可再升級為強化版Beam Rifle。

劇中Build Strike Gundam係模型店少東伊織誠嘅嘔心瀝血大作,機體以《Gundam Seed》嘅突擊高達做藍本,為咗增加機動性及火力,特別改造咗頭部、肩膀、前腕、側腰甲及膝蓋等處組件,例如頭部加設雙火神炮、肩甲內藏推進器、腰側掛上光劍等。

主體來自《Gundam Seed》

故事中阿誠嘅作品係1/144 HG,要自己捱通宵改餐死先做到出嚟,現實中唔只有更大部嘅MG,而且以上改動已經原裝有齊,模型新手都唔使驚。由於呢款新MG嘅模件都幾精簡,主體幾乎沿用Remaster HD Strike Gundam嘅骨架及裝甲,真係稱得上全新開發嘅組件,應該係百變武器系統,主武裝Beam Gun能夠伸縮槍管,前端又可加件變成Beam Rifle,或者嵌入更大型嘅強化組件之中,至於「喬巴姆盾牌」內側亦可懸掛兩款備用槍枝,表面採用多色分模層疊設計,內置輔助炮身,素組之下都有唔錯效果。

背包留有伏線

Build Strike Gundam由阿誠製作,並由神秘少年澪司負責操控,起初都戰無不克,但自從跟Amazing Zaku激戰重創後,阿誠就參考咗嫣紅突擊高達鳳裝備嘅背包設計,改造成能夠獨立行動嘅支援戰機Build Booster,結合成Build Strike Gundam Full Package,既有大型推進器,又有兩支大型Beam Cannon;MG版本嘅Beam Cannon備有兩組連接關節,可以直接拉前至腰間,擺出發射甫士,背包又有多種榫位,方便結合唔同嘅MG模型,擺明慫恿玩家,買多幾款唔同嘅MG高達,組裝兼改組成自家版本,Bandai呢招嘅「毒性」都相當高喎!

查詢:2433 1828(瑞華行)