Galaxy Note Pro 12.2好畫得

唔少鍾意用手機、平板畫畫嘅人都用Samsung Note系列，皆因佢有支招牌S Pen手寫筆，靈敏又準確，方便好用。另一方面，用來畫畫，屏幕愈大愈好，咁新出嘅Galaxy Note Pro 12.2就啱胃口喇！此機可以話係放大版嘅Note 3，用上12.2吋超大芒，睇劇、上網當然正；佢當然備有S Pen，配合專用Apps，畫畫、記事都一樣得心應手！

Galaxy Note Pro 12.2 $7,898（4G版）、$6,998（Wi-Fi版）

機背仿皮物料手感不俗，惟機重逾750g，略嫌墜手。

左右機側均設有喇叭，輸出夠力，立體聲效果亦明顯。

支援microUSB 3.0，接駁電腦過Data特別快。

可以插64GB記憶卡，加埋原裝32GB內存，夠晒空間擺影片同Apps。

外形同Note 3（左）超似，不過屏幕就變大至12.2吋。

《e-Meeting》可以將畫面同步至不同裝置，開會就最啱用。

Content Home頁面最多可以將畫面分成六格，同時睇各大主題嘅新聞。

除咗新聞，大家都可以選擇睇Social Media。

虛擬鍵盤字母間隔適中，而且又有獨立數目字，設計完善。

用《Remote PC》就可以遙距控制電腦，而且同步速度及反應都算幾快。

放大版Note 3

叫得做Note系列，Note Pro 12.2的設計頗有Note 3影子，無論機側嘅立體直紋、機背軟身仿皮物料甚至鏡頭設計都跟Note 3所差無幾。而屏幕不單增大至系列最大嘅12.2吋，就連解像度都「升呢」至2,560×1,600超高清級數，比一般1,080p清晰得多，遠睇抑或哄埋都完全睇唔到Pixel咁滯，講細緻度贏晒。唯一美中不足就係4G及Wi-Fi兩個版本重量都達750g，長時間拎住佢肯定會手痺，建議搵個支架承托或者座枱用。

S Pen增長筆身

講到Note系列，又點可以唔提招牌S Pen。今次Note Pro 12.2支S Pen放喺機身右側，隨時攞出嚟都好就手。細心留意，此機嘅S Pen雖然同Note 3個支同樣係橢圓形筆桿，不過筆身就稍稍加長，用起來更好揸手。另外，呢支S Pen都支援1,024筆壓，配合內置《S Note》、《Sketchbook for Galaxy》App，前者可以記事兼畫畫，後者就屬專業畫畫程式，筆迹、圖層等功能都有齊，鍾意畫嘢嘅朋友一定鍾意。不能不提就係Air Command功能，只要筆身一離開機側插槽，畫面就會彈出半圓形Menu，可以用Action Memo記事、Enhanced Easy Clip喺畫面剪裁圖片等等，實用之餘都幾好玩。

有齊專業軟件

軟件方面，此機雖然沿用TOUCHWiZ介面，不過圖示介面就有所微調，其中主頁加入全新Content Home頁面，畫面可分成最多六格，可以同時顯示科技、商業、新聞、運動等訊息，又或者微博、Flickr、Twitter等社交網絡訊息，可以話係一個小型新聞中心。另外，新機亦支援全新Multi Window，以往舊型號最多只可以開啟雙視窗，而Note Pro 12.2就加碼到支援四視窗，而且四視窗全開都唔見Lag機，話唔定仲勁過你屋企部PC！值得一提，Note Pro 12.2內置唔少專屬嘅專業程式，包括《Remote PC》、《e-Meeting》，前者可以喺Tablet上遙距控制已配對嘅PC或者Mac；後者就可以將同一畫面同步至不同裝置，方便開會交流互動。