爆趣G Pro 2敲芒解鎖

LG新機G Pro 2，二月中先正式發布，唔使兩星期就已經喺韓國開賣，而水貨亦火速抵港！呢部被譽為今季LG旗艦作絕無令人失望，5.9吋靚爆大芒、四核心處理器等規格已經夠正；而且仲引入一系列過癮新功能，其中「Knock Code」就夠創新，敲一敲芒竟然可以解鎖兼着機，好玩又實用，難怪機價高開$6,380依然搶手！

$6,380
驟眼睇以為係G2，一樣玩窄邊設計，大芒機來講算易揸手。

隨機送兩枚電池，容量有3,200mAh，應夠用一日。

機背加入細小坑紋，唔易跣手。

內置32GB ROM，亦可加記憶卡，擴充容量好方便。

到港嘅韓版支援香港嘅1,800MHz、2,600MHz 4G頻譜，上網、串流自然夠爽。

沿用UX介面，支援最多七版主頁，換頁、操作都流暢。

新增Mini View功能，只要於屏幕底的虛擬功能鍵位置向左或向右一掃，整個畫面會縮細，單手操作時更就手。

虛擬鍵盤、撥號、圖形解鎖介面都可以縮細兼左右擺放，方便手細嘅用家。

內置省電模式，用到指定剩餘電量下就會啟動，待機時會熄數據、Wi-Fi等功能，幫你慳電。

支援Multi Window，除可以將畫面分為上下兩截開啟不同程式外，今次仲可以兩個畫面同時開啟瀏覽器，大玩Dual Browser。

「魔術對焦」效果
左邊一幅係揀微距，右邊一幅則揀無限遠，前者前清後矇；後者就後清前矇，效果相當明顯，揀啱就可以儲存；唔想畫面有散景的話，仲可以將幾幅不同焦點嘅相片合番埋，變成All In Focus全清添！

Knock Code點玩？
啟用Knock Code之後，畫面下方就會有劃分為四格嘅解鎖區。

使用時四格區域唔會顯示，敲芒時必要敲中已預設位置及敲打次數。

窄邊好揸手

上年大作G2叫好又叫座，窄邊框靚仔之餘，機背Rear Key設計仲有好多人讚方便。咁得民心，新機當然繼續沿用，G Pro 2可以話係放大版嘅G2，屏幕兩側邊框依舊只得3.3mm，機身比其他Phablet級手機明顯窄得多，單手揸機都好Easy！機背Rear Key方面，除開關鍵、音量鍵之外，拍攝時亦可當快門鍵之用，操作夠就手。外形上唯一與G2不同的就是屏幕加大至5.9吋，雖然解像度維持1,080p，不過配合IPS素材，色水自然，可視角又夠高，睇相效果好正。

Knock Code着機

仲記得G2推出時，廠商為方便大家唔使反轉機背都可以隨時開機，特別創出Knock On敲芒着機功能，機身採用同一設計嘅G Pro 2梗係都支援此功能。用家於畫面上只用手指頭敲屏幕兩下，即可開芒或者熄芒，唔使成日掣咁麻煩。最勁係廠商將呢個Knock On功能發揚光大，改良成G Pro 2暫時獨有嘅Knock Code；簡單講就係將一般Android手機嘅圖形解鎖改為敲芒方式，屏幕中間偏下方位置會劃分為四格虛擬區域，用家可以設定最少兩次、最多八次嘅敲芒解鎖方式，敲芒次數愈多，保安能力就愈強，仲要敲啱位先得，用法夠創新。最方便係用家唔使好似其他Android機咁事先着芒，於待機熄芒嘅狀態下都可以用到Knock Code，敲啱密碼就直接解鎖着芒，慳咗個步驟。

影完相改焦點

同依家大部分旗艦Android機一樣，G Pro 2備有四核心處理器、3GB RAM等高階規格，換頁、開Apps都好流暢。值得一提就係其1,300萬像素鏡頭，備有OIS光學防手震功能，亦可以拍攝3,840×2,160的UHD影片，硬件超強；而且仲新增「魔術對焦」功能，用家可以影完相之後，再任意調校由微距至無限遠等五級別焦點；現場試拍，發現用微距影物件效果最突出，想前清後矇、後清前矇任你揀。