《Thief》賊仔出山戰暴君

別以為遊戲主角一身刺客袍就係《Assassin's Creed》，其實係《Thief》主角Garrett至真；佢係竊賊，不過係行俠仗義嗰類。可能大家唔知，《Thief》系列歷史唔短，第一集早在1998年推出，不過2004年出第三集後就一直無新作。而是次可稱為第四集的《Thief》早於2009年公布，相隔四、五載終於在PS4推出，遊戲講潛入盜竊挑戰極權，用盡PS4機能製作遊戲畫面，值得一玩。

遊戲調子灰灰暗暗，畫面處理可算用盡PS4機能，效果唔錯。

遊戲場景設定在中世紀，一個名為「The City」的城市。

武器方面，就有弓箭作遠距離攻擊，或可令守衞分心。

爬上高處伺機突襲，竊取各種寶物或道具。

攀爬潛入是主角Garrett的基本伎倆。

Garrett可用的武器大致跟以往差唔多，如可使用短棍打暈守衞。

《Thief》

睽違九年東山再起

《Thief》系列出過三集，分別係1998年的《Thief：The Dark Project》、2000年的《Thief II：The Metal Age》以及2004年的《Thief：Deadly Shadows》，全是在陰沉調子的城市進行各種偷竊任務，當時評價不錯。第四集遊戲早在2009年就公布，可是一直只聞樓梯響，搞到2014年先出到街，而廠方在新一集只係用上《Thief》作名稱，有東山再起的意味，呢種改名招數在Game壇都幾普遍。新一集《Thief》依然用系列作相同的時空背景設計，都是一個晦晦暗暗的中世紀「無名」歐洲城市。

偷竊以外玩法多變

遊戲主角仍舊是行俠仗義的竊賊Garrett，城市也仍舊受暴君大魔頭Baron支配，人民飽受欺壓及凌辱；但係今集世界觀同之前幾集有分別，以往Garrett某程度上是透過偷竊來挑戰社會權威，帶有英雄主義；今集所執行的任務就比較個人化，不單要偷，仲要應付各類支線任務，玩法變得多元化。不過開發小組明言，遊戲好多場口都專登設計成可供玩家思考價值觀，可能玩完之後會有得着都未定。《Thief》玩法都幾似《Assassin's Creed》，主要靠潛伏，可以由陰暗後巷爬到屋頂，然後從高處躍下完成偷竊任務；不過本作暗殺目標人物並非重點，但如為達成目的而開殺戒的話，遊戲則不作任何懲罰。

提示模式不怕迷路

遊戲用上比較開放的路線設定，並不需要根據指定路線完成任務，並且設有多條支線故事畀大家玩。最大問題係遊戲場景設定得太過黑暗，如果無提示的話搵路甚難，好在遊戲有個「Focus」模式指示可供攀爬的水管，或者提示可整熄蠟燭，令現場環境昏暗，方便潛入，甚至乎可以令時間流轉速度減慢，以進行較高難度的潛入、偷竊任務。主角所使用的武器大致跟以往系列作品相同，基本武器包括有弓箭、飛爪及短棍等。