早前本報與on.cc網站都曾經預告，PUMA嘅全新足球鞋系列evoPOWER將會大駕抵港，或者你已經喺YouTube及其他社交網站睇過相關嘅官方宣傳片，着咗evoPOWER嘅法比加斯，一腳射爆球場嘅電視大屏幕，最驚人係Chok住上鏡嘅巴洛迪利，慢動作轉身背後，係一片頹垣敗瓦嘅球場廢墟，暗示呢對新Boot大力到冇人有，有冇咁誇呀，CG嚟啫！點知就喺啱啱嗰場AC米蘭對博洛尼亞嘅意甲賽事上，「巴神」於86分鐘就整個冇得救嘅衝力射球絕殺對手，唔只令佢成為米蘭英雄，吐走晒啲冤屈氣，仲成為evoPOWER貨真價實嘅最新示範，服未！

同屬太陽飛馬嘅鄧景煌（a）、吳逸凱（b）、唐建文（c）及麥基（d），齊齊着住evoPOWER參與Vicon測試，當中以麥基嘅射門力度最Powerful，達到15,256W。

evoPOWER 1 FG $1,299

功能設計逐樣睇
前後兩段式鞋釘
據Justin解畫，前掌用上圓釘設計，有助觸地時抓實草面，至於中、後段嘅方形鞋釘，專為橫向動作而設，當用家以外側着地之後，就可以更快向反方向移動，急停轉向時便大派用場。

AccuFoam泡綿
藉凹凸形狀加強與足球嘅摩擦效果，提升射球準確度，留意除咗鞋面，連內籠都有相應嘅凹凸設計，加強球感。

G.S.F.（Gradual Stability Frame）
彈性穩定支撐系統
內藏於鞋底、貌似脊骨嘅彈性屈曲設計，令射波動作更自然、更有力，中大醫學院助理講師嘅Justin（右），即場示範G.S.F.有幾屈得。

AdapLite鞋面
既輕且薄，還可緊隨足部動作而自由延伸，時刻保持貼腳效果。
鞋身中段兩側仲有EverFit Cage，加強對中足嘅包覆效果。

（左起）吳逸凱、鄧景煌、麥基、唐建文

早前AC米蘭對博洛尼亞的意甲賽事上，穿上evoPOWER的巴神於下半場尾段來一腳衝力射球，為AC取得1:0的勝果。

evoPOWER限量迷彩特別版

法比加斯簽名evoPOWER

法比加斯+馬高萊斯簽名evoPOWER 1

喺巴塞隆拿嘅全球首發會上，馬高萊斯、巴洛迪利，仲有圖中嘅法比加斯，即場着住evoPOWER，施展腳腳七注嘅神技。

平時畀粉絲圍住影相就試得多，一見到亨利（右二）出現，法比加斯（左一）、馬高萊斯（右一）及巴洛迪利即時換轉身份變咗做粉絲。

老老實實，巴神係入過唔少靚波，但係呢球絕對係Best of the Best，唔只距離遠、角度又刁鑽，而且曲墜程度相當大，少啲腳力同準繩度都做唔到，evoPOWER同巴神今次真係攞晒彩！呢款咁有話題性嘅新Boot啱啱抵港開售，為此PUMA HK舉行咗本地首發會，搵嚟專業人士解構evoPOWER到底有何玄機外，仲邀請咗太陽飛馬嘅四大猛將—鋼門吳逸凱、雙閘唐建文及鄧景煌，以及2012-13球季嘅港甲神射手麥基齊齊試Boot，無花無假，即場Show畀你睇evoPOWER有幾勁。

勁力射門靠老屈

試Boot活動喺觀塘一個室內足球場舉行，而麥基等人並唔係着住對新Boot求其射幾腳龍門咁簡單，為咗實牙實齒Show Quali，大會動用咗香港中文大學嘅「Vicon光學運動捕捉系統」，個波射得準唔準、有幾大力，即時由電腦分析出嚟；神射手果然係神射手，麥基就以15,256W呢個力量數值壓倒三位飛馬隊友。

勝負只係Gimmick，最重要係四位港甲球員都一致認同，着evoPOWER射波真係大力咗，點解咁奇？大會邀請咗香港中文大學醫學院助理講師及博士研究生李韋煜（Justin），從專業角度剖析玄機，Justin指出︰「evoPOWER用咗赤足理念設計而成，情況就好似踢沙灘足球，冇對鞋阻住，射波都會大力啲，因為喺正常嘅射波姿勢下，腳掌唔只蹬直，仲會微微向內彎、腳背稍稍拱起，不過一般嘅波Boot都用硬身、欠彈性嘅物料製作鞋底，無形中球員就會用多咗力去遷就對Boot。evoPOWER最特別嘅地方，係鞋底用咗G.S.F.彈性穩定支撐系統，可以大幅度屈曲，好少波Boot可以做到，故此射波時鞋形能夠緊貼腳形變化，換言之以前因為鞋底太硬而嘥咗嘅力，依家可以完完全全傳晒落個波度。」就以今次嘅Vicon測試為例，麥基四人着住evoPOWER射波嘅力度，就比之前着同屬PUMA嘅PowerCat平均提升咗9.3%。

全隊啱着Power Eleven

射波唔只要大力，仲要夠準，evoPOWER抵讚在做到兩全其美，鞋頭位置設計成凹凸形狀，原來內藏AccuFoam泡綿，藉加強與足球嘅摩擦效果，提升射波以及長傳時嘅準確度，甚至以First Touch形式接應高空波，相信都會有所幫助。除此之外，為咗配合鞋底嘅赤足設計理念，鞋面選用高級單向延伸性微纖維（AdapLite Microfiber Material）製成，輕薄、柔軟之餘，仲有充足嘅橫向抵禦能力，射波時就算鞋底大幅度屈曲，鞋面喺強力拉扯下都保持貼腳效果，令射門效果可以「足本」發揮。

可說是為射門而生嘅evoPOWER，中前場嘅攻擊球員當然當係寶，但會否被龍門視為眼中釘？飛馬龍門吳逸凱就唔認同，他表示︰「evoPOWER嘅赤足設計其實好好用，我都着咗一個月左右，開龍門球唔似以前咁嘥力，已經斬到上前場，仲好夠準。」至於佢嘅後防拍檔、擔任兩閘嘅鄧景煌及唐建文都一致認為，每當要長傳助攻，尤其是落底傳中時，evoPOWER嘅射門設計正好大展所長，咁講法，即係全場11個人都夠使啦！

用家有Say

吳逸凱：「我之前着evoSpeed，鍾意佢夠輕，原來evoPOWER仲輕過佢，郁起上嚟都靈活啲，有助橫移同埋撲波。」

鄧景煌︰「好舒服、好貼腳，而且都算輕，其實evoPOWER嘅功能設計都好適合後防，好似落底傳中就有好大幫助。」

麥基：「呢對新Boot有好高彈性，射波時更加有力，而且好輕、好舒服，令步伐靈活之餘，加速都變得容易咗。」

唐建文：「同之前嘅PowerCat相比，呢款新Boot輕咗、貼腳咗，控球、跑動時就有好大幫助。」

驚鴻一瞥簽名珍藏

今次活動唔只試Boot，PUMA HK仲專誠同總廠借咗唔少珍藏品Show畀傳媒睇，當中包括有法比加斯簽名嘅evoPOWER，以及有法比加斯及馬高萊斯簽名嘅evoPOWER 1足球，非賣品是也。同場仲有一對迷彩配色嘅evoPOWER，屬全球限量1,000對嘅特別版，香港方面就只係借到一對喺今次展出，只能望梅止渴。除咗今次活動，希望PUMA HK會考慮將以上珍品公開做短期展覽，畀各位球迷開吓眼界都好吖！

巴塞隆拿全球首發

喺香港舉行嘅Vicon測試活動，靈感嚟自上個月喺巴塞隆拿舉行嘅evoPOWER全球首發會，當日亦都喺一個室內場地進行試Boot活動，參與者包括法比加斯、馬高萊斯及巴洛迪利，不過所射嘅龍門就比香港大好多，龍門幕牆仲會即時顯示射球位置與力度。就連亨利都應邀到場做嘉賓，雖然佢冇落場踢埋一份，不過以佢嘅神級地位，自然引起全場哄動，就連法比加斯、馬高萊斯及巴洛迪利呢三位已經獨當一面嘅新進球星，在場都變埋做亨利嘅粉絲。

查詢：

2834 3821（PUMA Concept Store）

2398 0004（SFALO）

2348 3555（Elevens Group）