新正頭遊戲廠商都未「啟巿」，今日上場的Wii U《Donkey Kong：Tropical Freeze》算得上是唯一值得玩的新作。多集《Donkey Kong》玩法都係大同小異，採用橫向捲軸動作方式進行，靠執香蕉使出必殺技，但今集勝在可以任揀拍檔上場，大戰維京生物Snomads，並且是系列作品中第一隻以高清製作的遊戲，Fans們及Wii U機主都值得捧場！

儲滿一百條香蕉就能同拍檔合力使出必殺技。

飛身怒踢大幾倍的北極熊，迫力十足。

雙打需用Donkey Kong配搭另一位拍檔出戰，如圖中就由Donkey Kong搭上Dixie Kong。

今集Donkey Kong識得游水，游水途中都能夠出招攻擊。

角色可搭乘木桶火箭飛天執香蕉。

戴上維京海盜帽的海象並唔係人咁品，非常難纏。

拎住流星錘、非常暴怒的北極熊會在第五關中出現。

場景設計風格豐富，一如遊戲標題，可由熱帶雨林打到冰天雪地。

《Donkey Kong：Tropical Freeze》

Donkey Kong搭拍檔出征

Wii U主機銷售量強差人意，玩家不時批評任天堂不斷推出的「Mario」系列、「Zelda」系列只係舊瓶新酒；相比之下，《Donkey Kong》系列出Game頻率唔高，雖然玩法都係差不多，但仍保持到一定新鮮感。上集家用版《Donkey Kong》已經是十年前的《Donkey Kong Returns》，當時都仲係「低清」Wii版，今集《Donkey Kong：Tropical Freeze》就名正言順乃系列中首隻「高清」遊戲。Donkey Kong自然是遊戲的第一男主角，除此之外，還有三個拍檔Diddy Kong、Dixie Kong同Cranky Kong幫手，Cranky Kong更加首次成為可操控角色；雙打時一定要Donkey Kong出場，而另一個角色就可從三位拍檔中任揀一位。

叢林打到冰天雪地

今集故事講四位角色在熱帶海島上慶祝生日時，突然畀一架維京海盜船進襲，刮起一陣冷風將全島冰封，Donkey Kong同埋三位朋友被迫退守海島，再從另一條路線反攻重奪家園。遊戲中總共收錄六個海島舞台，每個島嶼都有唔同風格，由最初叢林，一路打到滿布紅葉的秋日版圖，再直踩熱帶雨林、水底世界及最後兩關的冰封世界，挑戰北極熊、維京企鵝同維京海象等一眾Snomads生物。值得一提係今集Donkey Kong首次學識游水，可在水底一邊游一邊進行攻擊。此外，今集Donkey Kong仲識得拎高敵人擲出攻擊，又或者從地下抽起重物，話唔定會發現隱藏秘道或寶物！玩家可能會覺得動作風格有啲似好耐以前嘅《Super Mario Bros. 2》，其實都唔奇，話晒兩隻遊戲都係由田邊賢輔製作。

儲百蕉合力發動必殺技

由於今集以高清製作，畫面表現當然比以往精細得多，場景轉換以至動作流暢度都不俗。遊戲亦加入載具設定，角色可以乘坐礦車及木桶火箭高速移動，不過動作過快有可能會撞親，如果本身已有「Crash Guard」道具就可以頂得住一次碰撞。至於必殺技就係遊戲的精髓，一如以往，今集只要儲夠一百條蕉就能將能量計儲滿觸發Kong-POW，兩個角色就可以合力發動必殺技，一次過掃低畫面上所有敵人。咁單打時又出唔出到必殺技呢？其實都得，拍檔會走出來幫你一齊出招，事成後更會因應不同拍檔而得到唔同道具，如拍住Diddy Kong會得到「Life Balloons」，拍住Dixie Kong會獲得可以加命的「Golden Hearts」，而Cranky Kong就會有「Banana Coins」，揀拍檔其實都幾重要。

Info

類型：動作

開發：Retro Studios

平台：Wii U

推出日期：今天

售價：$5,700