最紅Ka版沙煞比爆甲顯骨氣
過年難得有幾日假，終於肯「的起」心肝砌番部紅卜卜嘅Master Grade模型—1:100 Ka.版沙煞比（Sazabi）應吓節。相比起2001年嘅同系舊版本，今次由機設大師角木肇重新詮釋，參照日本台場「GundamFront Tokyo」當中天幕劇場DOME-G上映時嘅造型，又追加埋裝甲細節，機身嘅紅色又細分為三種唔同深淺度，為呢款26年前嘅機設重新注入生命力，最精彩莫過於Psycho Frame爆甲設計，露出精神骨架，加埋原創Long Rifle，同一年前推出嘅Ka.版Nu Gundam襯到絕，唔買冇朋友！
MG 1:100 MSN-04 Sazabi Ver. Ka.
建議零售價：¥9,000
基本武裝齊備，更抵讚係盾牌分模仔細，增加立體感，槍管又用細節扮夾口，減少毛縫位。
礙於沙煞比頭部需預留LED着燈Gimmick，故此模型另附馬沙連透明駕駛艙，純粹Display，放唔到入沙煞比嘅頭內。
胸甲造型較舊版強悍，不過爆甲效果唔及肩甲及其他位置明顯。
先打開頂層，再拉出肩外側嘅淺紅色裝甲，就會露出銀色內構，留意呢個滑動機關比較脆弱，容易折斷，千祈咪用蠻力。
前、側裙甲嘅趟出效果比肩甲暢順，隨盒又有精緻水貼，成個Look當堂Detail晒。
背部裙甲嘅爆甲效果更誇張，利用油壓管將裙甲兩側尾端向外拉出，再反出驅動噴嘴。
發動浮游炮時，需要將Container拉出，繼而打開活門，Funnel兩側就會顯露銀色內甲。
新招演繹Psycho Frame
《馬沙之反擊》嘅古仔講到，「紅彗星」馬沙駕駛嘅沙煞比，跟死對頭阿寶嘅Nu Gundam，兩者嘅機體都內置「Psycho Frame」腦波傳動骨架，藉此提升機動性。去年Ka.版Nu Gundam就採用爆甲透出綠色內構呢種新招，形象化表達Psycho Frame嘅發動效果。正當大家認為Ka.版沙煞比照計會爆紅甲之際，點知原來係顯露銀色內構，突出嘅位置有肩甲、裙甲及小腿，都用咗滑動趟甲機關呈現銀色骨架，至於背部大型裙甲就更誇張，中央處加入油壓管，將裙甲兩側尾端向外拉出，懸空嘅位置就從內反出驅動噴嘴，增加推進力，馬沙嘅專用機體，果然例必快過尋常MS起碼三倍呀！
Long Beam Rifle霸氣盡現
Nu Gundam有浮游武器飛翔炮，沙煞比亦有六枚圓筒狀Funnel浮游炮，收藏於名為「Funnel Container」嘅背包，背包底下連接兩枚大型燃料槽。舊版MG Funnel Container已經有打開機關，將六枚Funnel收納其中；新版MG就搞搞新意思，先將Container本身拉出並且打開活門，Funnel兩側會多一組銀色內甲，細緻度比舊版更加豐富，加上每枚Funnel都可以變成攻擊形態，美中不足係隨盒冇專用底座作Display用途。其他武裝方面，除咗腰間嘅擴散式粒子炮、主要配槍Beam Shot Rifle，以及收喺盾牌內嘅兩把Beam Tomahawk外，仲有「Dome-G」版本嘅新武器Long Beam Rifle，同巨盾一樣夠晒霸氣，個人認為比起Beam Shot Rifle更加襯沙煞比。
查詢：2433 1828（瑞華行）
