粉紅March暖洋洋立春粉嶺遊

今日係大年初五，正值立春，如果仲未開工，又唔想再去拜年嘅話，不妨到郊區逛逛，新正頭吸吓清新空氣，自然龍馬精神啦！今次我哋拍住日產（Nissan）March入粉嶺，唔只有士多啤梨食，又可以順道去雲泉仙館拜太歲兼食齋，清清之前幾日狂食蘿蔔糕嘅熱氣。

$155,800（已扣除環保稅務優惠，只限四月一日前出車。）

由依家到五月都係士多啤梨嘅當造期，唔摘等幾時？

除咗神明，雲泉仙館內有逾百盆盆栽，園內各處都綠意盎然。

館內大殿所供奉嘅，就係八仙之一、別號「純陽子」嘅呂祖仙師。

元辰殿供奉咗斗姆元君及60位太歲，每年都吸引唔少善信上香參拜。

今次同行嘅March，車身用咗罕有嘅Nadeshiko Pink顏色，加埋紫色嘅皮革座椅，內外都充滿少女Feel。

1.2L直三CVTC引擎，動力輸出傾向線性，唔只易操控，耗油量又低。

儀錶板中央設有扭軚角度、輪胎方向及車輛行駛方向顯示，就算新牌仔拐彎、泊位都更有分寸。

正如主流揭背車一樣，March嘅後座椅背可以向前放平，大幅增加載物量。

遊田園訪寺廟　清新口福

位於粉嶺打鼓嶺嘅阿方有機士多啤梨自摘園，佔地10萬平方呎，由現時至五月期間，正係士多啤梨嘅成熟期，分外鮮甜多汁。士多啤梨園不設入場費，歡迎遊客入場親手採摘，摘得幾多就幾多，每磅以$60計算，平過街市。至於士多啤梨園旁邊，係香港五大著名道觀之一嘅雲泉仙館，供奉別號「純陽子」嘅呂祖仙師（即八仙之一嘅呂洞賓），係拜太歲嘅熱門地點，每逢農曆新年，供奉太歲嘅元辰殿特別香火鼎盛；呢度嘅齋菜亦相當出名，選擇多達30幾種，心水推介有雲泉鼎上素、錦繡喜團圓、五柳素石斑及豉椒炒田螺等。駕車前往嘅話，可沿大埔公路北行，駛至粉嶺公路粉嶺沙頭角（7C）出口，左轉出百和路，經馬會道、沙頭公路龍躍頭段往沙頭角方向前往，直至見到坪輋路牌，左轉入坪輋路，再過約三分鐘車程就到，雲泉仙館設有公眾免費停車場，泊車相當方便。

。阿方有機士多啤梨自摘園

查詢：5608 2643

。雲泉仙館

查詢：2674 2194

耗油量少　筍價出車有限期

今次同行嘅March，係一款慳油嘅城市小汽車，頭冚底下嘅1.2L直三引擎，馬力及扭力分別達79ps及10.8kgm，雖然唔可以預期加速狠勁，但係應付本港路面仲算綽綽有餘，最抵讚係追加咗智能停車熄匙系統（Idling Stop System），只要電池儲電量充足，停車時就會自動熄引擎，直至鬆開制動腳踏先會重新點火，期間冷暖氣及音響系統仍可如常運作，藉此減少引擎怠速時間，提升燃油效率，根據日本JC08模式計算，平均耗油量為23km/L，以目前油價計算，油費只需約$0.7/km。據代理表示，四月一日前出車嘅話，車價依然可享環保稅務優惠，隨車設備又包埋對應USB嘅音響系統，實在係相當划算嘅上車盤。