耀目煙花靚相嘩嘩聲

年初二傳統節目，就係去維港兩岸霸定靚位欣賞五光十色的煙花匯演。唔想齋睇咁悶，今晚就記得帶齊相機同三腳架影低最燦爛一刻，如果學埋煙花拍攝小貼士，其他人睇到你嘅靚相肯定嘩嘩聲！

要捕捉多款煙花，需要透過B快門作長時間曝光，再利用黑卡在兩款煙花之間遮擋鏡頭，以免曝光過度。

利用遠攝鏡頭可拍攝低位的煙花，不過煙花的位置難以預測，有需要時不妨加以裁剪。

廣角鏡頭有利拍攝廣闊環境，一鏡攝盡中位和高位的煙花。

其實黑卡是普通一張可用不反光黑色卡紙，一般文具店有售，裁剪成足夠覆蓋鏡頭尺寸即可使用。

為確保影相夠穩定，可用快門線或遙控快門線輔助，以免按下快門時令相機搖晃。

Canon EOS 6D
$13,980（淨機身）（a）

Sony α7/α7R
$16,990（α7R淨機身）、$11,990（α7淨機身）（b）

Fujifilm X20
$4,880（c）

必影煙花推介：
第四幕：笑口常開喜迎春
此幕有密集的「吉」字、「8字」及「金元寶」等寓意祝福的圖案及文字，並以《祝福你》作為背景音樂。

第八幕：一馬當先聲威震
壓軸登場一幕，U形銀色馬蹄由西至東發放，之後「銀色馬尾」緊隨出現，有年頭行運到年尾的意思。

捕捉煙花靠B快門

影煙花比影夜景的要求為高，曝光的時間更長，拍攝時需要使用手動對焦設置無限遠，並應設定最低感光度，以及將光圈收細至F8至F22。而關鍵係快門速度需大約3至10秒，再因應現場環境調節曝光。假如想有兩個或者多個煙花在同一畫面出現，就需要利用B快門，以及俗稱黑卡的不反光黑色卡紙，等第一個煙花爆發後再用黑卡遮擋鏡頭，避免繼續曝光，而第二個煙花發放時便拿開黑卡，就能夠同時捕捉到各式煙花。若然相機冇B快門長曝點算？其實大部分相機都備有煙花拍攝模式畀初學者用，幫你Set好快門、白平衡等設定。

長短鏡構圖須知

始終影煙花需要慢快門的配合，除非你自問天生「石膏手」，否則一定要出動三腳架和雲台，以及快門線或無線快門線，確保相機穩如泰山；現時唔少相機都加入Wi-Fi功能，透過手機遙控拍攝可取代傳統快門線。此外，鏡頭的選擇都相當重要，不同的鏡頭會拍出相異效果，例如遠攝鏡頭適合拍攝煙花特寫，對於鎖定中位高度的煙花特別有利；而廣角鏡頭就用作拍攝整個環境，同時覆蓋到中位和高位煙花，之不過煙花的位置頗難捕捉，建議後期裁剪相片，會較合心水。

首5至8分鐘最重要

今年的煙花匯演將會持續23分鐘，雖然有足夠時間畀你影好多相，但事實上最佳的拍攝時間只得開頭5至8分鐘而已，因為煙花發放後會留下灰燼形成煙霧，假如今晚風力唔夠大甚至冇風，就會有一層薄霧留在半空，之後的煙花影出來會白朦朦一片，所以影友要好好把握初段的時間。就算今晚有風幫你吹散煙霧，都要避免站在順風位置拍攝，否則煙霧會迎面吹過來，之後的煙花相都一樣會矇查查，故此要密切留意天文台的風向預測。