出門科技事清單睇住執

預備篇︰先租Pocket Router 外地任上網

想喺外地用手機上網，有人會選擇去到當地先買SIM卡或者借手機。如果驚去到言語不通兼唔識設定，就一於喺香港租Pocket Wi-Fi啦！其實市面上有唔少漫遊Pocket Wi-Fi租借服務，例如維訊數據（Vison Data），上佢網頁www.visondata.com或者電話預約後，就可以去門市攞機，服務逐日收費，好似台灣、韓國等地都係每日$60，無限數據之餘，亦可以Share訊號畀五個裝置，幾個朋友一齊夾錢租就最抵！

Microsoft Surface Pro 2 計劃行程

就算行程計劃得點周詳，到達當地都總要Check吓資訊，改吓Planning。唔想拎Notebook，就可考慮行Windows 8.1作業系統嘅Surface Pro 2。此機備有10.6吋屏幕，平時可以當Tablet篤芒操作；想打字時，可以外加Type Cover 2，再打開埋機背支撐架，馬上變身Notebook。

Zkin 孭得舒適

Gadgets當然要拎得安全又孭得舒服，女仔可以揀Zkin Harpy系列，袋身採用環保皮革，內層則有加厚軟墊，擺放無反、DC都冇問題；設計似足休閒手袋，女士一定鍾意。而男士就可以選擇Zkin Yowie背囊，可放一機三鏡，下層兩側及正面都可以打開，方便隨時拎出器材；此背囊用上跣水物料，落雨都冇有怕。

交通篇︰Asus The New PadFone Infinity 睇片自娛

喺交通工具上最啱就係睇電影消磨時間。手機、平板二合一嘅Asus The New PadFone Infinity就最就手，佢係由一部5吋芒手機及10吋平板基座組成，平時手機可獨立使用，想用大芒睇片時，將手機插落平板基座，手機作業系統及資料唔使一秒就會轉移，睇片超爽，仲唔使將影片、歌曲特登過落平板咁麻煩。

Creative Aurvana Platinum 隔音煲歌

鍾意聽歌的話，不妨考慮Creative Aurvana Plantinum耳罩式耳機，佢備有50mm動態驅動單元，低音有保證，又內置四個咪高峰收集耳機內外噪音，配合主動消噪技術，可以減低90%外界噪音，就算機艙入面有BB喊都可過濾；加上支援「ShareMe」技術，一個音源就可以喺兩部耳機上同時播放，二人齊齊聽就最啱。

景點篇︰Sony α5000 的骰無反

旅行影相是指定活動吧！Sony新出嘅α5000備有2,010萬像素APS-C感光元件，支援最高ISO 16,000感光度，日景、夜景都難佢唔倒。最重要係機身僅重210g，號稱為全球最輕巧APS-C可換鏡相機，拎去旅行絕不累贅；再加上支援Wi-Fi及NFC無線過相，又有180度翻芒，過相落手機又得，玩自拍亦得。

Pringo 靚相即印

影了無數靚相，係咪好想印出嚟派街坊？呢部Pringo流動相片打印機可打印手機內的相片，對應Android及iOS，簡單易用。佢採用熱昇華技術，印出嚟嘅相片可防褪色、防指紋，仲有銀色色帶，可以打印出閃令令嘅金屬邊框，效果勁靚。最重要係機身僅重394g，好輕巧。

Tunemax Ruggedpower 電量補給

又影相又Upload，Gadgets電量好易扯乾。呢款Tunemax Ruggedpower外置充電池的電量有9,000mAh，電流輸出亦達2.1A，兼且備有兩個USB輸出，可同時替兩部裝置充電；犀利在佢支援IP67防水標準，跌落一米水深都頂到30分鐘；另外兼具防撞、防塵功能，仲有埋指南針，玩戶外活動就啱晒。

Eye-Fi Mobi系列SD卡 靚相傳手機

靚景梗係想上載到Facebook、Instagram，如果要搵電腦左拮右插就太麻煩喇，一於用Eye-Fi Mobi系列SD記憶卡啦！用家只需於手機安裝《Eye-Fi》App，一經配對即可將相機相片Wi-Fi無線傳到手機，上傳話咁易。

Muku Shuttr 自拍遙控

手機自拍有時拎機角度好難遷就，大合照時又要搵路人幫手。Muku Labs呢款無線遙控快門配件Muku Shuttr就啱使，透過藍芽與iOS或Android裝置配對就用得，唔使額外下載專用App。配件上方特設小孔，方便用家將佢繫於鑰匙或拉鏈上，冇咁易整唔見。

酒店篇︰aMagic MagDapter 萬用轉插

玩足成日返到酒店，第一件事就梗係要幫各樣Gadgets充電。呢款MagDapter有齊各國嘅電源頭，一個在手就世界通行；另外，插頭上仲提供兩個USB，方便為Gadgets充電。

Unitek Y-2155 十個USB分插

USB插頭唔夠用都好頭痕，點算？Unitek Y-2155備有十個USB插口，最正係每個插口均支援2.1A電流輸出，可穩定地同時為十部裝置充電；加上產品設有智能防過充保護IC及散熱風扇，夠晒安全。

Tenda W300M 室內Wi-Fi

未必每間酒店都有免費Wi-Fi服務提供，最穩陣當然係自備旅行Router。Tenda W300M備有AP、Client+AP等多種模式，一插即可將有線網絡變身為Wi-Fi，方便到暈！其最高傳送速度亦達300Mbps，仲可以由USB取電。

Nude Audio Move 靚聲喇叭

想喺酒店聽音樂，可帶埋Nude Audio Move喇叭。喇叭分大中細碼，其中Move S就最輕巧；而Move L體積就最大，但音量輸出就最勁，焚機都掂！另外，Move系列喇叭支援藍芽技術，連接手機、平板電腦都好就手。

查詢：（a）www.microsoftstore.com、（b）3104 8356、（c）3582 4738、（d）2958 1113、（e）2345 2966、（f）3619 6500、（g）2611 4131、（h）2553 1151、（i）2152 8000、（j）3188 4983、（k）2959 6226、（l）3568 3478