Hello Kitty上身K6智可愛

要數妹子最愛的動漫Icon，Hello Kitty一定名列榜首；無論佢出啲乜，妹妹仔都必定瘋搶！最近台灣卡通手機品牌Katoon就跟Sanrio聯乘推出智能手機K6，不但包裝、機面印上Cute爆貓樣，就連內裏都注滿可愛元素，保證女生見到實大嗌︰「卡娃兒呢！」

$2,980

附送白色Flip Cover，方便隨時替換。

Wallpaper及圖案都係Hello Kitty元素，絕非公版咁簡單！

紅色底蓋印有大大個貓樣，萌到爆！

同期還有Little Twin Stars及My Melody款式，售價相同。

附送入耳式耳機，可惜音色一般，未夠清晰。

支援雙卡雙待功能，另外可加插microSD卡擴充容量。

隨機額外送多枚1,650mAh電池及叉電器。

預載十款專屬Wallpaper，妹妹仔必定畀Like！

可開啟BesAudEnh技術來執靚耳機音色。

Benchmark跑分較低，只達S2級數。

對焦及儲相都快，並支援篤芒對焦。

3G上網睇片流暢，但屏幕解像度只有720p，質素一般。

萌爆貓樣背蓋

Katoon這個名字大家或許較為陌生，但若有留意台製手機的話，一定知道他們專門與卡通品牌合作。自2009年成立後，他們已先後與Snoopy、Forever Friends等合作，最近終於獲Sanrio授權，可一口氣將Hello Kitty、Little Twin Stars及My Melody等人氣角色加到K6手機之上。今次測試的正是Hello Kitty版本，正面看驚喜不大，5吋屏幕加直板機身更有幾分Galaxy S3影子；不過一翻到機背，紅色背蓋印有大大個Hello Kitty公仔，就連小記堂堂一個大男人都暗叫可愛！特別一提隨盒還附送一個白色Flip Cover，同樣印有可愛萌樣，方便大家替換。

預載可愛Wallpaper

叫得聯乘手機，當然不止外殼一環。甫開啟K6，就見到程式圖示全部加入了Hello Kitty的招牌紅色蝴蝶結，同時系統更預載了十款專屬Wallpaper，一星期天天換款都換唔晒！硬件方面，一般卡通手機大多得個樣，只提供撥電、短訊等基本功能，然而此機運行的卻是Android 4.2系統，並內置1.2GHz四核心處理器、1GB RAM及8GB內存，雖然Benchmark跑分成績一般，但實測見運作尚算暢順，玩一般遊戲、睇片都應付自如。另一叫女生動心的是其拍攝能力，首先前置鏡頭有500萬像素，已具備一定自拍質素，而其後置1,200萬像素鏡頭更支援一笑即拍、全景、HDR及美顏「分唇」，保證滿足女生們的Snapshot需要！