80年代可說是模型界的全盛時期，當其時模型師橫山宏以二次大戰為創作靈感，構思咗一個虛擬嘅軍事世界「Maschien Krieger」（簡稱：Ma.K.），故事講述喺第四次世界大戰後，移居外太空嘅人類為重臨地球，展開咗澳洲獨立僱傭兵團跟德國民主共和國軍之間嘅角力，當中兩款最著名嘅機械裝甲模型—S.A.F.S.及P.K.A.，直到依家都係模型界高手嘅摯愛。如果你都鍾意橫山大師嘅美學風格，但自問砌模型未夠班嘅話，千值練最近推出嘅共和軍1:6 P.K.A. KAUZ完成品，正好係閣下那杯茶。

千值練
1:6 KAUZ Splinter Camouflage ver. $650

駕駛員只有上半身，無法獨立展示，削咗啲喎！

打開駕駛艙，就可放埋駕駛員入去，仲可以戴頭盔。

引擎噴嘴可以上下轉動，不過小心Ball Joint比較鬆，容易脫落。

左、右腳各有三組活動關節，擺動起來似足太空人踏步。

將KAUZ頭部正面嘅活門向上推，然後分開主體側甲，就可露出駕駛艙。

左手有機關槍作為固定武裝，膊頭及手肘就有可動關節。

機身後方左側有十字架棺木標誌，加埋折線迷彩，分外醒目。

Brave-Act
《進擊之巨人》兵長里維$580

披風可以拆落嚟，玩多一個Look。

調查兵團嘅浮雕標誌夠晒立體，比一般嘅塗裝或者貼印講究得多。

機動立體裝置嘅塗裝充滿金屬感，留意造型手掌有兩款之分，可以變成反手握劍。

配色細節有根有據

呢款P.K.A. KAUZ係專為於月球執勤嘅宇宙用裝甲戰鬥服，根據配色設定，屬於故事中「第54驅逐航空團」本部小隊嘅隊長專用，識別特徵係灰色嘅不規則折線迷彩，仲有手臂前端跟頭部正面視點嘅黃色間紋，以及機身後方左側嘅十字架棺木標誌。作為寫實風格嘅軍事科幻玩具，千值練喺塗裝及Marking細節方面都做足工夫，夠晒精緻。若然主體再重手啲加上舊化塗裝，毋須玩家再自行後工嘅話，咁就真係冇得彈。

駕駛艙細節做足

除咗賣相OK之外，千值練嘅Ma.K. KAUZ亦有玩味Gimmick，包括駕駛艙可以打開，艙內嘅磨沙皮椅、操控錶板以及喉管線路，統統做得好仔細，隨盒仲有着上太空服嘅駕駛員Figure，可以直接放入艙內扮，設計頗似《裝甲騎兵》，可惜只得上半身，唔可以完整地獨立Display。好彩可動部分都算多，包括手肘、雙腳、頭頂天線及引擎噴嘴等19個關節，配合專用台座，可以擺番個偵察甫士。

同場加映：Cool魔斬巨人1:8兵長駕到

千值練唔只科幻玩具整得叻，連動畫Figure都一樣在行，其1:8角色景品Brave-Act系列就有新作推出，正正係《進擊之巨人》裏面身手不凡、為人Cool到爆嘅兵長里維。角色原型由造型師石山裕記擔當，顏色監修就係自家員工早川洋司，唔只面相神情似足TV版，就連專屬兵團服飾以至腰間嘅機動立體裝置，都有恰如其分嘅塗裝，最抵讚係披肩嘅調查兵團徽章，以浮雕方式製作，並唔係求其印上去，如果廠方對自家嘅雕工水平唔係有十足信心，相信就唔敢捨易取難啦！

查詢：2751 9018（熱血童盟）