下個星期就過年，相信唔少車主都已經洗乾淨部車，準備迎接新年來臨。仲未？諗住呢幾日先去洗車屋？咁你要有心理準備大排長龍，可能仲要畀附加費。唔想喺街排幾個鐘頭嘥時間，不如自己郁手，只要你部車唔算太污糟，身邊又有適當工具，只需一個鐘左右，已經可以幫部車變番靚，而且花費比幫襯洗車屋划算得多，何樂而不為？

車身篇
清潔車身前嘅第一個步驟，就係徹底清除車身上嘅沙石、灰塵。

將海綿或塵掃套上伸縮棒，清潔車頂就輕鬆得多。

清潔車身可用清潔液或慕斯（Mousse），兩者功效相近。

最後才清洗輪圈，但唔好用同一塊布清潔車身及輪圈。

法寶全攻略
玻璃清潔劑 $65
有效分解油膜，令視野變回清晰。

輪圈清潔水 $98
具有強力去污功能，甚至可去除殘留在輪圈表面的迫力粉。

洗車慕斯 $190
兼具潔淨、撥水及回復光澤等效用，方便之至。

撥水塗膜 $78
在玻璃表面塗上，雨天行車仍可保清晰視野。

強力吸水布 $220
尺寸達60×120cm，吸水量約1L，輕易就可抹乾車身，而且不留毛頭。

玻璃塗膜 $240起
喺車漆表面加上玻璃塗膜，有撥水及防酸雨功效，有效期達一年以上。

塵掃黃：$65、黑：$350
選用品質較佳嘅塵掃，可以更徹底掃走表面灰塵，減低傷害車漆嘅機會。

車廂篇
使用適當嘅皮革清潔劑，就可令座椅皮面回復光澤。

皮革清潔劑 $98
不但可去除污漬，對皮面還有保護作用。

車廂清潔液 $98
含抗紫外線成分，有助預防陽光造成的損害，適用於塑膠、橡膠和皮革表面。

將吸味啫喱放喺櫈底，就有除菌及消臭功效。

吸味啫喱 $55
放一個喺櫈底，就可去除車廂異味。

洗車要講步驟，唔可以亂嚟，否則會弄巧反拙，唔只有機會整花車身，細節到使用唔適合嘅毛巾抹車，都會搞到車身黐晒毛頭，所以千祈唔好貪方便求其執條「祝君早安」抹車就算；洗完車後，仲可以幫部車做個玻璃塗膜（Coating），愛驅即時容光煥發。其實自己洗車唔複雜，大概一個鐘左右已經搞得掂，但緊記唔好喺繁忙或者太僻靜嘅地方進行，一來避免阻礙其他行人，二來減低遇劫嘅風險。另一方面，洗車都要顧及公德，唔好隨街傾倒污水，尤其是喺公眾地方棄置例如偈油等化學物品更屬違法，千祈咪試！

輪圈最後處理

除非部車有千年污漬，或者車身黐咗石屎、瀝青等，否則洗車都可以自己一手一腳搞掂，所需用品亦唔多，就算自己做埋塗膜，埋單都係幾百元，洗車工具又可循環使用，加上一支幾十元嘅清潔劑可以用好多次，折算起來，每次洗車成本可低至二、三十元，一年慳番唔少。不過，洗車要講步驟，譬如行車過後，千萬唔好即刻用水淋向輪圈，咁做有機會令迫力碟因冷縮熱脹而變形，建議先清潔車廂，等制動系統冷卻後，先至清洗車身及輪圈。清潔車身前，必須先淋濕車身（用高壓水槍更佳），沖走車漆表面嘅灰塵，如果所處位置冇自來水，可改用塵掃，千萬唔好未清走沙石及泥塵，就用洗車液及海綿捽擦，此舉好易刮花車身，到時搞到部車傷痕纍纍就難睇了！

產品查詢：2392 4244（台日）