話咁快就到農曆年，開始大掃除執屋掉舊嘢未？今時今日，換手機隨時快過換新裝，舊型號擺喺屋企就嫌阻碇，畀家中長輩又未必啱用；咁不如拎去賣機或者Trade-in啦！一來可以送走舊物，二來又可以為新手機幫補機價，一舉兩得。

百老滙門市全線都有做相關推廣，不過就唔係間間都收iPhone系列。

豐澤Trade­-in服務涵蓋家電，主婦應該較Buy。

百老滙除LG G2等機款，Trade­-in Galaxy Note 3都有優惠。

留意百老滙多款熱門舊機回收價一目了然，當中以Galaxy S4個價最誇，竟然收成$4,500。

小記睇過網上討論區，好多朋友都因為百老滙嘅優惠而狂出LG G2。

DC Fever網站設有二手買賣區，相機、手機、耳機、遊戲機乜都有。

二手價由賣家設定，遇上定價過低的產品，可要提高戒心。

G-World Mobile負責人Lo哥表示：「依家機款以篤芒為主，檢查時會着重屏幕是否靈敏，觸控位置有否偏移。」

DC Fever網上業務總監Ricky表示，C2C平台誠信最重要，交易時一定要參考評價系統及交易記錄。

先達回收價行情
iPhone 5s $4,700至$4,800
iPhone 5 $3,400至$3,700
iPhone 4s $2,200至$2,400
iPhone 4 $1,300至$1,500

Galaxy S4 $2,500至$2,700
Galaxy S3 $1,500至$1,800

百老滙靚價成網上熱話

唔少大型電器、手機連鎖店都有Trade-in服務，可惜收機價通常都會低啲。不過最近竟然出現反常現象，講緊嘅就係百老滙二手機回收優惠，仲引來網民熱烈討論。小記走訪過多間百老滙門市，原來只要購入LG G2、Sony Xperia Z1、HTC One Max等指定機款，舊機回收價即時加$1,500。假設大家用Samsung Galaxy S2嚟Trade-in LG G2 32GB，前者原本回收價僅為$700，但此計劃下就變相收$2,200，補$2,998就可以買到原價$5,198嘅LG G2，都咪話唔吸引！不過要留意，店員收機前都會檢查舊機是否操作正常，如屏幕破裂、Home鍵失靈、Wi-Fi失效、入水、「脹電」等情況都一律唔收。

豐澤手機換家電

想將Gadgets Trade-in換其他電子產品？咁就要睇豐澤嘅Trade-in服務。佢特別在除回收手機之外，仲接受MP3播放器、手提攝錄機、手提遊戲機、相機共六種產品， 之後就可以換購九種新產品，包括Notebook、MP3播放器、手提攝錄機、手提遊戲機、相機、電視、洗衣機及雪櫃。小記即場問過店員iPhone 5個回收價，雖然僅得$3,050，但勝在Trade-in新產品種類夠多元化，仲有走實用路線嘅家電，有辣有唔辣。

先達放機iPhone最值租

想賣舊機，最方便直接梗係去旺角先達，因為場內幾乎每間舖頭都提供回收二手手機服務。有多年收二手手機經驗嘅G­-World Mobile負責人Lo哥表示，先達各店都會特別仔細地檢查二手手機，如有機身損耗、屏幕「烙印」等問題，都會扣減回收價，如機身太殘舊的話，大概扣$200至$500不等。

Lo哥仲話：「依家行貨、水貨，有盒、冇盒對回收價影響不大，反而有Sim Lock嘅水貨iPhone回收價就會扣成$1,000至$2,000！咁多手機之中，以iPhone系列最保值，iPhone 5及iPhone 4s回收價最高都仲分別可放$3,700及$2,400。」

網上放機賣價合理

想價錢有機會嗌高啲，可試近年興起的C2C（Consumer to Consumer）網上買賣平台，其實即係賣家直接放上網同買家聯絡及交易。

其中DC Fever網站嘅二手買賣區就夠多人用，其網上業務總監Ricky表示：「網站二手買賣區提供一個免費平台供用家買賣貨品，賣家刊登產品，買家只須透過PM留言即可以聯絡，過程直接又容易，最重要是買賣價錢較一般二手回收的店舖合理。」

Ricky提醒大家：「C2C平台始終都係講誠信，所以買賣前最好參考對方嘅評分及評價。比較少人留意是，因為產品的資料是由賣家提供，篇幅有限之餘，新舊程度、花痕等都屬主觀睇法；所以賣家提供產品內容時，最好描述得具體一點，另外買家亦一定要問清問楚，免生糾紛。」