Lenovo Vibe X自拍控啱玩

香港地Lenovo的電腦、平板就見得多，手機則較少有；近來Lenovo一改策略，於本港推出一系列智能手機。當中5吋芒的Lenovo Vibe X機身大玩超薄設計，僅厚6.9mm，銀色機背又夠圓渾貼手，手感相當不俗。同期亦有部6吋大芒平價機S930，二千五有找，睇片抵玩！

$3,398

Vibe X外形靚仔，可見Lenovo在外觀設計上花過心思。

提供八大布景主題，並可獨立調校桌面、開機或鎖屏的畫面。

自家UI跟公版Android介面大相徑庭，初接觸較難上手，幸好有指引教用家使用。

《樂省電》是節能App，低電量時會自動把Wi-Fi、GPS等裝置關閉。

內置大量拍攝特效，一按即能預覽效果。

機背混合了磨沙金屬及鏡面物料，予人專業感覺。

一體成型設計，無法換電，microSIM卡槽也要用針拮開。

配備6吋大芒雙卡雙待，仲有得換電，方便到極。 $2,398

機身側面採用銀色按鍵，配合銀色機背極有時代感。

支援雙卡雙待，穿梭中港兩地的用家合用！

前鏡頭自拍一流

Vibe X除機身勁薄外，最令大家欣賞的一定係鏡頭。此機配備500萬像素前置鏡頭，與預設的美顏功能配合使用的話，「自拍控」一定愛不釋手。至於機背為1,300萬像素鏡頭，又有移軸、魚眼、Lomo、星芒及黑白等20種有趣攝影特效可用，Snapshot效果得意有趣；此外又支援Dual Shot前後鏡頭拍攝、可拍100張連拍及9秒有聲短片等，影相功能齊全。

5吋FHD大芒

屏幕方面，它採用的是5吋1,080p全高清IPS屏幕，像素密度達440ppi，畫面銳利鮮艷，放大文字也不見有狗牙，上網或睇片都有上佳表現。相比起屏幕，處理器就較失色，用的是效能一般的MTK6598W 1.5GHz四核心處理器，Benchmark得分不及較早前推出的HTC One X，好在一般操作尚算流暢，只要不玩賽車Game這類大食遊戲便不成問題。值得一提，其自家製UI抽走了App Drawer，並加入了大量布景主題，而且預載了慳電用的《樂省電》和防毒用的《樂安全》等大量Apps，比公版豐富得多。

Vibe X SPEC

制式︰GSM、WCDMA　

處理器︰MTK6598W 1.5GHz四核心　

記憶體︰2GB RAM、16GB內存　

屏幕︰5吋IPS（1,920×1,080解像度）

鏡頭︰前置500萬像素、後置1,300萬像素　

對外連接︰藍芽、microUSB、Wi-Fi　

電池容量︰2,000mAh　

作業系統︰Android 4.2

體積︰144×74×6.9mm　

重量：121g

同場加映：S930大芒平霸

Lenovo食住大芒機潮，推出配備6吋IPS 720p芒的S930。雖然屏幕未支援1,080p解像度，但IPS屏幕睇片表現也不失禮，只是瀏覽網頁時，放大文字會睇得出邊位不夠銳利，不過以二千五有找的價錢而言已經收貨。另一賣點是擁有雙卡雙待功能，但要留意兩個插槽的支援制式各異，一號卡槽支援3G，而二號卡槽只支援2G。