喺籃球迷心目中，80年代永遠係最好嘅時光，因為有米高佐敦、有公牛王朝，亦有最接近神的男人—柏賓（Scottie Pippen）。多得呢位「二哥」兩肋插刀、一路相隨，MJ以至公牛先贏到六次總冠軍，同時亦令球迷見識到，原來助攻、籃板、封阻一樣咁好睇！如此傳奇，擁躉自然多，但論瘋狂程度，相信冇人及得上TMC店主Thomas Leung，有關二哥嘅簽名籃球、波衫、波鞋及各式精品儲埋一大堆，仲決定公諸同好，舉辦全港首個柏賓展覽，身為籃球迷，豈可不朝聖！

TMC店主Thomas Leung

公牛聯合中心主場地板
擁有柏賓簽名，全球33塊，Thomas就有頭3塊。

柏賓掌印波
當年以原價US$7喺公牛主場買到，依家升值逾百倍。

NBA總冠軍紀念籃球
全球限量33個，呢個正係「33 of 33」，同柏賓嘅波衫號碼相呼應。

Upper Desk簽名球星卡
內附波衫碎布，已獲Beckett評分，保守估計值US$600。

2003年季後榮休場刊
保存完整之餘，仲有入場券，千金難求。

柏賓入樽油畫波
全球只有33個，頭兩個成為Thomas嘅囊中物。

Fans版簽名波衫
除咗呢件，Thomas另有金章黑色作客波衫，想睇就要親臨現場喇！

「二哥」Action Figure，頭雕、Body都可以同大廠媲美，隨盒附有磁石波及Air More Tempo等四對籃球鞋，每套售價$2,650。

柏賓嘅16號波鞋，大到呢，而且左右腳都有簽名，超罕！

有相為證，好多收藏品都有二哥親筆簽名，冇得呃！

潮流興復刻，波鞋、波衫出完又出，潮人自以為捧兒時偶像場，但係呢啲「二次創作」，珍貴程度又豈能與昔日初版比較。Thomas深明市場定律，自1998年起已搜羅各式NBA精品，由籃球、波衫、海報、磁石、砌圖到地板都唔放過，當中以公牛王朝為主，間接令佢嘅柏賓收藏都分外豐富，例如全球只有33個柏賓親筆簽名籃球，佢一個人就獨佔咗17個；印有柏賓全像嘅33個油畫籃球，佢都擁有頭兩個，加埋其他款式，單計與柏賓有關嘅籃球，珍藏數量已經超過40個，絕大部分今次都放喺TMC店內展出。

最過癮掌印波

80、90年代嘅香港，好少有NBA精品直接入口，初時Thomas只能拜託喺美國讀書嘅家姐寄返嚟，後來佢本人喺93年到當地定居後，搜購行動更加瘋狂，有時會到Collectors Show尋寶，又會直接去主場館購買，例如柏賓嘅一個掌印波，就係當年喺芝加哥公牛主場以US$7買到，時至今日已升值百倍，Thomas表示︰「呢個波畀球迷知道自己嘅手掌Size，同柏賓相差有幾遠，好玩又有紀念價值，我本人就好鍾意。仲有呢本退休場刊，亦係柏賓衣錦還鄉芝加哥，高掛33號球衣時買到，有埋簽名同入場券，絕對千金難求。」Thomas認為可能因為佢喺NBA收藏界薄有名氣，好多時有機會與外國廠商或收藏家交流，例如Upper Desk有啲產品發售前，佢都可以率先買到，彌足矜貴。

冇柏賓冇冠軍

Thomas粗略估計，計埋簽名波衫、波鞋及各式球星卡，佢嘅柏賓收藏起碼超過60件，歷年花費咗US$100,000以上，咁捨得，何解呢？佢指出：「米高佐敦固然好波，但我夠膽講，冇柏賓幫手嘅話，佢一次總冠軍都攞唔到。MJ係鎂光燈下嘅大佬，但係喺Locker Room裏面，柏賓先係大佬，佢打到1號位到4號位，同時亦將古高、洛文等球員串埋一齊，所以建立公牛王朝，佢有好大功勞。」今次嘅柏賓展覽，由即日至2月13日，入場除咗睇到各式收藏品，仲有機會買到全球限量250個嘅「二哥」Action Figure，耗時一年開發，頭雕、素體到波衫都高度像真，自認Fans嘅話就要搶喇！

展覽小資料

日期︰即日至2月13日

時間︰2:00am-10:00pm

地點︰油麻地現時點商場241、255及255A號舖