當三分王遇上空間王

甲一球隊南華嘅「三分王」劉子健（暱稱「劉子」），身高6呎1吋，即係183cm，出車嘅話，睇嚟只有MPV或者SUV呢類大車先夠坐。不過專出「盒仔車」嘅鈴木（Suzuki），唔只車身外觀，就連車廂布局都往往出人意表，今次搵嚟旗下有「空間王」之稱嘅Solio畀劉子試車，到底「空間王」係實至名歸，或是得個講字呢？

動力嚟自呢台1.2L直四引擎，馬力91ps，香港地夠用有餘。

大面板嘅彩色顯示屏幕，對應音響系統之餘，仲連接埋後波鏡頭，倒車、泊位唔使靠估。

後排空間夠寬敞，就算劉子有成6呎1吋高，當日又Gel行個頭，我哋超奄尖去計，天花與髮尖都仲有120mm空位剩，點到你唔服？

前排乘客席底下設有隱藏式儲物匣，而且附設手抽，揭起So Easy。

將後排椅背放平，就可騰出大片置物空間，點只教波，買大型電器想自取嘅話都夠位放。

日本本土版嘅Solio落足車身包圍，好動本色盡形於外。

車尾置物量相當高，擺齊籃球、雪糕筒、運動袋及運動用品，都仲有位剩。

身為南華主將嘅劉子，一星期練足三日波，而且逢周一至周五都要到荃灣及沙田教波，成日呢度去嗰度去，出入都係乘搭公共交通工具為主，他坦言：「自己揸車的確係方便啲，但係每次一想到養車嘅開支，包括租車位、入油、維修保養等，很快就打消出車嘅念頭。」其實依家唔少新車都慳油，好似今次測試嘅日本本土版Solio，平均耗油量（以日本JC08模式計算）低見20.6km/L，油費計落只係$0.8/km左右，而且今年四月一日前出車，仲有環保稅務優惠，車價只係$153,800，加上新車需要維修保養嘅地方較少，頂多隔四至六個月換吓偈油，劉子不妨諗諗喎！

後排竟然冇頂頭

生得高大真係幾着數，有型唔在講，睇落特別威猛過人，不過煩惱亦都唔少，好似劉子咁，偶爾都會坐朋友嘅順風車，頂頭情況可謂司空見慣，全程車都要做低頭族，都幾辛苦。今次搵劉子試Solio，此乃揭背小車類別，但在同級車之中，實屬高佬一族，車身高度達1,765mm，車廂高度亦有1,345mm，當劉子喺後排坐直個人之後，車頂與頭頂仲有接近200mm剩餘空間。劉子仲講笑話：「我今日Gel起啲頭髮都唔頂頭，Headroom確係好夠，值得畀個Like佢。」至於2,450mm嘅軸距，亦為後排營造出理想嘅腳位空間，劉子試坐時，唔只膝前仲有大把空位，甚至夠位放埋個背囊。

置物間隔再有驚喜

唔只車廂，Solio連車尾置物量都相當可觀，試車當日正值劉子要帶齊行李去教波，一大袋籃球、兩箱運動用品、一個裝滿波衫嘅珍寶級運動袋，加埋一堆雪糕筒，車尾都放得落有餘；如果唔係要載埋筆者及攝影師，以及協力安排嘅adidas PR，大可將後排放平，與車尾打通，變成更大型嘅置物平台。除此之外，Solio嘅車廂仲有多達20個儲物間格，包括隱藏喺前排乘客席底下嘅可移取式雜物匣；劉子就最鍾意車內嘅飲品存放架，他表示：「練完波，如果一返上車就可以隨手搵到飲品，補充水分及電解質，成個人當堂醒晒！」再者，盒仔車嘅造型一向玩Young Look，Solio嘅線條又有幾分Muscle Look，同劉子呢類運動健將都好夾吖！