Juke夠慳油入屏山減壓

家吓做香港人，真係隨時谷到爆，工時長，人工又追唔到通脹，計落返工慘過攞綜援，仲要幫仔女撲學位或奶粉，辛苦過打仗，真係唔知交稅為乜……Stop！唔好再畀負能量增長落去，有咩辦法開解自己？就趁本港郊區仲守得住，一於走入綠色世界抖抖氣，今次就夥拍日產（Nissan）Juke入到元朗屏山走一轉，仲去埋有機農莊整嘢食，幫自己嘅快樂指數止跌回升。

有逾百年歷史嘅利民會屏山樓，前身係元朗理民府，被列為二級歷史建築。

農莊內種咗逾40種時令蔬果、香草及中草藥。

手工果醬製作步驟簡單，由清洗到煮成漿再倒入樽，唔使一個鐘搞掂，大家亦可按個人喜好選擇果醬味道，包括藍莓、杧果、洛神花、金橘及士多啤梨都有得揀。

到訪當日，模特兒跟利民會社工阿Wing學整手工果醬，原來一啲都唔難，好易上手。

放平後座，就可騰出大片車尾置物空間。

後座椅設有ISO FIX兒童安全椅扣，全家大小遊車河就更放心。

皮革軚環設有多功能按鍵，軚不離手都操控到音響、藍芽及定速巡航。

中控台顯示屏嘅I-CON系統，備有「恒溫」與「駕駛」系統顯示模式。

導入全球首創雙噴注式燃油系統嘅1.6L自然吸氣引擎，馬力達117ps。

元朗屏山除咗有著名嘅屏山文物徑，附近仲有唔少有機農莊，當中包括「利民健康農莊」，係由非牟利機構利民會負責營運，坐落喺屏山一個清幽嘅小山崗上，毗鄰係有逾百年歷史、前身係元朗理民府嘅利民會屏山樓（二級歷史建築）中途宿舍，農莊成立嘅目的，主要是係透過有機耕種，鼓勵城市人與大自然接觸，推廣精神健康訊息。

訪有機農莊　DIY果醬

佔地約6,000多平方呎嘅農莊內，種植逾40種時令蔬果、香草及中草藥，遊客可參加導賞團，了解有機栽種，甚至參加園藝體驗活動（所有活動均需預約），費用由每位$15至$60不等。此行我哋就試做藍莓手工果醬及環保洗潔精，完成後可以將製成品帶番屋企自用。揸車前往嘅話，可沿粉嶺公路及新田公路往元朗方向，選擇元朗（南）天水圍（東）出口，然後跟往屏山嘅指示牌繼續行，左轉出青山公路—屏山段，駛至燈位左轉再左轉入屏山路，直至盡頭就到。農莊內提供免費泊車，對駕駛者嚟講相當方便。

居高臨下　睇位冇難度

今次同行嘅Juke屬於同系嘅標準版本，1.6L自然吸氣引擎導入全球首創嘅雙噴注式燃油系統（Dual Injector System），配合雙活閥正時控制系統（Twin VTC System）及Advanced XTRONIC CVT無段變速波箱，平均耗油量可低至15.8km/L，油費僅$1左右。慳油之餘，動力輸出亦相當夠用，馬力及扭力分別達117ps及16.1kgm，配合Dynamic Control System，已經綽綽有餘，好似由繁忙嘅粉嶺公路往上水一段，筆者選用「Sport」模式，令引擎維持高轉速，油門反應亦保持靈敏，面對多次因要避過慢車嘅切線爬頭動作，都可以暢順完成，絕無拖泥帶水；駛至相對較少車嘅新田公路，改用「ECO」模式，由波箱自行選擇合適波段，動力輸出變得柔和，從而達到省油的效果。

另一方面，Juke嘅離地距比一般三箱式房車為高，配合特大嘅Rally式頭燈，以及高抓地力嘅215/55 R17輪胎，Off-road形象頗襯今次嘅郊遊目的，而且車架採用高密鋼材鑄造，底盤紮實，喺歐洲NCAP嘅撞擊測試中，獲得最高嘅五星評級。筆者最欣賞係駕駛席位置比一般私家車為高，A柱角度又夠斜，無形中增加咗擋風玻璃面積，令視野變得更加闊，就算筆者身高只有五呎多三吋，睇位依然容易，夠晒User Friendly！