美與醜，從來就冇絕對定義，好似Action Figure嘅玩家，有人鍾意帥哥美女，亦有人狂掃Alien及Predator，總之用心製作夠神似，自然就有捧場客，好似實力派演員林雪，坊間就有大把「爸打」玩自組。各位林雪粉絲依家唔使整餐懵喇，事關ZCWO攞正「拉臣」推出嘅《機動部隊》系列1/6嘅「肥棠」，雙頭雕、肥Body加埋全副PTU裝備，似到足又多嘢玩！

ZCWO《機動部隊》1/6肥棠
零售價︰$1,220

頭雕由韓國團隊IMININE負責，可能雪爺輪廓較深，所以神似度比上次嘅華哥仲要高，而且有雙頭雕，買多個Body就可玩多個造型。

戴咗頭盔，個樣仲詼諧，留意頭盔做足金屬塗裝及舊化處理。

防彈背心有魔術貼，着法同實物一樣，背脊仲有「警察Police」字樣。

軟膠Boot精細到做埋鞋帶，上色仲好有真皮質感，抵讚！

皮製腰帶掛到好多Parts，扣位又夠緊，唔似某啲大廠一拉就斷。

隨盒附有大量小配件，最正係水樽，入戲到暈。

跟盒送八隻肥手掌，玩時一拔一插都好容易，毋須用蠻力就換到。

雖然肥棠喺戲中冇用過M870雷鳴登，但係ZCWO都做埋畀你，仲要有齊基本型（上）及戰術型兩款，夠晒闊佬！

由電影場務變成實力派演員，林雪戲路縱橫、可忠可奸，今次仲一反靚仔大晒嘅Action Figure主旋律，ZCWO發言人Simon表示︰「提起《機動部隊PTU》，好多人第一時間諗起任達華飾演嘅沙展森哥，其實林雪飾演嘅肥棠喺《同袍》一樣好搶鏡，所以我哋從寰宇電影取得授權後，已經決定出埋呢個角色，一嚟滿足Fans要求，二來亦向呢位港產甘草王致敬。」

雙頭雕 神似度高

筆者自認係偏門Figure迷，Mr.Bean、愛因斯坦等唔偏唔Like，當知道林雪都有Figure出，毋須再買「皆旺頭」自組時，實在萬分期待；ZCWO亦未有因為雪哥並非大牌明星而馬虎了事，為精益求精，特別將預售時間推遲一季，就到今天先出。以大貨所見，粗眉、矇眼、豬膽鼻加二撇雞都好掌握到真人神髓，皮膚仲有埋「火山洞」，下巴又有招牌大粒癦。或者有爸打嫌佢唔夠肥，表情又太木獨，但係坦白講亞洲人嘅面相輪廓一向唔夠西方人咁「銳利」，落刀重手咗嘅話，反而仲易走樣，況且依家一個價錢就有齊雙頭雕，短髮嗰個係肥棠，頭髮長啲嘅似足《暗戰2》嘅爛賭警察，一個字講晒︰抵買！

Parts多 任擺Pose

林雪頂住個大肚腩，一般大隻佬Body當然用唔着，所以廠商整咗個新Body，肚腩用海綿填滿，再刻意整短對腳，站立時更有肥佬Feel。服裝方面，上次嘅華哥已經令人拍案叫絕，今次都Keep到高水準，綠色軍裝、皮製腰帶、防彈背心、基勒防彈頭盔及貝雷帽都好似實物，而且恤衫肩膊章有埋警員編號及「一柴」，最抵讚係軟膠Boot連鞋帶都造埋，唔似其他廠商一件過啤膠咁求其。另外，身為PTU自然多Parts，M10左輪手槍、伸縮警棍、胡椒噴霧同孖葉都有，最驚喜係有埋快速上彈器、水樽、對講機、電筒同原子筆呢啲小配件，加埋基本型及戰術型兩支M870雷鳴登，大把甫士任你擺。請恕筆者人心不足蛇吞象，如果有埋飯盒同車軚，就更加忠於電影原著喇！

查詢︰2366 2688（超人玩具）