Ascend G610 5吋親民機

近期內地手機界嘅熱話，就係期待已久嘅4G牌照終於發出。而各大廠商呢期就梗係集中火力研發4G手機，不過咪以為從此3G手機就成為絕唱，轉個頭內地大牌Huawei就有新機Ascend G610登場，有個5吋芒、雙卡功能加四核心處理器，規格實用；最重要售價僅$1,680，大打親民牌！

$1,680

兩張SIM並排放置，換卡時一定要先熄機拆電，略嫌不便。

電池容量有2,150mAh，估計應該僅僅夠大半日使用。

機背殼採用塑膠物料兼平滑設計，手感一般。

鵝蛋形機身方便手持，可惜機身重170g，頗墜手。

拍攝功能齊備，包括美白、全景等等，亦可為相片加入不同特效濾鏡。

「SIM卡管理」可以設定通話、數據連線等預設主卡，仲可以幫SIM卡改名，冇咁易混淆。

預載《Kingsoft Office》，可閱讀及編輯文件。

雖然採用四核心處理器，不過因為係入門級數，所以分數唔高。

Huawei近年致力發展Android智能手機，其中Ascend系列的P1S、P6等型號都屬代表作。今次介紹的新機G610同屬Ascend系列，先講外形，用上圓角鵝蛋設計，配合機面三個輕觸按鍵，大路穩陣，普羅用家應該較易受落。驚喜之處就在於備有一個5吋qHD大芒，對比度及亮度足夠，色水又自然，用來上網及串流睇片，效果都唔錯。

有招牌雙卡雙待

提起國產機嘅招牌功能，又點少得雙卡雙待呢？G610當然都有呢一招，SIM A、SIM B可以同時待機，撥號、傳短訊時，用家可以直接於通知欄更換主卡，又或者用內置「SIM卡管理」，事先設定好語音通話、短訊等預設主卡，操作相當清晰。唯一要扣分就係僅得SIM A插槽支援3G上網，而SIM B插槽就只可用GSM，冇得雙卡輪住上網，不夠靈活。

自家介面有新鮮感

雖然此機主打入門市場，不過硬件都足秤，包括1.2GHz四核心處理器、1GB RAM，亦可外加記憶卡擴充容量，日常睇片、上網都夠用。而小記最鍾意反而係其操作介面，皆因係Huawei自家介面Emotion UI ，有別於傳統AppDrawer功能表設計，Apps一律擺晒喺主頁，操作似足iOS咁就手。另外，G610亦備有大量主題及Widgets，新鮮感十足。