出自電玩 《機械人大戰F完結篇》 ，超越神與惡魔嘅Mazinkaiser （港譯 「帝皇萬能俠」 ） ，嚴格嚟講機設並非永井豪原創，呢部萬能俠之所以變得咁 「生化」 ，全因遊戲劇情交代佢畀三一射線 「射中」 產生異變，故此惡形惡相嘅表情，跟 「真•三一」同出一轍。SR合金系列繼真•三一萬能俠之後，當然唔少得帝皇萬能俠接棒推出，金屬感依然重秤，胸口又有特別設計，令雙手可以靈活伸前，加埋一對大飛翼，以及巨形 「帝皇寶劍」 ，惡到冇朋友！

Super Robot超合金Mazinkaiser
建議零售價：$699

胸、腰之間設有三組關節，令上半身總算做到明顯向後拗嘅動作，又可擺到蛇腰甫士。

飛翼以獨立Ball Joint連接，做到全方位扭動。

合金表面做足細緻塗裝，例如肩甲嘅金色內構，仲有獨立鑲嵌嘅透明紅玉。

腳掌位置增加一個延伸關節，藉此加強接地性，腳尖仲可以獨立活動。

擺鐵甲飛拳嘅甫士當然冇問題，但係欠咗特效組件，還原唔到發射時嘅噴煙效果，失色晒。

隨盒附有兩把唔同尺寸嘅帝皇寶劍，大嗰把最啱用嚟擺出招甫士。

想幫真．三一擺出波甫士，或者令帝皇萬能俠傳神重現出飛掌及揸雙劍嘅姿勢，擴充組件Super Robot Chogokin Dynamic Option Part Set就令你心癢癢好想買，現已在p-bandai.hk進行網上預訂，售價$320（未連運費）。

塗裝質感交足貨

要表現出帝皇萬能俠有幾高人一等，塗裝一定要講究，SR超合金就落足心機，首先本體大部分位置都用咗焗漆上色，藉此增加質感，再者黑色部分做咗拋光處理，強化線條上嘅銳利感，仲有關節及肩甲內側用咗啞金色，紅玉位置又用埋透明膠料，令整體造型貴氣過人。至於面部嘅紅藍色線條亦算工整，美中不足係心口嘅透明紅玉似乎冇用銀色打底，令透光度打咗折扣。

局你揼本另購Parts

帝皇萬能俠嘅造型特別多弧面，螺旋紋及尖位都誇張過人，有型還有型，難免會影響關節嘅活動幅度，點擺甫士先？廠方就將心口嗰對蝙蝠翼加入可動設計，只要向上升起，就唔會阻到雙手向前擺，加埋拉出式嘅膊頭關節，想擺「高熱火燄」必殺技，以及雙手拎劍呢啲大動作甫士都So Easy！可惜頸位關節削咗啲，抬頭幅度唔多夠，要擺飛行甫士嘅話，就要盡量將上半身向後拗嚟就位。不過咁都只係小事，最令人失望係隨盒Parts唔多夠，雖然為咗迎合唔同嘅視覺效果，已經有一大一細嘅帝皇寶劍，但係放飛拳等萬能俠必備嘅特效Parts，竟然要喺p-bandai.hk另購擴充組件，唔使賺到咁盡啩！

查詢：2433 1828 （瑞華行）