《勇者鬥惡龍》被譽為日本國民嘅RPG遊戲，雖然此作已經有廿幾年歷史，不過至今都依然爆紅，就連周邊商品都長賣長有。一向鍾意搞Crossover手機嘅DoCoMo當然唔會放過商機，推出SH-01F DRAGON QUEST手機，機身以至介面都滿布史萊姆及龍王嘅蹤影，毒性超濃！此機已經從水路火速到港，「老餅」機迷相信幾難忍手！

$5,180

機背係電鍍銀色，效果超靚，不過一掂即黐手指模，好難打理。

虛擬Home都係史萊姆，相當得意。

接收及電量圖示都變埋做史萊姆，誠意十足。

開機畫面亦大玩遊戲風格，好過癮！

最特別就係當鎖機熄芒時，過場動畫都係史萊姆，驚喜度滿分。

機背備有1,630萬像素F1.9光圈鏡頭，影夜景都冇難度。

音量鍵由傳統於機側改為機面左下角，輕觸式反應都算靈敏。

記憶卡及SIM卡槽均設於機頂位置，亦有防水蓋作保護。

內置三款主題防窺圖案，靚得嚟又可以保私隱。

Box Set有埋抹布及迎合主題的說明書。

用隨機附送嘅序號，就可以於日本Play Store免費下載《Dragon Quest VIII》遊戲。

《Dragon Quest冒險Dice》簡化為棋盤擲骰玩法，啱晒「輕食」玩家。

內置八款Wallpaper，其中小記就最鍾意呢款七彩史萊姆，夠晒Colourful。

預載多款鈴聲，全部都係遊戲入面嘅提示同背景音樂，機迷一聽就認到。

電鍍銀色機背

《勇者鬥惡龍》遊戲經常都會喺寶箱發現到好正嘅道具，勢估唔到連手機亦可搵得到！講緊嘅其實係包裝盒，此機包裝紙盒特意設計成一個寶箱，打開後就會見到主機；驟眼睇機面唔算特別，原來焦點喺機背，皆因換成銀色電鍍物料，表面仲刻上史萊姆、龍王等主要角色剪影嘅Monogram，相當顯眼！原裝Box Set仲送埋一本名為《冒險引導書》嘅說明書同埋大大個Logo嘅抹芒布，非常有誠意。

史萊姆盡現介面

眾多遊戲角色入面，史萊姆肯定係最受歡迎嗰位，所以此機介面都充滿佢嘅蹤迹。一着機就已經見到史萊姆現身於提示頁以及開機畫面，就連主頁嘅虛擬Home鍵、電量、接收圖示都變埋做史萊姆，相當搞鬼。另外，一般主題手機唔少得有專屬Wallpaper，最特別就係連防窺模式嘅圖案都變成《勇者鬥惡龍》入面嘅版圖畫面，超驚喜。值得一提，此機仲有一系列獨有鈴聲，包括遊戲背景音樂、Level Up等等，簡直好似打緊機一樣，機迷的話，應該收貨。

《DQ VIII》免費下載玩

叫得做《勇者鬥惡龍》手機，冇得玩呢款大作又點成事？因此佢內置最新嘅Android版《Dragon Quest VIII》，用家只要輸入隨機嘅序號，就可以率先喺日本Play Store免費下載呢隻遊戲；此外仲預載另一隻名為《Dragon Quest冒險 Dice》嘅遊戲，類近大富翁嘅棋盤擲骰玩法，仲有得儲怪物圖鑑，應該帶到新鮮感畀玩家。話明叫SH-01F DRAGON QUEST，顧名思義以早前推出嘅SH-01F作為藍本，備有5吋全高清屏幕、1,630萬像素鏡頭、四核心處理器，仲支援防水標準，全屬頂級硬件；唯一挑剔係日系機先天唔支援香港4G，上網速度冇咁快囉！

Spec

制式：GSM四頻、UMTS

處理器：2.2GHz四核心

記憶體：2GB RAM、32GB內存、支援64GB microSD

屏幕：5吋IGZO（1,920×1,080解像度）

鏡頭：後置1,630萬像素、前置210萬像素

對外連接：HSDPA、802.11ac、microUSB、藍芽4.0、IPX5/7防水標準

電池容量：3,000mAh

作業系統：Android 4.2

體積：141×70×8.9mm

重量：139g

查詢：2374 0618