《真‧高達無雙》魔霸大石壓死蟹

返工受埋晒啲冤屈氣，最好打機發洩。嚟緊就有隻出氣作登場，就係無雙玩法加上高達機體嘅聯乘作品《高達無雙》之第四集《真高達無雙》。今次有PS3及PS Vita版，除標榜有120款機體可使用外，更首次加入霸道巨型Mobile Armor（簡稱MA）嘅操縱玩法，對住蜂擁而上嘅卒仔機時可一嘗「大屠殺」嘅快感；加埋重臨嘅「Official Mode」，可照足高達故事打，忠實粉絲玩落零舍有Feel！

自護年輕統帥加曼揸戰艦直撞木馬號嘅經典一幕，遊戲以逼真CG表達。

之前打魔霸玩到氣餒的玩家，今集終可掉轉頭揸魔霸來盡情發洩。

Turn-X的絕招SP攻擊為「月光蝶」，背部噴出如羽翼般的粒子，所到之處生靈塗炭。

在「Official Mode」，玩家可駕駛獨角獸高達跟剎帝利決戰。

操縱巨型MA時明顯看到戰場敵我機體比例的分別，戰場背景並未因放大而變差。

收集系統相當豐富，獲得角色及歌曲卡片的同時，更可取得罕有改造部件。

新增戰艦支援系統，可搵戰艦助戰；如玩高達的話，可召喚布拉度艦長用木馬號幫拖。

機體升級改裝系統更仔細，武器強化後，威力及攻擊範圍會有所提升。

重高達、魔霸夠屈機

以前玩《高達無雙》，最怕打巨型機體，皆因佢哋高血量、裝甲厚、光線射擊無效，兼且攻擊範圍大，往往打到玩家氣餒。而今集就掉轉頭可以畀大家使用，玩「一年戰爭」時，可一嘗揸魔霸蹂躪吉姆及鐵球，或者在泰坦斯動亂時期用重高達左一手，右一腳打爆蜂擁而上的尼姆，屈機勁痛快！模式方面，今次重新加入第一集的故事模式「Official Mode」，跟足歷史由0079年阿寶對馬沙「一年戰爭」，打到0096年巴納吉獨角獸高達爆甲跟二號機「報喪女妖」一決雌雄，甚至可玩《Seed Destiny》時真飛鳥與基拉的死鬥；而發動特定任務時仲有得睇逼真過場CG，原汁原味。

Burst發動技能搵戰艦幫拖

正如引言提及，遊戲提供120種機體予玩家操作，單要鍛煉戰鬥風格已相當耐玩，如笨重嘅ZZ高達依賴頭部米加粒子炮清理雜兵，或有「馬沙再臨」之稱嘅新安洲之招牌連打帶跑戰術。至於戰鬥系統則沒有大變動，每位駕駛員及機體均有各自既定技能，當施展絕招「SP攻擊」時可能中斷敵方出必殺技之餘，更可乘勢追擊敵方。新作旨在戰鬥組合變化夠自在，角色及機體們新增專屬「Burst」技能，發動時有一定時間嘅效果加乘；如阿寶Burst「戰鬥NewType」可令周遭敵人動作變慢；駕駛擁有Burst「TransAM」增加攻擊反應的00高達時，便會組合出最快攻速嘅戰鬥風格。此外遊戲又強化玩家火力，可利用新增戰艦支援系統召喚戰艦幫手殺敵，不過使用次數似乎有限制，玩家記得別太濫用！