adidas brazuca絕世好波

普天之下，邊個最好波？你話馬納當拿一個扭七個，我夠話美斯舞龍咁舞冇人可阻，邊有得拗？可以真正分高低嘅，就只有回歸原點，即係足球本身。波，「笨」唔係夠圓就算，從1970年墨西哥世界盃起，就成為指定足球供應商嘅adidas，就為咗「好波」呢個目標，不斷炮製出更輕、更準嘅足球，專為明年巴西世界盃而設計嘅brazuca，上個禮拜喺里約熱內盧正式亮相後，啱啱仲飛身到香港，功能表現唔只係歷代最強，賣相仲超級Colourful，就算踢波先嚟落雨，心情依然Keep住靚！

本地首展會嘅開幕儀式，由香港花式足球冠軍Lyson Sze獻技，將brazuca嘅出色球感表露無遺。

巴西隊嘅必然右閘丹尼爾艾維斯，就係600位試波球星之一，佢將brazuca捧到上天：「呢個新波無論喺地面或半空都表現出眾，所有球員都會好鍾意，我已經急不及待想喺開幕戰大展身手。」

世界盃咁大件事，當然不容有失，Matthias Mecking表示brazuca係品牌有史以來測試次數最多嘅比賽專用足球。

除咗畀球星試踢，brazuca亦喺adidas嘅實驗室進行咗多輪精密測試，確保萬無一失。

球面以六塊縫片組成，接縫位少咗，藉此提升導流作用，長傳、遠射都更穩定、準確。

adidas brazuca $1,199

除有由許願手鐲演化而成嘅彩色弧紋，球面亦印有FIFA官方標誌、2014世界盃圖案及brazuca嘅字樣，表明Official Match Ball嘅尊貴身份。

新波表面布滿微細嘅凹凸紋理，有助加強與鞋面嘅摩擦效果。

除咗一眾甲組球星，大埔LuLu亦係發布會上嘅座上客，平時睇開足球嘅佢，大讚美斯係好男人喎，所以事先張揚撐阿根廷攞世界盃冠軍。

雖然依家嘅足球，已經唔似讀書嗰陣非黑即白咁老套，不過講到最有外在美，brazuca真係冇得輸，白底表面印咗綠、橙、藍三色弧紋，鮮艷之餘又破格，原來設計靈感來自巴西人嘅傳統飾物許願手鐲（fita do Senhor do Bonfim da Bahia），既有地道特色，又夠好意頭，靚得零舍有Point。至於brazuca呢個名字，原來係巴西俚語，既可解作「巴西人」，亦可泛指巴西人嘅生活方式，即時令人聯想到率性自然、變化多端嘅森巴足球。而且呢個名並唔係adidas或者FIFA私底下決定，實情係去年九月喺巴西舉行咗一次逾百萬名球迷公投選出嚟，得票率高達77.8%，真正嘅公平選舉，結果先夠說服力、有認受性，香港人切膚之痛！

功能升級　Less is Round

不過個波幾靚都假，如果唔好踢嘅話，絕對稱唔上係「好波」，adidas造波經驗豐富，早於2006年德國世界盃所用嘅+Teamgeist開始，球面就放棄咗傳統五邊形加六邊形嘅多幅式拼貼做法，改用14塊不規則縫片，2010年南非世界盃再減到8塊，至於最新嘅brazuca就只得6塊，除咗有輕量化效果，最重要係球面嘅接縫位少咗，球形就可以做得更圓、更對稱，藉此改善導流效果。內膽方面採用Tango 12（2012年歐洲國家盃專用足球）、Cafusa（2013年洲際國家盃專用足球），以及歐聯專用足球嘅設計，平衡度相當好。內外都有咁周詳嘅設計，故此brazuca無論喺抓力、球感、穩定性以至氣動力效果等多方面，都係歷屆最佳。

600位球員　親身試波

講就天下無敵，如果brazuca有咩閃失，影響到出戰明年世界盃嘅球員表現，後果分分鐘嚴重過比利把烏鴉口喎！為咗證明新波真係Work，adidas花咗超過兩年半時間做研發及測試工作，尤其是試波呢Part，唔只喺實驗室進行，據主理brazuca呢個大Project嘅Matthias Mecking（Business Unit Director, adidas Football Hardware）所講，仲搵埋全球三大洲10個國家共30支專業球隊親身試波：「有份試波嘅球員數目多達600位，來自國家隊及職業球會，當中包括AC米蘭及拜仁慕尼黑等，球員方面就有美斯、舒韋恩史迪加及施丹等，當中仲包括非adidas旗下球員。佢哋對brazuca嘅評價都好正面，大部分人都認為brazuca有好Close嘅控球效果，觸球反應亦都好一致，力量傳遞夠晒好，可以做出穩定嘅飛行路線。而且為求喺實戰中考驗brazuca，早前U20世界盃及瑞典對阿根廷嘅友誼賽上，已經率先試用，不過球面用咗其他印花設計。」唔怪得筆者自認眼利都認唔到啦，蠱惑喇你！