雖然2014巴西世界盃仲有大半年先殺到埋身，不過三軍未動、糧草先行，身為大會合作單位、又係主要裝備供應商之一嘅adidas，早就準備好新波、新Boot及新波衫，畀球員事先熟悉全新嘅Full Gear裝備之餘，亦可讓球迷提早感受大戰氣氛，尤其是對超級球迷而言，就算平時冇踢開波，但係新波衫就點都要買番件啦！

德國2014主場球衣
$1,099（落場版）
$579（球迷版）

心口以及背脊嘅三色圖案，係由德國國旗嘅顏色演變而成，簡潔又有型；其實愛國呢樣嘢，由心而發，邊使成日提住咁造作，尤其是嗰啲「頭文字愛」嘅組織呢，既Cheap又核突囉！

同步上架
阿根廷2014主場球衣

落場版 $1,099/件

球迷版 $579/件

德國隊耳目一新

2014嘅adidas國家隊新波衫啱啱抵港，當中包括德國、西班牙、阿根廷及日本嘅主場款式，就以同adidas分屬同鄉嘅德國隊為例，以往嘅德國隊主場球衣，嚟嚟去去都係白色為主，領位、袖口就用黑色綑邊，變化唔多。2014版本終於嚟個大突破，唔只黑褲變白褲，最搶鏡係心口有大大個漸變紅色嘅V形圖案，圖案上下分別有黑色及黃色幼邊點綴，三色靈感正正來自德國國旗，既創新又有愛國情懷，夠心思！至於功能設計方面，呢四支國家隊波衫都有球迷版及落場版輸港，以後者為例，由於用咗adizero製造技術，同去年嘅同款波衫對比，輕咗足足40%，廠方除咗喺衫身主體、領位及袖口物料花工夫外，就連國家隊嘅隊徽及三間條紋都偷輕埋，減磅決心分分鐘大過一眾女星。好似阿根廷嘅美斯、西班牙嘅佐迪艾巴，都係出名快到冇影嘅速度型球員，明年世界盃着埋呢批adizero波衫上場，會唔會屈機咗啲呀？